Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 7:1-25

LI TI ATËNË NI

  • Jéhovah akpengba Moïse (1-7)

  • Keke ti Aaron aga kota ngbo (8-13)

  • Ye ti ngangu 1: ngu aga mênë (14-25)

7  Na pekoni, Jéhovah atene na Moïse: “Bâ, mbi sara si mo ga tongana Nzapa* na lê ti Pharaon, Aaron ita ti mo ayeke ga ande prophète ti mo.+  Fa na Aaron peko ti atënë kue so mbi yeke fa na mo, Aaron la ayeke sara tënë na Pharaon ti tene Pharaon azia lege na azo ti Israël ti sigi na kodro ti lo.  Âdu ti mbi, mbi yeke zia si li ti Pharaon akpengba,+ na mbi yeke sara gbâ ti aye ti kpene nga na amiracle na kodro ti Égypte.+  Me Pharaon ayeke mä ande ala pëpe, tongaso mbi yeke zia maboko ti mbi na ndö ti Égypte, mbi yeke punir Égypte ngangu na mbi yeke zi azo ti mbi, azo ti Israël, so ayeke gbani gbani* so.+  Azo ti Égypte ayeke hinga biani so mbi yeke Jéhovah,+ tongana mbi yôro maboko ti mbi ti fa ngangu ti mbi na ndö ti Égypte ti sigi na azo ti Israël na popo ti ala.”  Moïse na Aaron asara ye so Jéhovah afa na ala. Ala sara gï tongana ti so lo hunda.  Moïse ayeke na ngu 80 na Aaron ayeke na ngu 83 na ngoi so ala sara tënë na Pharaon.+  Jéhovah atene na Moïse na Aaron:  “Tongana Pharaon atene na ala, atene: ‘Ala sara mbeni miracle e bâ,’ tongaso mo yeke tene ande na Aaron mo tene: ‘Mû keke ti mo, mo bi ni na sese na gbele Pharaon.’ A yeke ga ande kota ngbo.”+ 10  Tongaso, Moïse na Aaron ague na gbele Pharaon na ala sara gï tongana ti so Jéhovah afa na ala. Aaron abi keke ti lo na sese na gbele Pharaon na azo ti kua ti lo, keke ni aga kota ngbo. 11  Me Pharaon airi awandara na azo ti sarango yorö, na aprêtre ti Égypte so ayeke sara magie+ asara nga oko ye ni so na lege ti “magie” ti ala.+ 12  Zo oko oko abi keke ti lo na sese, akeke ni aga akota ngbo; me keke ti Aaron amene akeke ti ala kue. 13  Atâa so kue, li ti Pharaon akpengba,+ na lo mä ala pëpe, gï tongana ti so Jéhovah atene lani. 14  Na pekoni, Jéhovah atene na Moïse: “Pharaon asara kpengba-li,+ lo ke ti zia lege na azo ni ti gue. 15  Kekereke na ndapre mo gue mo wara Pharaon. Bâ! Lo yeke sigi ti gue na ngu. Mo luti mo ku lo na terê ti Ngu ti Nil, mo mû nga na maboko ti mo keke so aga lani ngbo so.+ 16  Mo tene na lo: ‘Jéhovah Nzapa ti aHébreu atokua mbi na mo,+ lo tene: “Mo zia lege na azo ti mbi ti gue tongaso si ala lingbi ti sara na mbi na yâ ti benyama,” me juska fadeso mo mä yanga ti mbi pëpe. 17  Bâ, Jéhovah atene: “Na lege ti ye so mbi yeke sara so, mo yeke hinga so mbi yeke Jéhovah.+ Bâ, mbi yeke pika Ngu ti Nil na keke so ayeke na maboko ti mbi so, ngu ni ayeke ga mênë. 18  Asusu so ayeke na yâ ti Ngu ti Nil ayeke kui, ngu ni ayeke fun na azo ti Égypte alingbi ti nyon ni pëpe.”’” 19  Na pekoni, Jéhovah atene na Moïse: “Tene na Aaron: ‘Mû keke ti mo na yôro maboko ti mo na ndö ti angu ti Égypte,+ na ndö ti angu so ayeke sua, na ndö ti acanal ni,* na ndö ti angu so ayeke na place so asosongo asigi dä+ nga na ndö ti aye so ala bata angu ti ala dä, tongaso si a ga mênë.’ Ngu ayeke ga mênë na yâ ti kodro ti Égypte kue même na yâ ti ata ti keke na ata ti tênë.” 20  Hio, Moïse na Aaron asara gï tongana ti so Jéhovah afa na ala. Lo yô keke ti lo, lo pika Ngu ti Nil na gbele Pharaon na azo ti kua ti lo, na angu so kue ayeke na yâ ti Nil aga mênë.+ 21  Asusu so ayeke na yâ ti Ngu ti Nil akui,+ Ngu ti Nil ni afun. Azo ti Égypte alingbi ti nyon Ngu ti Nil pëpe,+ mênë amû yâ ti kodro ti Égypte kue. 22  Me aprêtre ti Égypte so ayeke sara magie asara oko miracle ni so na lege ti aye ti magie ti ala,+ ye so asara si li ti Pharaon angbâ ti kpengba, lo mä Moïse na Aaron pëpe, tongana ti so Jéhovah atene lani.+ 23  Na pekoni, Pharaon akiri na da ti lo, lo bâ ye so asi so tongana senge ye. 24  Azo ti Égypte kue ague azi adû na terê ti Ngu ti Nil ti wara ngu ti nyon, ngbanga ti so ala lingbi ti nyon Ngu ti Nil pëpe. 25  Lango mbasambala ahon awe na peko ti so Jéhovah apika Ngu ti Nil.

Kete tënë

Na Hébreu: “sara mo Nzapa.”
Na Hébreu: “aturugu ti mbi.”
So ti tene acanal ti Ngu ti Nil.