Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 5:1-23

LI TI ATËNË NI

  • Moïse na Aaron na gbele Pharaon (1-5)

  • Pasi ni akiri aga ngangu (6-18)

  • Azo ti Israël abi tënë ni na li ti Moïse na Aaron (19-23)

5  Na pekoni, Moïse na Aaron ague ala tene na Pharaon: “Jéhovah Nzapa ti Israël atene: ‘Zia azo ti mbi ague si ala lingbi ti sara mbeni matanga na mbi na yâ ti benyama.’”  Me Pharaon atene: “Jéhovah ni ayeke zo wa,+ si mbi mä yanga ti lo ti zia Israël ague?+ Mbi hinga ti mbi Jéhovah ni pëpe; nga, mbi yeke zia Israël ti gue pëpe.”+  Me, ala tene: “Nzapa ti aHébreu asara tënë na e. Pardon, e ye ti gue na mbeni tambela ti lango ota na yâ ti benyama ti mû sandaga na Jéhovah Nzapa ti e;+ tongana e sara ni pëpe, lo yeke bi sioni kobela na terê ti e wala lo yeke fâ e na épée.”  Gbia ti Égypte akiri tënë na ala, lo tene: “Moïse na Aaron, ngbanga ti nyen si ala pusu azo ni ti dö kua ti ala ti zia? Ala kue ala kiri na terê ti kua ti ala ti ngbâa.”*+  Pharaon akiri atene: “Ala bâ tongana nyen azo ti kodro ni ayeke mingi fadeso, na ala ye ti tene azo ni adö kua ti ala azia.”  Tâ na lango ni so, Pharaon amû yanga na amokonzi so ayeke pusu azo ni na kua nga na azo so a zia ala na li ti kua ni, lo tene:  “Ala mû asaleté ti peko ti alê ti kobe na azo ni mbeni pëpe ti sara na abrique.+ Zia ala wani ague aro ni.  Me ala hunda na ala na ngangu ti sara gï oko wungo ti abrique so ala yeke sara ka kozo so. Ala zi mbeni mbage ni na ala pëpe, ngbanga ti so ala ye ti sara kua pëpe.* Ndani la si ala yeke dekongo, ala tene: ‘E ye ti gue, e ye ti mû sandaga na Nzapa ti e!’  Ala sara si azo ni asara kua ngangu ahon ti kozo, ala mû gbâ ti kua na ala, tongaso si ala dengi mê ti ala na atënë ti mvene pëpe.” 10  Tongaso, amokonzi+ ni nga na azo so a zia ala na li ti kua ni ague atene na azo ni, atene: “Pharaon atene: ‘Mbi yeke mû na ala asaleté ti peko ti alê ti kobe encore ape. 11  Ala gue, ala wani ala gi asaleté ti peko ti alê ti kobe ni na ndo kue so ala lingbi ti wara ni dä, me a yeke zi mbeni mbage ti akua ni na ala kete tongaso pëpe.’” 12  Tongaso, azo ni akangbi terê ti ala na yâ ti kodro ti Égypte kue ti ro asaleté ti peko ti alê ti kobe. 13  Amokonzi ni ayeke forcé ala, ala tene: “Zo oko oko ahunzi kua ti lo ti lâ na lâ, gï tongana ti so lani a yeke mû na ala asaleté ti peko ti alê ti kobe.” 14  Tongaso, a pika azo ti Israël so a zia ala na li ti kua ni, ala so amokonzi ti kua ti Pharaon azia ala na ndö ti azo ti Israël.+ Nga a hunda ala, a tene: “Wungo ti abrique so a hunda ka na ala ti sara so, ala sara ni pëpe ngbanga ti nyen? Kua ti biri na ti laso kue ala hunzi ni pëpe.” 15  Tongaso, azo ti Israël so a zia ala na li ti azo ti kua ni ague adema terê ti ala na Pharaon, ala tene: “Mo sara ye tongaso na azo ti kua ti mo ngbanga ti nyen? 16  A mû asaleté ti peko ti alê ti kobe na e azo ti kua ti mo pëpe, me a tene na e a tene: ‘Ala sara abrique!’ A pika e azo ti kua ti mo, atâa so faute ni ayeke ti azo ti mo.” 17  Me lo tene: “Ala ye ti sara kua pëpe,* ala ye ti sara kua pëpe!*+ Ndani la si ala tene: ‘E ye ti gue, e ye ti mû sandaga na Jéhovah.’+ 18  Ala kiri fadeso ala sara kua! A yeke mû asaleté ti peko ti alê ti kobe na ala pëpe, me ala yeke ngbâ ti sara tâ gï wungo ti abrique so a fa na ala so.” 19  Azo ti Israël so a zia ala na li ti azo ti kua ni abâ so ye ni aga sioni na ala awe ngbanga ti so a mû yanga, a tene: “Ala zi mbeni wungo ti abrique ni oko pëpe na ndö ti wungo ti so zo oko oko ayeke sara ni lâ na lâ.” 20  Na pekoni, ala tingbi na Moïse na Aaron so angbâ ti ku ala na sigingo ti ala na gbele Pharaon. 21  Ala tene na Moïse na Aaron: “Zia Jéhovah abâ ala na lo fâ ngbanga, ndali ti so ala sara si Pharaon na azo ti kua ti lo abâ e na sioni lê.* Ala zia épée na maboko ti ala ti tene ala fâ e na ni.”+ 22  Moïse akiri na mbage ti Jéhovah na lo tene: “Jéhovah, mo sara sioni na azo so ngbanga ti nyen? Mo tokua mbi ngbanga ti nyen? 23  A komanse na ngoi so mbi gue na gbele Pharaon ti sara tënë na iri ti mo,+ lo kiri lo sara sioni mingi na azo so,+ na mo zi azo ti mo oko pëpe.”+

Kete tënë

Wala “nengo kungba ti ala.”
Wala “ala yeke sara goigoi.”
Wala “Ala yeke sara goigoi.”
Wala “ala yeke sara goigoi.”
Wala “ala sara si e fun sioni na hôn ti Pharaon nga na azo ti kua ti lo.”