Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Habakuk 2:1-20

LI TI ATËNË NI

  • “Mbi yeke ngbâ ti bâ ndo ti mä tënë so lo yeke tene” (1)

  • Jéhovah akiri tënë na prophète ni (2-20)

    • ‘Ngbâ ti ku vision ni’ (3)

    • Zo ti mbilimbili ayeke ngbâ na fini ndali ti so lo duti be-ta-zo (4)

    • Aye ti vundu oku ndali ti azo ti Chaldée (6-20)

      • Hingango ye na ndö ti Jéhovah ayeke si singo na ndö ti sese (14)

2  Mbi yeke ngbâ ti luti na ndo so mbi yeke sara sinziri dä,+ mbi yeke luti ande na ndö ti ngangu gbagba ni. Mbi yeke ngbâ ti bâ ndo ti mä tënë so lo yeke tene na mbi ti fa peko ni, nga tënë so mbi yeke kiri na ni tongana lo suku na mbi.   Jéhovah akiri tënë na mbi, lo tene: “Mo sû tënë ti vision so na mbeti, mo sû ni a sigi nzoni na ndö ti akete tableau,+ tongaso si zo so ayeke diko ni na kota go alingbi ti diko ni nzoni.*+   Ngbanga ti so vision ni ayeke ndali ti ngoi so a fa ni awe, a yeke gue juska na nda ni,* a yeke ga mvene pëpe. Même tongana a si hio pëpe,* mo ngbâ ti ku ni!*+ Nyen na nyen kue a yeke si. A yeke si na retard ape!   Ala bâ zo ti baba;* lo yeke mbilimbili na lo wani pëpe. Me zo ti mbilimbili ayeke ngbâ ande na fini ndali ti so lo duti be-ta-zo.*+   Biani, vin ayeke handa zo; ni la, zo so wuma ahon ndö ti lo ayeke si ande pëpe na ye so lo zia na gbele lo ti si dä. Lo sara si nzara so lo yeke* na ni aga kota tongana Dû ti kuâ;* lo yeke tongana kuâ, na nzara ti lo alingbi ti hunzi pëpe. Lo ngbâ ti bungbi amara kue na ti bungbi azo kue na terê ti lo.+   Eskê ala so kue ayeke tene ande mbeni proverbe na terê ti lo ape?+ mbeni tënë ti kpongo zo nga so a yeke ngangu ti mä yâ ni; ala yeke tene ande: ‘Mawa na zo so abungbi aye so ayeke ti lo pëpe, aye ni so ayeke ngbâ juska lawa? Mawa na zo so asara si bon ahon ndö ni na li ti lo!   Azo so mo mû bon ti ala ayeke londo gï hio tongaso na terê ti mo ape? Ala yeke zingo na ala yeke yengi mo ngangu, na mo yeke ga tongana kungba so ala gbu na ngangu ahon na ni.+   Ngbanga ti so mo gbu lani aye ti amara mo hon na ni, tanga ti azo ni kue ayeke gbu ande aye ti mo ti hon na ni,+ ndali ti so mo tuku mênë ti azo, mo sara aye ti ngangu na sese, na agbata nga na azo so alango na yâ ti agbata ni.+   Mawa na zo so awara ye na lege ti likisi lo ga na ni na yâ ti sewa* ti lo, ti tene lo sara da ti lo na nduzu tongana da ti ndeke, si a zi lo na yâ ti ye ti sioni. 10  Mo sara ye na mayele ti zia kamene na lê ti sewa* ti mo. So mo futi amara mingi so, mo sara siokpari na terê* ti mo wani.+ 11  Mbeni tênë ti gbagba ni ayeke dekongo, na mbeni kota keke ti li ti da ayeke ye gbe ni ande. 12  Mawa na zo so asara mbeni gbata na lege ti tukungo mênë, nga na zo so aleke mbeni kodro na lege ti sarango ye so ayeke mbilimbili pëpe. 13  Bâ, a yeke Jéhovah ti aturugu la asara si azo so asara kua ngangu ndali ti mbeni ye so na nda ni wâ ayeke futi ni, nga si amara afatigué gï senge senge, ni la ape?+ 14  Bâ, hingango ye na ndö ti gloire ti Jéhovah ayeke si singo na ndö ti sese tongana ti so ngu asi yâ ti ngu-ingo.+ 15  Mawa na zo so amû na akamarade ti lo mbeni ye ti nyongo ni, lo mélangé ni na ngonzo nga na kota ngonzo, ti tene ala nyon ni asoulé ala si lo bâ terê ti ala senge. 16  Kamene la ayeke gbu lê ti mo ahon ti tene mo wara gloire. Mo kue, mo nyon sämba ni na mo zia terê ti mo so a fâ na ganza pëpe so na gigi.* Kopo so ayeke na maboko ti Jéhovah na mbage ti koli so ayeke ga na mbage ti mo,+ na gloire ti mo ayeke ga ye ti kamene. 17  Aye ti ngangu so mo sara na Liban ayeke kiri ti tï na ndö ti mo, futingo so amû mbeto mingi na anyama ti ngonda so, a yeke tï na ndö ti mo, ndali ti so mo tuku mênë ti azo na mo sara ye ti ngangu na sese, na agbata nga na azo so alango na yâ ti agbata ni.+ 18  Yanda so zo aleke ni na kode so, a yeke sara kua ti nyen? Statue* so azo la amû wen si aleke na ni nga so ayeke fa gï atënë ti mvene, a yeke sara kua ti nyen? même tongana zo so aleke ni azia bê ti lo na ndö ni, si lo leke anzapa so ayeke aye senge senge na so ayeke sara nga tënë pëpe so, a yeke sara kua ti nyen?+ 19  Mawa na zo so atene na mbeni morceau ti keke, atene: “Mo zingo!” Wala lo tene na mbeni tênë so ayeke sara tënë pëpe so, lo tene: “Zingo, mo fa ye na e!” Bâ, a kpaka lor na argent na terê ni kue,+ me pupu ayeke nga na yâ ni oko pëpe.+ 20  Me Jéhovah ayeke na yâ ti temple ti lo so ayeke nzoni-kue.+ Sese kue, duti kpô na devant ti lo!’”+

Kete tënë

Wala “asua nzoni.”
Wala “tënë ni ayeke ga tâ tënë.”
Wala “mo bâ mo tene a si hio pëpe.”
Wala “lê ti mo ayeke gï na lege ti ku ni.”
Wala “Bâ zo so âme ti lo asuku.”
A lingbi nga ti tene “na lege ti mabe ti lo.”
Wala “so âme ti lo ayeke.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.
Wala “mara.”
Wala “mara.”
Wala “âme.”
A lingbi nga ti tene “tambela kirikiri tongana zo so anyon sämba.”
Wala “Statue so a tö wen aga ngu si a leke na ni.”