Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 30:1-38

LI TI ATËNË NI

  • Gbalaka ti zongo dukane (1-10)

  • Dikongo wungo ti azo (11-16)

  • Kota tawa ti cuivre (17-21)

  • Mafuta ti tukungo na li ti zo ti soro lo (22-33)

  • Dukane so ayeke nzoni-kue (34-38)

30  “Mo sara mbeni gbalaka ti ga ndo ti zongo dukane;+ mo yeke sara ni ande na keke ti acacia.+  Mo sara ni carré carré. Yongo ni coudée oko,* largeur ni coudée oko, yongo ni na nduzu coudée use. Adidi ti gbalaka ni nga na gbalaka ni kue ayeke ga gï ye oko.+  Mo mû lor ti nzoni ni mo sara na terê ni kue: na ndö ti yanga ni, na aterê ni nga na terê ti adidi ni; mo mû lor mo leke ni na terê ti ayanga ni angoro ni kue.  Mo yeke sara nga akota bague ti lor use. Mo sara ni na nduzu kete na gbe ti ayanga ti gbalaka ni mbage na mbage, na akota bague ni ayeke bâ ndo lê na lê tongaso si abarre alingbi ti lï na yâ ni ti tene a yô na ni.  Mo sara abarre na keke ti acacia na mo sara lor na terê ni kue.  Mo yeke zia gbalaka ni na devant ti rideau so ayeke nduru na sanduku ti Témoin ni,+ na devant ti yanga ti sanduku ni. A yeke na ndo so la mbi yeke duti dä ti fa terê ti mbi na mo.+  “Aaron+ ayeke zö na ndö ti gbalaka ni+ dukane so afun pendere+ tongaso si guru ni alondo na ndö ti gbalaka ni, na ngoi so lo yeke bâ lege ti alampe ni,+ lakue na ndapre.  Nga, tongana Aaron ayeke za alampe ni na peko ti lindango ti lâ kozoni si ndo avuko,* lo yeke zö ande dukane ni. A yeke mbeni dukane so a yeke zö ni lakue na gbele Jéhovah a londo na ala ti si na ahale ti ala.  Ala zö na ndö ti gbalaka ni pëpe mbeni dukane nde+ wala sandaga so a zö ni agbi kue wala mbeni sandaga ti lê ti kobe; nga ala tuku sandaga ti sämba na ndö ni pëpe. 10  Fani oko na yâ ti ngu oko, Aaron ayeke mû sandaga na ndö ti adidi ti gbalaka ni ti zi sioni ye na terê ni.+ Lo yeke mû mbeni mênë ti nyama ni so a mû na sandaga ndali ti siokpari,+ lo tuku ni na ndö ti adidi ti gbalaka ni ti zi sioni ye na terê ti gbalaka ni. Lo yeke sara ni fani oko na yâ ti ngu oko, a londo na ala ti si na ahale ti ala. A yeke ye so ayeke nzoni kue kue kue na lê ti Jéhovah.” 11  Na pekoni, Jéhovah atene na Moïse: 12  “Na ngoi so mo yeke diko wungo ti amolenge ti Israël+ ti zia iri ti ala na mbeti, zo oko oko ayeke mû mbeni ye na Jéhovah ndali ti fini* ti lo na ngoi so a yeke zia iri ti ala na mbeti, si mbeni ye ti ngangu atï na ndö ti ala pëpe na ngoi so a yeke zia iri ti ala na mbeti. 13  Ye so azo so ayeke gue ti tene a zia iri ti ala na mbeti ayeke mû ni ayeke so: ndambo ti sicle* so a yeke sara kua na ni na ndo so ayeke nzoni-kue.*+ Guérah* 20 alingbi na sicle oko. Matabisi so a yeke mû na Jéhovah ayeke ndambo ti sicle.+ 14  Zo kue so ayeke zia iri ti lo na mbeti, so ngu ti lo alondo na ngu 20 ti gue na ni, lo yeke mû matabisi ni na Jéhovah.+ 15  Na ngoi so ala yeke mû na Jéhovah matabisi ni ndali ti fini* ti ala ti zi siokpari ti ala, zo ti mosoro ayeke mû ni ahon ndambo ti sicle* oko pëpe na wayere ayeke mû na gbe ti ndambo ti sicle oko pëpe. 16  Mo yeke mû na maboko ti azo ti Israël nginza ti argent so ala ga na ni ti tene a zi siokpari ti ala; mo mû ni ndali ti kusala ti tente ti bungbi si a ga mbeni ye ti dango bê na ni na gbele Jéhovah ndali ti azo ti Israël si a zi siokpari ti ala.” 17  Jéhovah akiri atene na Moïse: 18  “Mo sara mbeni kota sembe ti cuivre ndali ti sukulango na ngu,+ mo sara ye ti ziango sembe ni na ndö ni na cuivre; mo zia ni na popo ti tente ti bungbi ni na gbalaka ni na mo tuku ngu na yâ ni.+ 19  Aaron na amolenge ti lo ayeke sukula ande maboko ti ala na gere ti ala na ni na ndo so.+ 20  Na ngoi so ala yeke lï na yâ ti tente ti bungbi wala na ngoi so ala yeke ga nduru na terê ti gbalaka ti sara kusala ti tene ala mû sandaga so a zö na wâ na Jéhovah, ala yeke sukula terê ti ala na ngu ni tongaso si ala kui pëpe. 21  Ala yeke sukula maboko ti ala na gere ti ala si ala kui pëpe, na ye so ayeke ga mbeni ndia so ayeke ngbâ aninga ndali ti ala, so ti tene lo, amolenge ti lo nga na ahale ti ala kue.”+ 22  Jéhovah atene na Moïse: 23  “Na pekoni, mo gi ayombo so ayeke tâ pendere mingi: myrrhe so ngu ni akpengba, sicle 500; ti cinnamome so afun pendere, mo mû ndambo ni, so ti tene sicle 250 nga sosongo so afun pendere, sicle 250, 24  na casse,* sicle 500 ti sicle so a yeke sara kua na ni na ndo so ayeke nzoni-kue,*+ legeoko na hîn* oko ti mafuta ti olive. 25  Na pekoni, mo mû ala mo sara na mbeni mafuta so ayeke nzoni-kue, mafuta ti tukungo na li ti zo ti soro lo; a yeke mélangé ni ande nzoni.*+ A yeke duti mbeni mafuta so ayeke nzoni-kue, so ayeke tuku na li ti zo ti soro lo. 26  “Mo mû ni mo tuku na ndö ti tente ti bungbi+ ni na sanduku ti Témoin ni, 27  table ni na akungba ti terê ni kue, ye ti yongo lampe ni na akungba ti terê ni kue, gbalaka ti zongo dukane ni, 28  gbalaka ti zongo na sandaga na akungba ti terê ni kue, kota sembe ni nga na ye ti ziango kota sembe ni na ndö ni. 29  Mo zia aye so kue nde si aga nzoni kue kue kue.+ Azo kue so ayeke ndu gbalaka ni, a lingbi ala duti nzoni-kue kozoni si.+ 30  Fade mo tuku mafuta na li ti Aaron+ na amolenge ti lo+ ti soro ala, na mo zia ala nde ti sara kua ti prêtre na mbi.+ 31  “Fade mo tene na azo ti Israël: ‘So ayeke mafuta ti tukungo na li ti zo ti soro lo, mbeni mafuta so ayeke nzoni-kue na lê ti mbi, a londo na ala ti si na ahale ti ala.+ 32  A kpaka ni na terê ti zo pëpe, nga ala sara mara ni pëpe. A yeke mbeni ye so ayeke nzoni-kue. A yeke mbeni ye so ayeke ngbâ lakue ti duti ye so ayeke nzoni-kue ndali ti ala. 33  Zo kue so asara mara ti mafuta ni so na lo zia ni na terê ti mbeni zo nde,* fade a fâ lo.’”+ 34  Na pekoni, Jéhovah atene na Moïse: “Mû ayombo so: ngu ti stacté,* onykha, galbanum so afun pendere na vuru dukane so a mélangé ni pëpe. Fade wungo ni oko oko kue alingbi terê.+ 35  Na pekoni, mo bungbi ni kue oko si mo sara na dukane;+ fade a mélangé ni nzoni,* a zia ingo dä,+ a duti tâ ti nzoni ni, mbeni ye so a zia ni nde ndali ti Nzapa. 36  Fade mo mû mbeni mbage ni mo pika ni si aga fuku na mo zia mbeni na gbele sanduku ti Témoin na yâ ti tente ti bungbi, ndo so fade mbi duti dä ti fa terê ti mbi na mo. Fade a duti nzoni kue kue kue na lê ti ala. 37  Dukane so mo yeke sara ni na aye ni so, ala sara mbeni tongaso ti sara na kua ti ala wani pëpe.+ Mo bâ ni tongana mbeni ye so ayeke lakue nzoni-kue na lê ti Jéhovah. 38  Zo kue so asara mara ni ti mä fion ni, fade a fâ lo.”

Kete tënë

Centimètre 44,5 tongaso. Bâ na B14.
Na Hébreu: “na popo ti alakui use.”
Wala “âme.”
Sicle oko ane gramme 11,4. Bâ na B14.
Wala “na lege ti sicle so ayeke nzoni-kue.”
Guérah oko ane gramme 0,57. Bâ na B14.
Wala “a-âme.”
Sicle oko ane gramme 11,4. Bâ na B14.
Keke ti cinnamome wala mbeni ye ti terê ni.
Wala “na lege ti sicle so ayeke nzoni-kue.”
Hîn oko alingbi na litre 3,67. Bâ na B14.
Wala “a sara ni tongana ti zo ti sarango mafuta.”
Na Hébreu: “wande,” so ti tene mbeni zo so ayeke ti sewa ti Aaron pëpe.
Ngu so alondo na yâ ti ambeni keke si ayuru na afun pendere.
Wala “a sara ni tongana ti zo ti sarango mafuta.”