Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 18:1-27

LI TI ATËNË NI

  • Jéthro na Zipporah aga (1-12)

  • Jéthro amû wango ti tene a zia ajuge (13-27)

18  Jéthro, prêtre ti kodro ti Madian, kogara ti Moïse,+ amä tënë ti aye kue so Nzapa asara lani na Moïse nga na Israël mara ti lo, lo mä tongana nyen Jéhovah asigi na Israël na Égypte.+  Moïse atene lani na wali ti lo Zipporah ti gue na ndo ti kogara ti lo Jéthro. Jéthro ayamba Zipporah wali ti Moïse na ndo ti lo,  lo yamba Zipporah na amolenge ti lo use kue.+ Moïse azia iri ti mbeni molenge ni oko Guershom,*+ ngbanga ti so Moïse atene: “Mbi yeke gene na kodro-wande.”  Lo zia iri ti mbeni Éliézer,* ngbanga ti so lo tene: “Nzapa ti babâ ti mbi ayeke zo so amû maboko na mbi na lege so lo zi mbi na yanga ti épée ti Pharaon.”+  Tongaso Jéthro, kogara ti Moïse, na amolenge ti Moïse na wali ti lo ague awara Moïse na yâ ti benyama, ndo so lo sara camp dä na hoto ti tâ Nzapa.+  Lo tokua yanga na Moïse, lo tene: “Mbi Jéthro, kogara ti mo+ la mbi ga na mo ge so; mbi ga na mo wali ti mo na amolenge ti mo use kue.”  Hio, Moïse asigi ti tingbi na kogara ti lo, lo kuku na gbe ti lo na pekoni lo su ngbangba ti lo. Ala hunda mba ti hinga wala zo oko oko ayeke nzoni. Na pekoni ala lï na yâ ti tente.  Moïse afa na kogara ti lo aye kue so Jéhovah asara na Pharaon nga na azo ti Égypte ndali ti Israël.+ Lo fa na lo aye ti ngangu kue so asi na ala na lege+ nga tongana nyen Jéhovah azi ala na yâ ni.  Tongaso bê ti Jéthro anzere ndali ti anzoni ye kue so Jéhovah asara na Israël na lege so lo zi ala na Égypte.* 10  Na pekoni, Jéthro atene: “Zia a sepela Jéhovah, lo so azi ala na Égypte nga na maboko ti Pharaon, na lo so azi azo ni na gbe ti komandema ti azo ti Égypte. 11  Fadeso mbi hinga so Jéhovah ayeke kota ahon tanga ti anzapa kue,+ ndali ti ye so lo sara na azo so asara ye na fandara na terê ti azo ti lo.” 12  Na pekoni, Jéthro, kogara ti Moïse, aga na sandaga so a zö ni agbi kue nga na ambeni sandaga na Nzapa. Aaron nga na a-ancien ti Israël kue aga ti te kobe legeoko na kogara ti Moïse, na gbele tâ Nzapa. 13  Na ndade ni Moïse aduti, tongana ti so lo yeke sara ka, ti fâ ngbanga ti azo ni, na azo ni ayeke luti na gbele Moïse ti londo na ndapre juska na lakui. 14  Tongana kogara ti Moïse abâ aye so kue Moïse ayeke sara ndali ti azo ni, lo tene: “Kua ti nyen la si mo yeke sara ndali ti azo ni so? Ndali ti nyen gï mo oko la mo duti ti fâ ngbanga, na azo ni kue ayeke luti gï na gbele mo a londo na ndapre juska na lakui so?” 15  Moïse atene na kogara ti lo: “A yeke ndali ti so azo ni angbâ ti ga gï gango na mbi ti hunda tënë na Nzapa. 16  Tongana mbeni tënë alondo, a yeke ga na ni na mbi tongaso si mbi fâ ngbanga na popo ti azo ni, na mbi fa na ala adesizion ti tâ Nzapa nga na andia ti lo.”+ 17  Kogara ti Moïse atene na lo: “So nzoni lege ti sarango ni la pëpe. 18  Biani mo yeke fatigué ande, azo so ayeke na terê ti mo so nga kue ayeke fatigué, kua ni ane mingi na ndö ti mo. Mo oko mo lingbi ti sara ni pëpe. 19  Ni la, mo mä mbi si. Mbi ye ti mû na mo mbeni wango, fade Nzapa aduti na mo.+ Mo la mo yeke sara kua na iri ti azo ni na gbele tâ Nzapa,+ mo la mo yeke mû atënë ti ala ti gue na ni na gbele tâ Nzapa.+ 20  Mo la mo yeke fa na ala ambela ti Nzapa nga na andia ti lo,+ mo la mo yeke fa na ala lege so ala doit ti tambela dä nga na aye so ala doit ti sara. 21  Me mo soro na popo ti azo ni kue akoli so alingbi,+ so akpe mbeto ti Nzapa, so zo azia bê kue na ndö ti ala, ala so ake ye ti likisi.+ Mo zia ala na ndö ti azo ni tongana amokonzi, ambeni ti komande azo ahon saki oko, ambeni ti komande azo ahon ngbangbo oko, ambeni ti komande azo ahon bale-oku nga ambeni ti komande azo ahon bale-oko.+ 22  Tongana tënë alondo,* ala la adoit ti fâ ngbanga ti azo ni. Akota tënë ala ga na ni na mo,+ me akete kete tënë, ala la ayeke fâ ngbanga ni. Sara si kua ni ayapu na mo na zia ala yô mbeni kungba ni na mo.+ 23  Tongana mo sara ye so, na tongana Nzapa la amû yanga na mo ti sara ni, mo yeke gbu lê ni ande, nga azo ni so kue ayeke kiri na ndo ti ala na ngia.” 24  Moïse amä yanga ti kogara ti lo na lo sara aye kue so lo tene. 25  Moïse asoro akoli so alingbi, na popo ti azo ti Israël kue, na lo mû na ala akua: lo zia ala na ndö ti azo ni tongana amokonzi, ambeni ti komande azo ahon saki oko, ambeni ti komande azo ahon ngbangbo oko, ambeni ti komande azo ahon bale-oku nga ambeni ti komande azo ahon bale-oko. 26  Tongana tënë alondo, ala la ayeke fâ ngbanga na ndö ni. Akota tënë ala yeke ga na ni na Moïse,+ me akete kete tënë, ala wani la ayeke fâ ngbanga na ndö ni. 27  Na pekoni, Moïse azia kogara ti lo na lege,+ si Jéthro akiri na kodro ti lo.

Kete tënë

Ndani aye ti tene “Mbeni wande so asara kodro kâ.”
Ndani aye ti tene “Nzapa ti mbi ayeke zo ti mungo maboko.”
Na Hébreu: “na maboko ti Égypte.”
Na Hébreu: “Na ngoi kue.”