Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 28:1-43

LI TI ATËNË NI

  • Abongo ti aprêtre (1-5)

  • Éphod (6-14)

  • Pectoral (15-30)

    • Urim na Thummim (30)

  • Kota bongo so maboko ni ayeke dä ape (31-35)

  • Turban so a zia plaque ti lor na terê ni (36-39)

  • Ambeni bongo ti aprêtre ni (40-43)

28  “Na popo ti azo ti Israël, mo mû ita ti mo Aaron na amolenge ti lo ti tene ala sara kua ti prêtre na mbi:+ Aaron+ na amolenge ti lo+ Nadab, Abihu,+  Éléazar na Ithamar.+  Mo fü abongo na ita ti mo Aaron ti tene lo sara na kua ti mbi, ti tene a mû na lo gloire nga ti sara si lo duti pendere.+  Mo yeke tene na azo kue so ayeke na kode,* ala so mbi sara si ala si singo na ndara,+ ti tene ala fü abongo ti Aaron ti zia lo nde tongaso si lo sara kua ti prêtre na mbi.  “Abongo so ala yeke fü ni ayeke so: pectoral,+  éphod,+ kota bongo so maboko ni ayeke dä pëpe,+ yongoro bongo so a kpo aye carré carré na terê ni, turban*+ na écharpe.+ Ala fü abongo ti kua so ndali ti ita ti mo Aaron na amolenge ti lo, tongaso si ala sara kua ti prêtre na mbi.  Azo so ahinga ti sara kua ti maboko nzoni ayeke mû lor, kamba ti bleu, kamba ti laine so ayeke violet, kamba ti bengba nga na pendere kamba ti lin si ala fü na ni.  “Ala yeke sara ande éphod ni na lor, kamba ti bleu, kamba ti laine so ayeke violet, kamba ti bengba nga na pendere kamba ti lin so a pe ni pengo. Ala kpo apendere dessin na terê ni.+  A yeke fü ambeni yanga ti bongo use na yanga ti go ti éphod ni ti tingbi ni use kue na terê ti terê.  Ceinture+ so a fü na terê ti éphod ni ayeke ti kanga na ni nzoni. A yeke sara ni na a-oko ye so a sara na éphod ni: lor, kamba ti bleu, kamba ti laine so ayeke violet, kamba ti bengba nga na pendere kamba ti lin so a pe ni pengo.  “Mo yeke mû atênë ti onyx use+ na mo kpaka a-iri ti amolenge ti Israël na ndö ni,+ 10  iri ti ala omene na ndö ti tênë oko na iri ti tanga ti a-omene ni na ndö ti tanga ti tênë ni. Mo sara ni alingbi na molongo ti dungo ala. 11  Zo so ahinga ti kpaka nzoroko na terê ti tênë si ayeke kpaka ande iri ti amolenge ti Israël na ndö ti atênë use so gï tongana ti so lo yeke kpaka iri ti zo na ndö ti ye ti kpongo na nzoroko.+ Mo yeke zia atênë ni na yâ ti amonture ti lor. 12  Mo yeke zia atênë use ni so na ndö ti ayanga ti bongo use so ayeke na ndö ti go ti éphod ni tongana atênë ti dango bê ndali ti amolenge ti Israël.+ Aaron ayeke yô ande iri ti ala na ndö ti ayanga ti abongo use so na gbele Jéhovah tongana mbeni ye ti dango bê na ni. 13  Mo leke amonture ti lor, 14  nga akete chaîne use na lor ti nzoni ni. A yeke pe akete chaîne ni tongana akamba,+ mo kanga akete chaîne ni na terê ti amonture ni.+ 15  “Mo yeke mû zo so ahinga ti kpo bongo pendere ti sara pectoral ti fango ngbanga.+ A yeke sara ni tongana ti éphod ni: a sara ni na lor, kamba ti bleu, kamba ti laine so ayeke violet, kamba ti bengba nga na pendere kamba ti lin so a pe ni pengo.+ 16  Na ngoi so a yeke kiri na ni na ndö ti terê ayeke duti carré, yongo ni alingbi empan oko* na largeur ni alingbi nga empan oko. 17  Mo zia molongo osio ti atênë na ndö ni. Na kozo molongo ni, a yeke wara rubis, topaz na éméraude. 18  Na use molongo ni, turquoise, saphir na jaspe. 19  Na ota molongo ni, tênë ti leshem,* agate, na améthyste. 20  Na osio molongo ni, chrysolite, onyx na jade. A yeke zia ni na yâ ti amonture ti lor. 21  Wungo ti atênë ni ayeke lingbi ande na wungo ti iri ti amolenge 12 ti Israël na a kpaka airi ni na ndö ti atênë ni na kode ti kpongo nzoroko na terê ti aye. Iri oko aye ti sara tënë ti mara oko, ti amara 12 ni. 22  “Mo yeke mû lor ti nzoni ni mo sara na akete chaîne ti pectoral ni. A yeke pe akete chaîne ni tongana akamba.+ 23  Mo sara akota bague use na lor ndali ti pectoral ni, na mo zia akota bague use so na yanga ti pectoral ni use kue. 24  Mo yeke zia akamba use ti lor ni alï na yâ ti akota bague use so ayeke na ayanga ti pectoral ni. 25  Mo yeke yôro ayanga ti akamba use so na yâ ti amonture ni use kue, na mo zia ni na ndö ti ago ti éphod ni, na mbage ti devant. 26  Mo sara akota bague use na lor mo zia ni na ayanga ti pectoral ni use kue, na mbage ti yâ ni, mbage ni so abâ ndo na mbage ti éphod ni.+ 27  Mo yeke sara nga ambeni kota bague use na lor na devant ti éphod ni, na gbe ti ayanga ti bongo use so ayeke na ndö ti go ti éphod ni, na ndö ti ceinture ti éphod ni, nduru na ndo so a tingbi ni dä.+ 28  A yeke mû kamba ti bleu a kanga na akota bague ti pectoral ni na terê ti akota bague ti éphod ni si a gbu nzoni. A sara ni tongaso si pectoral ni angbâ na ndö ti éphod ni, na nduzu kete na ndö ti ceinture so a kpo ni kpongo so. 29  “Tongana Aaron ayeke lï na Ndo so ayeke nzoni-kue, lo yeke yô iri ti amolenge ti Israël so ayeke na ndö ti pectoral ti fango ngbanga, na ndö ti bê ti lo, tongana mbeni ye ti dango bê lakue na lê ti Jéhovah. 30  Mo yeke zia ande Urim na Thummim*+ na yâ ti pectoral ti fango ngbanga ni, na a duti na ndö ti bê ti Aaron na ngoi so lo yeke lï na gbele Jéhovah. Aaron ayeke yô lakue na ndö ti bê ti lo ye so na lege ni si a yeke fâ ngbanga ti azo ti Israël na gbele Jéhovah. 31  “Mo sara kota bongo so maboko ni ayeke dä pëpe ti yü na gbe ti éphod ni, kue na kamba ti bleu.+ 32  A yeke kôro go ti kota bongo ni, na zo ti kpongo bongo ayeke fü yanga ni kue. A lingbi yanga ni aduti tongana yanga ti go ti bongo ti wen, ti tene a suru pëpe. 33  Na yanga ti bongo ni na mbage ti gbe ni, mo leke alê ti keke ti grenade na kamba ti bleu, kamba ti laine so ayeke violet, kamba ti bengba nga mo sara ambeni kete cloche na lor na popo ti alê ti keke ti grenade ni, a ngoro yanga ti bongo ni kue. 34  Mo yeke zia kete cloche ti lor oko, lê ti keke ti grenade oko; kete cloche ti lor oko, lê ti keke ti grenade oko, na angoro ayanga ti kota bongo ni kue. 35  Aaron ayeke yü ni na ngoi so lo yeke sara kua, a lingbi a mä go ti akete cloche ni na terê ti lo na ngoi so lo yeke lï na gbele Jéhovah na yâ ti kubu so ayeke nzoni-kue nga na ngoi so lo yeke sigi na yâ ni, tongaso pëpe lo yeke kui.+ 36  “Mo yeke mû lor ti nzoni ni ti sara na mbeni plaque so aza zango, na mo kpaka mbeti so na ndö ni tongana ti so a yeke kpo anzoroko na terê ti aye, mbeti ni atene: ‘Jéhovah ayeke lo so ayeke nzoni-kue.’+ 37  Mo kanga ni na kamba ti bleu na ndö ti turban ni.+ A duti ti lo na devant ti turban ni. 38  A yeke duti na ndö ti lê ti Aaron, tongana mbeni zo asara siokpari na terê ti aye so a zia ni nde ndali ti Nzapa,+ aye so azo ti Israël azia ni nde tongana ala yeke mû ni na matabisi na Nzapa, Aaron la ayeke yô ngbanga ni. A yeke duti na ndö ti lê ti Aaron lakue, ti sara si ala nzere na lê ti Jéhovah. 39  “Mo leke yongoro bongo so a kpo aye carré carré na terê ni, mo leke ni na pendere lin. Mo sara turban na pendere lin, na mo sara mbeni écharpe so a kpo ni pendere.+ 40  “Mo yeke fü nga ayongoro bongo, écharpe, nga akpoto ndali ti amolenge ti Aaron,+ ti tene ala wara gloire nga ala duti pendere.+ 41  Mo yeke yü ande abongo ni na ita ti mo Aaron nga na amolenge ti lo, na mo tuku mafuta na li ti ala ti soro ala,+ mo zia ala na mbata ti kua*+ na mo zia ala nde ndali ti mbi, na ala yeke sara kua ti aprêtre na mbi. 42  Mo fü nga na ala aculotte ti lin ti kanga terê ti ala so ayeke senge.+ A yo a londo na gbe ti yâ ti ala a si na cuisse ti ala. 43  Aaron na amolenge ti lo ayeke yü ni na ngoi so ala yeke lï na yâ ti tente ti bungbi wala na ngoi so ala yeke ga nduru na terê ti gbalaka ti sara kua na ndo so ayeke nzoni-kue, tongaso pëpe ala yeke sara siokpari na ala yeke kui. Ndia so ayeke ngbâ aninga ndali ti lo na ahale* ti lo.

Kete tënë

Na Hébreu: “bê ti ndara.”
A yeke mbeni bongo so zo ayeke roulé ni na li ti lo tongana kpoto.
So ti tene centimètre 22,2. Bâ na B14.
A yeke mbeni tênë ti ngangu ngere so a hinga ni mbilimbili pëpe.
Na Hébreu: “mo sara si yâ ti maboko ti ala asi.”
Na Hébreu: “ngongoa.”