Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 25:1-40

LI TI ATËNË NI

  • Amatabisi ndali ti tabernacle (1-9)

  • Sanduku ni (10-22)

  • Table ni (23-30)

  • Ye ti yongo lampe ni (31-40)

25  Jéhovah atene na Moïse:  “Tene na azo ti Israël ti mû na mbi matabisi: Ala ro matabisi na maboko ti azo kue so bê ti ala apusu ala ti mû matabisi na mbi.+  Matabisi so ala yeke ro na maboko ti azo ni ayeke so: lor,+ argent,+ cuivre,+  kamba ti bleu, kamba ti laine so ayeke violet, kamba ti bengba,* pendere lin, kuä ti terê ti ngasa,  poro ti terê ti koli-taba so a zia bengba teinture na terê ni, poro ti terê ti phoque,* keke ti acacia,+  mafuta ndali ti alampe,+ mafuta ti keke ti baume ndali ti tukungo ni na li ti zo ti soro lo+ nga ndali ti dukane so afun pendere,+  atênë ti onyx nga na atênë ti ziango na terê ti éphod*+ na pectoral.*+  Ala yeke leke ande mbeni ndo so ayeke nzoni-kue na mbi ti tene mbi duti dä, na mbi yeke sara kodro na popo ti ala.+  Mo leke tabernacle ni na akungba ni kue gï tongana* ti so mbi yeke fa na mo.+ 10  “Ala sara mbeni sanduku na keke ti acacia, longueur ni coudée* use na ndambo, largeur ni coudée use na ndambo, yongo ni na nduzu coudée oko na ndambo.+ 11  Mo mû lor ti nzoni ni, mo sara na terê ni kue,+ na yâ ni nga na peko ni. Mo yeke mû lor mo leke ni pendere pendere na terê ti ayanga ti sanduku ni kue.+ 12  Mo mû lor mo leke na akota bague osio na mo yôro ni na nduzu kete na ndö ti agere ti sanduku ni so ayeke osio, kota bague use na mbage ge, kota bague use na mbage kâ. 13  Mo yeke sara abarre na keke ti acacia na mo sara lor na terê ni kue.+ 14  Mo yôro abarre ni na yâ ti akota bague ni so ayeke na terê ti Sanduku ni ti yô na Sanduku ni. 15  Abarre ni ayeke ngbâ na yâ ti akota bague ti Sanduku ni. Zo azi ni pëpe.+ 16  Mo zia na yâ ti Sanduku ni Témoin so mbi yeke mû ande na mo.+ 17  “Mo mû lor ti nzoni ni mo leke na ye ti kangango na yanga ti Sanduku ni, longueur ni coudée use na ndambo nga largeur ni coudée oko na ndambo.+ 18  Mo leke achérubin use na lor; mo leke ala na marteau si mo zia ala na ndö ti ye ti kangango na yanga ti Sanduku ni. Ala duti na ambage ti yanga ni use kue.+ 19  Mo leke achérubin use na mo zia ala na ndö ti ye ti kangango na ni, oko na mbage ti yanga ni ge, oko na mbage ti yanga ni kâ. 20  Achérubin ni agbara akpangbi* ti ala use kue na mbage ti devant, na akpangbi ni akanga ndö ti ye ti kangango na yanga ti Sanduku ni.+ Ala duti lê na lê. Lê ti ala abâ ndö ti ye ti kangango na yanga ti Sanduku ni. 21  Mo zia ye ti kangango na yanga ti Sanduku ni dä,+ na mo zia na yâ ni Témoin so mbi yeke mû ande na mo. 22  Mbi yeke sigi na ndo so, na ndö ti ye ti kangango na yanga ti Sanduku ni si mbi yeke sara tënë na mo.+ Na popo ti achérubin use so ayeke na ndö ti yanga ti sanduku ti Témoin ni, mbi yeke fa na mo aye kue so a lingbi mo fa na azo ti Israël. 23  “Mo leke nga mbeni table+ na keke ti acacia, longueur ni coudée use, largeur ni coudée oko, yongo ni na nduzu coudée oko na ndambo.+ 24  Mo mû lor ti nzoni ni mo sara na terê ni kue, mo mû lor ni nga mo leke ni pendere pendere na ayanga ni angoro ni kue. 25  Mo yeke mû keke mo leke ni na yanga ti table ni kue; konongo ti lê ti keke ni alingbi na konongo ti lê ti maboko ti zo.* Mo mû nga lor mo leke ni pendere pendere na ayanga ti keke ni, angoro ni kue. 26  Mo leke akota bague osio ti lor, mo zia ni na aplace osio so a tingbi agere ti table ni dä. 27  Mo zia akota bague ni nduru na gbe ti keke so a leke ni na yanga ti table ni kue, si abarre ni alï na yâ ti akota bague ni ti yô na table ni. 28  Mo leke abarre ni na keke ti acacia na mo sara lor na terê ni kue, a yeke yô table ni na ni. 29  “Mo yeke sara nga asembe, akopo, akete ta nga na adû ti sembe ti tene a tuku na sandaga ti sämba. Mo sara ni kue na lor ti nzoni ni.+ 30  Mo yeke zia ande na ndö ti table ni amapa ti ziango ni na gbele mbi, mapa ni so ayeke ngbâ dä lakue.+ 31  “Mo yeke mû ande lor ti nzoni ni ti leke na mbeni ye ti yongo lampe.+ Mo yeke leke ni na marteau. Mo yeke leke gbe ni, gere ni, amaboko ni, afleur ni so asungba awe, ala so angbâ bouton nga na ala so angbâ ti sigi, a bungbi kue a ga gï ye oko.+ 32  Amaboko ti ye ti yongo lampe ni ayeke duti ande omene na terê ni, ota na mbage ge, ota na mbage kâ. 33  Na terê ti maboko ni oko, afleur ayeke na terê ni ota so asungba awe na akpa afleur ti amande. Na terê ti fleur ni oko oko, mbeni fleur so angbâ bouton nga na mbeni so angbâ ti sigi ayeke dä. A yeke tongaso na peko ti terê. Na terê ti mbeni maboko ni so, afleur ota ayeke dä so asungba awe na akpa afleur ti amande. Na terê ti fleur ni oko oko, mbeni fleur ayeke dä so angbâ bouton nga na mbeni so angbâ ti sigi. A yeke tongaso na peko ti terê. A yeke tongaso si amaboko omene ayeke na terê ti ye ti yongo lampe ni. 34  Na terê ti ye ti yongo lampe ni, afleur osio ayeke dä so asungba awe na akpa afleur ti amande. Na terê ti fleur ni oko oko, mbeni fleur ayeke dä so angbâ bouton nga na mbeni so angbâ ti sigi. A yeke tongaso na peko ti terê. 35  Na gbe ti kozo fleur so angbâ bouton, a yeke wara akozo maboko ni so ayeke mbage na mbage. Na gbe ti a-use fleur ni so angbâ bouton, a yeke wara a-use maboko ni so ayeke mbage na mbage. Na gbe ti a-ota fleur so angbâ bouton, a yeke wara a-ota maboko ni so ayeke mbage na mbage; amaboko ni omene kue alondo na terê ti ye ti yongo lampe ni si asigi. 36  Afleur ni so angbâ bouton so, amaboko ni nga na ye ti yongo lampe ni kue abungbi aga gï ye oko so a sara na lor ti nzoni ni, a leke ni na marteau.+ 37  Mo yeke leke ande alampe mbasambala ndali ni, tongana a za wâ na alampe ni, a yeke za na mbage ti devant.+ 38  A yeke leke aye ti mingongo na wâ* ni nga na ata ti wâ ni na lor ti nzoni ni.+ 39  A lingbi a mû talent* oko ti lor ti nzoni ni si a leke na ni nga na akungba ni so kue. 40  Bâ nzoni si mo sara ni alingbi gï na* tapande ti aye so mbi fa na mo lani na ndö ti hoto so.+

Kete tënë

A mû mbeni ye ti terê ti kete nyama so a iri lo cochenille la a sara na terê ti kamba ni si abe.
A yeke mbeni nyama so ayeke na yâ ti ngu.
A yeke bongo so zo ayeke yü na ngoi so lo ye ti sara kua si saleté andu nzoni bongo ti lo pëpe.
A yeke mbeni kete bozo so a brodé ni brodengo si Kota Prêtre ayeke yü ni na ndö ti kate ti lo.
Wala “akpa gï.”
Coudée oko alingbi na centimètre 44,5. Bâ na B14.
Wala “a-aile.”
A yo centimètre 7,4. Bâ na B14.
Wala “apince ti gbotongo na mèche ti lampe.”
Talent oko ane kilo 34,2. Bâ na B14.
Wala “akpa gï.”