Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 34:1-35

LI TI ATËNË NI

  • Afini kete tableau ti tênë (1-4)

  • Moïse abâ gloire ti Jéhovah (5-9)

  • A kiri a fa atënë ti yâ ti mbele ni (10-28)

  • Lê ti Moïse asu (29-35)

34  Na pekoni, Jéhovah atene na Moïse: “Mo sara akete tableau use ti tênë tongana ti akozo ni so.+ Mbi yeke sû ande na lê ti akete tableau ni atënë so ayeke lani na lê ti akozo ni+ so mo fâ yâ ni so.+  Mo leke terê ti mo kekereke na ndapre, ndali ti so kekereke na ndapre mo yeke monté ande na ndö ti Hoto ti Sinaï na mo yeke luti na gbele mbi kâ na li ti hoto ni.+  Me zo oko ayeke monté na terê ti mo pëpe, nga a bâ mbeni zo nde na ndö ti hoto ni pëpe. Atâa taba wala bagara ate pere na devant ti hoto ni pëpe.”+  Tongaso, Moïse asara akete tableau use ti tênë tongana ti akozo ni so, lo londo na kota ndapre lo monté na ndö ti Hoto ti Sinaï gï tongana ti so Jéhovah atene na lo, lo mû akete tableau use so na maboko ti lo.  Jéhovah adescend+ na yâ ti mbinda ni na lo duti kâ na terê ti Moïse na lo to mbela na iri ti lo Jéhovah.+  Jéhovah ayeke hon na lê ti Moïse na lo to mbela lo tene: “Jéhovah, Jéhovah, Nzapa so asara nzoni bê na zo+ nga so abâ mawa ti zo,*+ lo sara ngonzo hio hio pëpe,+ lo si singo na tâ ndoye*+ nga na tâ tënë,*+  lo yeke fa nzoni bê na azo saki na saki,+ lo yeke pardonné faute, kengo ndia nga na siokpari;+ me zo so asara sioni lo yeke zia lo ngbâ senge pëpe,+ lo yeke mû punition ti sioni so ababâ asara, ti ga na ni na ndö ti amolenge ti ala, na ndö ti a-âta ti ala nga na atarä ti ala.”+  Hio, Moïse akuku lo kpo li ti lo na sese.  Na pekoni, lo tene: “Jéhovah, fadeso, tongana mbi nzere na lê ti mo awe, pardon, Jéhovah, mo gue legeoko na e,+ atâa so e yeke azo so li ti e akpengba,*+ mo pardonné afaute nga na siokpari ti e+ na mo mû e ti ga ye ti mo.” 10  Nzapa atene: “Bâ mbi yeke te mbeni mbele na ala la: Na lê ti azo ti mo kue, mbi yeke sara aye ti dongo bê so ade mbi sara ni lâ oko pëpe na ndö ti sese kue wala na popo ti amara kue.+ Azo kue so angoro mo ayeke bâ kusala ti Jéhovah, ngbanga ti so a yeke mbeni ye so amû mbeto la mbi yeke sara ni na ala.+ 11  “Mo dengi mê na ye so mbi yeke fa na mo laso so.+ Bâ, mbi yeke tomba yongoro na terê ti mo azo ti mara ti Amori, azo ti mara ti Heth, azo ti Périzzi, azo ti Canaan, azo ti Hévi nga na azo ti mara ti Jébus.+ 12  Hange, mo te mbele pëpe na azo ti kodro so mo yeke gue dä so,+ si a ga mbeni kûkû ndali ti mo pëpe.+ 13  Me ala fâ agbalaka ti ala na sese, ala kungbi ayanda ti ala ti tênë nga ala dë na sese ayongoro yanda* ti ala.+ 14  Mo kuku na gbele mbeni nzapa nde pëpe,+ ngbanga ti so Jéhovah ayeke* Nzapa so ahunda ti tene zo amû terê ti lo kue gï na lo oko.* Biani, a hinga lo tongana Nzapa so lo hunda ti tene zo amû terê ti lo kue gï na lo oko.+ 15  Hange, mo te mbele na azo ti kodro ni pëpe ala yeke pusu ande mo ti sara ndumba na anzapa ti ala nga ti mû sandaga na anzapa ni so,+ ambeni ayeke iri ande mo si mo yeke te sandaga ti ala.+ 16  Na pekoni, mo yeke mû ande amolenge ti ala ti wali ti mû na amolenge ti mo ti koli,+ na amolenge ti ala ti wali ni ayeke sara ndumba na anzapa ti ala si ala yeke pusu ande amolenge ti mo ti koli ti sara ndumba na anzapa ti ala ni.+ 17  “Mo leke anzapa ti wen pëpe.+ 18  “Mo sara Matanga ti mapa so a sara na levure pëpe.+ Mo yeke te ande mapa so a sara na levure pëpe, gï tongana ti so mbi mû lani yanga na mo. Mo sara matanga ni so na yâ ti lango mbasambala na ngoi so a fa ni awe na nze ti Abib,+ ngbanga ti so a yeke na nze ti Abib* la mo sigi lani na Égypte. 19  “Akozo molenge-koli kue* ayeke ti mbi,+ na popo ni anyama ti mo kue ayeke dä, atâa akozo molenge-koli ti bagara wala ti taba.+ 20  A lingbi mo mû taba na place ti kozo molenge ti kororo. Me tongana mo mû taba na place ni pëpe, a lingbi mo kungbi go ti lo. Ti akozo molenge ti mo ti koli, a lingbi mo mû mbeni ye na place ti ala.+ Zo aga na gbele mbi maboko senge pëpe. 21  “Mo sara kua lango omene, me na lango mbasambala ni mo wu terê ti mo.*+ Atâa a yeke ngoi ti dengo yaka wala ti kongo lê ti kobe, mo yeke wu terê ti mo. 22  “Mo yeke sara Matanga ti Ayenga na akozo lê ti blé ti mo so abe awe so mo ko ni, na mo yeke sara Matanga ti kongo lê ti kobe* na hunzingo ti ngu ni.+ 23  “Fani ota na yâ ti ngu oko, akoli kue ayeke ga na gbele Jéhovah, tâ Seigneur, Nzapa ti Israël.+ 24  Ndali ti so mbi yeke tomba ande amara na gbele mo,+ na mbi yeke sara si sese ti mo akono. Na ngoi so mo yeke monté na gbele Jéhovah Nzapa ti mo fani ota na yâ ti ngu oko, zo ayeke mû kodro ti mo pëpe. 25  “Mbeni ye so a sara na levure, mo mû ni mo bungbi ni na mênë ti sandaga ti mbi ti yâa na mbi pëpe.+ A lingbi a bata sandaga ti Pâque alango juska na ndapre pëpe.+ 26  “Lê ti kobe so ayeke pendere mingi na popo ti akozo lê ti kobe ti sese ti mo so abe awe, mo ga na ni na da ti Jéhovah Nzapa ti mo.+ “Mo tö molenge ti ngasa na yâ ti ngu ti me ti mama ti lo pëpe.”+ 27  Jéhovah atene na Moïse: “Mo sû atënë so na mbeti,+ ndali ti so a yeke na lege ti atënë ni so la si mbi yeke te mbeni mbele na mo nga na Israël.”+ 28  Lo ngbâ kâ na terê ti Jéhovah lâ 40 na bï 40. Lo te ye pëpe, lo nyon ngu pëpe.+ Lo* sû atënë ti mbele ni na ndö ti lê ti akete tableau ni, aCommandement bale-oko.+ 29  Na pekoni, Moïse adescend na ndö ti Hoto ti Sinaï, akete tableau use ti Témoin ni ayeke na maboko ti lo.+ Na ngoi so lo descend hoto ni, lo hinga pëpe so lê ti lo ayeke su ndali ti so lo na Nzapa asara tënë. 30  Tongana Aaron na azo ti Israël abâ Moïse, ala bâ so lê ti lo asu, na mbeto agbu ala ti ga nduru na lo.+ 31  Me Moïse airi ala. Tongaso, Aaron na amokonzi ni kue na popo ti azo ni aga na terê ti Moïse, na lo sara tënë na ala. 32  Na pekoni azo ti Israël aga nduru na lo, na lo fa na ala acommandement kue so Jéhovah amû na lo na Hoto ti Sinaï.+ 33  Tongana Moïse ahunzi ti sara tënë na ala, lo zia voile na lê ti lo.+ 34  Me tongana Moïse ayeke gue na gbele Jéhovah ti sara tënë na lo, lo yeke zi voile ni na lê ti lo juska lo sigi.+ Na pekoni lo sigi na lo fa na azo ti Israël acommandement so a fa na lo.+ 35  Azo ti Israël abâ so lê ti Moïse asu; tongaso Moïse ayeke zia voile na lê ti lo juska lo lï ti sara tënë na Nzapa.+

Kete tënë

Wala “Nzapa ti grâce.”
Wala “nzobe so angbâ lakue.”
Wala “dutingo be-ta-zo.”
Na Hébreu: “azo so e kpengba go ti e.”
Na Hébreu: “Jéhovah, iri ti lo ayeke.”
Wala “Nzapa so ake ti tene zo avoro ambeni nzapa nde.”
Bâ na B15.
Na Hébreu: “Ye kue so azi lege ti da ti molenge.”
Wala “mo yeke bata sabbat.”
A iri ni nga Matanga ti akpangba (aTabernacle).
A ye ti sara tënë ti Jéhovah. Bâ versê oko.