Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 2:1-25

LI TI ATËNË NI

  • Dungo Moïse (1-4)

  • Molenge ti Pharaon ti wali amû Moïse abata lo (5-10)

  • Moïse akpe ague na Madian na lo mû Zipporah (11-22)

  • Nzapa amä dema ti azo ti Israël (23-25)

2  Na ndembe ni so, mbeni koli ti mara ti Lévi asara mariage na mbeni wali ti mara ti Lévi ni.+  Wali ni amû ngo na lo dü molenge-koli. Tongana lo bâ so molenge ni ayeke pendere mingi, lo honde lo nze ota.+  Tongana lo peut ti honde lo encore ape,+ lo mû mbeni sakpa so a sara na papyrus,* lo collé adû ti terê ni na goudron lo zia molenge ni na yâ ni; lo zia sakpa ni na yâ ti asosongo, na yanga ti Ngu ti Nil.  Me, ita ti lo ti wali+ aluti yongoro ti bâ ye so ayeke si na molenge ni.  Na pekoni, molenge ti Pharaon ti wali ague ti sukula terê ti lo na Ngu ti Nil, awali so ayeke azo ti kua ti lo ayeke tambela na terê ti ngu ni. Lê ti molenge ti Pharaon atï na ndö ti sakpa ni so ayeke na yâ ti asosongo so. Hio, lo tokua ngbâa ti lo ti wali ti gue ti mû sakpa ni.+  Tongana lo zi yanga ni, lo bâ molenge ni, na bâ, molenge ni ayeke toto. Mawa ti molenge ni asara lo, me lo tene: “So mbeni molenge ti aHébreu la.”  Na pekoni, ita ti molenge ni ti wali atene na molenge ti Pharaon ni, lo tene: “Mo ye mbi gue mbi iri na mo mbeni wali Hébreu so ayeke zo ti batango amolenge si lo mû me na molenge ni na mo?”  Molenge ti Pharaon ni atene na lo: “Gue!” Hio maseka ni ague airi mama ti molenge ni.+  Molenge ti Pharaon ni atene na lo: “Mû molenge so mo gue mo mû me na lo na mbi, mbi yeke futa mo.” Tongaso, wali ni amû molenge ni si lo mû me na lo. 10  Tongana molenge ni akono, lo gue na lo na molenge ti Pharaon na lo ga molenge ti lo.+ Lo zia iri ti molenge ni Moïse* na lo tene: “A yeke ngbanga ti so mbi zi lo na yâ ti ngu.”+ 11  Tongana Moïse aga koli awe, lo gue na mbage ti aita ti lo ti bâ angangu kua so a yeke forcé ala ti sara ni.+ Lê ti lo atï na ndö ti mbeni zo ti Égypte so ayeke pika mbeni Hébreu, ita ti lo. 12  Lo bâ ndo mbage na mbage, lo bâ zo pëpe. Tongaso, lo fâ zo ti Égypte ni na lo honde lo na yâ ti mbutu.+ 13  Me na ndade ni, lo kiri lo ga, na bâ, akoli Hébreu use ayeke tiri. Tongaso, lo tene na lo so ayeke na faute so, lo tene: “Mo pika mba ti mo ni ngbanga ti nyen?”+ 14  Lo kiri tënë na lo, lo tene: “Zo wa la azia mo mokonzi nga juge na ndö ti e zo wa? Mo ye ti fâ mbi tongana ti so mo fâ na zo ti Égypte so?”+ Tongaso, mbeto agbu Moïse si lo tene: “Biani, a hinga tënë ti ye so mbi sara so awe!” 15  Na pekoni, Pharaon amä tënë ti ye so Moïse asara so, na lo gi lo ti fâ lo; me Moïse alondo na ndo ti Pharaon lo kpe lo gue ti sara kodro na sese ti Madian;+ kâ lo duti na terê ti mbeni dû ti ngu. 16  Me prêtre ti kodro ti Madian+ ayeke na amolenge-wali mbasambala, na ala ga ti tö ngu ti tuku na yâ ti ando ti nyongo ngu ti anyama ti tene anyama ti babâ ti ala anyon ni. 17  Me lakue aberger ayeke ga na ayeke tomba ala. Me ti so ni so, Moïse alondo na lo mû maboko na awali ni* na lo mû ngu na anyama ni anyon. 18  Tongana ala si na yanga-da ti babâ ti ala Réuel,*+ li ti lo akpe si lo tene: “Nyen la apassé si ala kiri laso na yanga-da hio tongaso so?” 19  Ala tene na lo: “Mbeni zo ti Égypte+ la azi e na maboko ti aberger ni, lo tö même ngu na e nga lo mû ngu na anyama ni ala nyon.” 20  Lo hunda amolenge ti lo, lo tene: “Me lo yeke na ndo wa? Ala zia koli so angbâ kâ ngbanga ti nyen? Ala iri lo, lo ga lo te ye na e.” 21  Moïse ayeda ti sara kodro na ndo ti koli so, na koli ni amû molenge ti lo ti wali Zipporah+ na Moïse. 22  Na pekoni, Zipporah adü molenge ti koli, na Moïse azia iri ti lo Guershom,*+ ngbanga ti so lo tene: “Mbi yeke gene na kodro-wande.”+ 23  Angu mingi na pekoni, gbia ti Égypte akui,+ me azo ti Israël angbâ ti dema ngbanga ti so a sara ala na ngbâa na ala ngbâ ti toto ti dema terê ti ala. Ala toto ti hunda ti tene a mû maboko na ala ndali ti so a sara ala ngbâa, na toto ti ala ni ayeke gue lakue na mbage ti tâ Nzapa.+ 24  Tongana ngoi ayeke hon, Nzapa amä dema ti ala,+ si lo dabe ti lo na mbele ti lo so lo te na Abraham, Isaac na Jacob.+ 25  Ni la, Nzapa abâ ndo na mbage ti azo ti Israël na lo bi bê ti lo na ala.

Kete tënë

Wala “sanduku so a leke ni na sosongo.”
Ndani aye ti tene “A zi lo na gigi,” so ti tene a sö lo na yâ ti ngu.
Wala “lo gbu koko ti awali ni.”
So ti tene Jéthro.
Ndani aye ti tene “Wande so asara kodro kâ.”