Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 23:1-33

LI TI ATËNË NI

  • Ambela ndali ti Israël (1-19)

    • Sarango ye mbilimbili (1-9)

    • Asabbat na amatanga (10-19)

  • Ange afa lege na Israël (20-26)

  • Warango sese nga na ayanga ti sese ni (27-33)

23  “Mo kangbi tënë ti mvene pëpe.+ Mo sara beoko na zo ti sioni pëpe ti ga témoin ti atënë ti mvene.+  Mo mû pëpe peko ti azo mingi mingi ti sara ye ti sioni. Mo ba yâ ti ngbanga ti mbilimbili pëpe na yengo da na mbeni tënë gï ngbanga ti so azo mingi ayeda na ni.  Tongana tënë ayeke na popo ti wayere na mbeni zo, mo mû mbage ti wayere ni pëpe gï ngbanga ti so lo yeke wayere.+  “Tongana mo tingbi na bagara ti wato ti mo wala kororo ti lo so agirisa, a lingbi mo kiri na ni na lo.+  Tongana mo bâ so kororo ti mbeni zo so bê ti lo ake mo alango na sese na gbe ti kungba ti lo, mo bâ lo bango mo hon pëpe. Mo mû maboko na lo ti zi kororo ni na gbe ti kungba ni.+  “Mo ba yâ ti ngbanga ti wayere na gbele ngbanga pëpe.+  “Yôro terê ti mo pëpe na yâ ti tënë ti mvene so a bi na li ti mbeni zo, zo so tënë ayeke na li ti lo pëpe wala zo ti mbilimbili mo fâ lo pëpe, ndali ti mbi yeke tene pëpe so zo ti sioni ayeke zo ti mbilimbili.*+  “Mo mû goro pëpe, ngbanga ti so goro ayeke sara si azo abâ pëpe ye so ayeke na lege ni. A yeke buba yâ ti tënë ti yanga ti azo ti mbilimbili.+  “Mo sara pasi pëpe na wande so ayeke na kodro ti mo. Ala wani ala hinga ye so a iri ni dutingo wande, ngbanga ti so ala nga ayeke lani awande na kodro ti Égypte.+ 10  “Na yâ ti ngu omene kue, mo lu ngongoa ti kobe na mo bungbi alê ti kobe ni.+ 11  Me na ngu mbasambala ni mo dë yaka ni pëpe, mo zia sese ni awu terê ti lo, si awayere so ayeke na popo ti azo ti mo awara mbeni ye ti te. Tanga ni so angbâ na peko ti ala, anyama ti ngonda ayeke te ni. Mo sara tongaso na yaka ti vigne ti mo nga na yaka ti akeke ti olive ti mo. 12  “Mo sara kua ti mo na yâ ti lango omene kue. Me na lango mbasambala ni mo sara ngangu kua pëpe, tongaso si bagara ti mo na kororo ti mo awu terê ti ala, si molenge ti ngbâa ti mo ti wali nga na wande awu terê ti ala nga.+ 13  “Ala bâ si ala sara ye alingbi na aye kue so mbi sara tënë ni na ala so.+ A lingbi ala di iri ti ambeni nzapa nde pëpe. A mä airi ni so na yanga ti mo pëpe.+ 14  “Fani ota na yâ ti ngu oko, mo sara mbeni matanga na mbi.+ 15  Mo yeke sara ande Matanga ti mapa so a sara na levure pëpe.+ Lango mbasambala mo yeke te mapa so a sara na levure pëpe, gï tongana ti so mbi mû lani yanga na mo ti sara, na ngoi so a fa ni awe na nze ti Abib,*+ ngbanga ti so a yeke na nze ni so la si mo sigi lani na Égypte. Zo aga na gbele mbi maboko senge pëpe.+ 16  Mo sara nga Matanga ti fango akozo lê ti kobe ti yaka*+ ti mo so abe awe, akozo lê ti kobe ti ngangu kua ti mo. Mo sara Matanga ti kongo lê ti kobe* na hunzingo ti ngu ni, na ngoi so mo yeke bungbi akobe ti ngangu kua so mo sara na yaka.+ 17  Fani ota na yâ ti ngu oko, akoli kue ayeke ga na gbele Jéhovah, tâ Seigneur.+ 18  “Mbeni ye so a sara na levure, mo mû ni mo bungbi ni na mênë ti sandaga ti mbi ti yâa na mbi pëpe. Asandaga ti mafuta ti anyama so mo yeke yâa na mbi na ngoi ti amatanga ti mbi, a lingbi a ngbâ a lango juska na ndapre pëpe. 19  “Lê ti kobe so ayeke pendere mingi na popo ti akozo lê ti kobe ti yaka ti mo so abe awe la mo yeke mû ni ti ga na ni na da ti Jéhovah Nzapa ti mo.+ “Mo tö molenge ti ngasa na yâ ti ngu ti me ti mama ti lo pëpe.+ 20  “Mbi yeke tokua mbeni ange na devant ti mo+ ti bata mo na lege, nga ti gue na mo na ndo so mbi leke awe.+ 21  Ala dengi mê na lo nga ala mä yanga ti lo. Ala sara kpengba-li na lo pëpe ngbanga ti so lo yeke pardonné akengo ndia ti ala pëpe,+ ndali ti so lo yeke sara kua na iri ti mbi. 22  Me tongana ala mä yanga ti lo na yâ ti aye kue na ala sara aye kue so mbi tene, mbi yeke ke awato ti ala na mbi yeke ke azo so ake ala. 23  Ange ti mbi ayeke gue ande na devant ti mo na lo yeke gue na mo na azo ti mara ti Amori, azo ti mara ti Heth, azo ti Périzzi, azo ti Canaan, azo ti Hévi nga na azo ti mara ti Jébus, fade mbi hunzi ala kue kue kue.+ 24  Mo kuku na gbe ti anzapa ti ala pëpe, wala mo zia mbeni ye ahanda mo ti voro ala pëpe nga mo sara aye so ala yeke sara so pëpe.+ Me mo futi anzapa ni so nga mo fâ yâ ti ayanda ti ala ti tênë.+ 25  A lingbi ala voro Jéhovah Nzapa ti ala,+ na fade lo sara tufa na ndö ti kobe ti ala na ngu ti ala.+ Mbi yeke sara si kobela ahon yongoro na ala.+ 26  A yeke wara na yâ ti kodro ti mo pëpe wali so yâ ti lo abuba, wala wali so ayeke ngombo.+ Fade mbi sara si lâ ti mo awu mingi.* 27  “Kozo si mo si, ala yeke mä tënë ti mbi na ala yeke dö na mbeto,+ mbi yeke sara si li ti amara kue so mo yeke tingbi na ala aga kirikiri. Mbi yeke sara si awato ti mo akpe na gbele mo.*+ 28  Mbi yeke bi tomboka na popo ti ala* kozoni si mo si+ na azo ti Hévi, azo ti Canaan, azo ti mara ti Heth ayeke kpe yongoro na mo.+ 29  Gï na yâ ti ngu oko la mbi yeke tomba ala pëpe, tongana mbi sara tongaso fade kodro ni abuba kue nga fade anyama ti ngonda adü mingi na ndo ni so ti sara sioni na ala.+ 30  Mbi yeke tomba ala yeke yeke yongoro na mo, juska azo ti mo aga gbani si ala mû kodro ni si aga ye ti ala.+ 31  “Mbi yeke zia yanga ti sese ti ndo ti mo a londo na Kota Ngu-Bengba ti si na ngu-ingo ti aPhilistin, a londo na benyama ti si na Ngu ti Euphrate.+ Mbi yeke zia azo ti kodro so na maboko ti ala na ala yeke tomba azo ni so yongoro.+ 32  Mo te mbele na ala pëpe wala na anzapa ti ala pëpe.+ 33  Mo zia ala sara kodro na yâ ti kodro ti mo pëpe, tongana mo sara tongaso ala lingbi ti pusu mo ti sara siokpari na terê ti mbi. Tongana mo voro anzapa ti ala, a yeke ga biani kûkû ndali ti mo.”+

Kete tënë

Wala “mbi yeke zi tënë na li ti zo ti sioni pëpe.”
Bâ na B15.
A iri ni nga Matanga ti ayenga, wala ti Pentecôte.
A iri ni nga Matanga ti akpangba (aTabernacle).
Wala “Fade mbi sara si wungo ti alango ti mo aga mingi.”
Wala “Mbi yeke sara si awato ti mo atourné peko ti ala na mo ti kpe.”
A lingbi nga ti tene “Mbi yeke sara si li ti ala aga kirikiri; Mbi yeke bi kota mbeto na popo ti ala.”