Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 16:1-36

LI TI ATËNË NI

  • Azo akasa ndo ndali ti kobe (1-3)

  • Jéhovah amä kasango ndo ni (4-12)

  • Nzapa amû adodoro nga na manne (13-21)

  • Manne atï na lâ ti Sabbat ape (22-30)

  • A bata mbeni manne ni ti dabe na ni (31-36)

16  Na peko ti so azo ti Israël kue alondo na Élim ala hon, ala si na benyama ti Sîn,+ so ayeke na popo ti Élim na Sinaï. A yeke na lango 15 ti use nze ni na peko ti so ala sigi na kodro ti Égypte.  Azo ti Israël kue akomanse ti kasa Moïse na Aaron na yâ ti benyama.+  Azo ti Israël atene na Moïse na Aaron: “Ahon tënë e kui fade na maboko ti Jéhovah na kodro ti Égypte tongana e yeke duti lani na terê ti ata ti nyama,+ tongana e yeke te lani mapa alingbi na e. Me ala ga na e na yâ ti benyama so ti tene nzara afâ bungbi ti azo so kue.”+  Na pekoni, Jéhovah atene na Moïse: “Bâ, mbi yeke sara si mapa alondo na yayu atï tongana ngu-nzapa ndali ti ala.+ A lingbi zo oko oko asigi ti ro so alingbi na lo lâ oko oko,+ tongaso si mbi tara bê ti ala ti bâ wala ala yeke bata ndia ti mbi wala pëpe.+  Me na lango omene ni,+ tongana ala leke kobe so ala ro, fade ti so ni so ala yeke ro ka lango oko oko so, ala yeke ro ni fani use.”+  Tongaso, Moïse na Aaron atene na azo ti Israël kue: “Na lakui, ala yeke hinga biani so a yeke Jéhovah la asigi na ala na kodro ti Égypte.+  Na ndapre ala yeke bâ ande gloire ti Jéhovah, ngbanga ti so Jéhovah amä kasango ndo so ala yeke kasa na lo so awe. E yeke ti e azo wa si ala yeke kasa e so?”  Moïse akiri atene: “Tongana Jéhovah amû na ala nyama ti te na lakui nga lo mû na ala mapa na ndapre alingbi na nzara ti ala, ala yeke bâ ande so Jéhovah amä kasango ndo ti ala so ala yeke kasa na lo so awe. Me e, e yeke ti e azo wa? A yeke e la si ala yeke kasa e so pëpe, me Jéhovah la ala yeke kasa lo so.”+  Moïse atene na Aaron: “Tene na azo ti Israël ni kue: ‘Ala ga na gbele Jéhovah, ngbanga ti so lo mä kasango ndo ti ala ni awe.’”+ 10  Gï so Aaron asara tënë na azo ti Israël ni kue awe, ala tourné lê ti ala na mbage ti benyama, mo ye ti bâ, gloire ti Jéhovah asi na yâ ti mbinda ni.+ 11  Jéhovah akiri atene na Moïse, atene: 12  “Mbi mä kasango ndo ti azo ti Israël awe.+ Tene na ala, mo tene: ‘Na peko ti lindango ti lâ kozoni si ndo avuko,* ala yeke te ande nyama nga na ndapre ala yeke te mapa alingbi na nzara ti ala;+ ala yeke hinga so mbi Jéhovah Nzapa ti ala la.’”+ 13  Tongaso, na lakui adodoro aga amû yâ ti camp ni kue;+ na ndapre ambeni ye tongana ngu ti pere atï na sese angoro camp ni kue. 14  Tongana angu ni so ahule awe, ambeni kete kete ye ayeke na lê ti sese ti benyama ni, a yeke fuku fuku tongaso;+ a yeke kete kete tongana afuku ti glason na ndö ti sese ni. 15  Tongana azo ti Israël abâ ni, ala tene na mba: “So nyen la?” Ala hinga ye ni so pëpe. Moïse atene na ala: “A yeke mapa so Jéhovah amû na ala ti ga kobe ti ala.+ 16  Jéhovah atene: ‘Fade zo oko oko aro so alingbi na lo. Zo oko oko ayeke ro omer oko*+ alingbi na wungo ti azo* so ayeke na yâ ti tente ti lo.’” 17  Azo ti Israël asara tongana ti so a hunda. Ala yeke ro ni, ambeni aro gbani na ambeni aro kete. 18  Tongana ala yeke haka ni na omer, lo so aro gbani awara ahon ndö ni pëpe; lo so aro kete so, ti lo amanke pëpe.+ Ala ro ni alingbi na ti so zo oko oko alingbi ti te. 19  Na pekoni Moïse atene na ala: “Zo oko abata mbeni juska na ndapre pëpe.”+ 20  Me ala mä Moïse pëpe. Tongana ambeni zo abata mbeni juska na ndapre, angusu adü dä na a fun, na bê ti Moïse ason na terê ti ala. 21  Ala ro ni lakue na ndapre, zo oko oko aro ni alingbi na ti so lo lingbi ti te. Tongana lâ asu ngangu, a ga ngu. 22  Na lango omene ni, zo oko oko aro mapa ni fani use,+ so ti tene zo oko aro omer use. Tongaso amokonzi kue ti bungbi ti azo ni aga asara tënë ni na Moïse. 23  Moïse atene na ala: “Tënë so Jéhovah atene la. Kekereke ayeke lango ti wungo terê,* mbeni sabbat so ayeke nzoni-kue ndali ti Jéhovah.+ Ala zö ye so ala lingbi ti zö ni, ala tö ye so ala lingbi ti tö ni,+ na ye so angbâ ala bata ni juska na ndapre.” 24  Tongaso ala bata ni juska na ndapre alingbi na yanga so Moïse amû, a fun pëpe nga angusu adü dä pëpe. 25  Ni la, Moïse atene: “Ala te ni laso, ngbanga ti so lango ti laso ayeke sabbat ndali ti Jéhovah. Laso, ala yeke wara ande ni na sese pëpe. 26  Ala yeke ro ni alango omene, me lango mbasambala ni ayeke Sabbat,+ a yeke duti ande dä pëpe.” 27  Ye oko, a si na lango mbasambala ni, ambeni asigi ti ro ni, me ala wara ye oko pëpe. 28  Tongaso, Jéhovah atene na Moïse: “Ala yeke ngbâ ti ke ti bata acommandement ti mbi nga na andia ti mbi juska lawa?+ 29  Zia ala hinga so Jéhovah amû na ala Sabbat.+ Ndani la si na lango omene ni lo mû na ala mapa ti lango use. Zia zo oko oko kue angbâ na ndo ti lo. Zia mbeni zo asigi na ndo ti lo na lango mbasambala ni pëpe.” 30  Tongaso azo ni abata lango ti Sabbat* na lango mbasambala ni.+ 31  Azo ti Israël azia iri ni “manne.”* A yeke vuru vuru tongana lê ti coriandre,* na a nzere tongana akpangbala gâteau so a sara ni na mafuta ti otoro.+ 32  Na pekoni, Moïse atene: “Jéhovah atene: ‘Ala fû mbeni manne ni asi omer oko ala bata ni ndali ti ahale ti ala na yâ ti angoi nde nde so ayeke ga,+ tongaso si ahale ti ala abâ mapa so mbi mû na ala ti te na yâ ti benyama na ngoi so mbi yeke sigi na ala lani na kodro ti Égypte.’” 33  Tongaso, Moïse atene na Aaron: “Mû mbeni ta mo zia omer oko ti manne na yâ ni, mo zia ni na gbele Jéhovah tongana mbeni ye so a lingbi a bata ni ndali ti ahale ti ala na yâ ti angoi nde nde so ayeke ga.”+ 34  Tongana ti so Jéhovah amû yanga lani na Moïse, Aaron azia ni na gbele mbeni sanduku,*+ si a bata ni. 35  Azo ti Israël ate manne ngu 40,+ juska ala si na sese so azo asara kodro dä.+ Ala te manne juska ala si na yanga ti sese ti kodro ti Canaan.+ 36  Tongana a mû omer oko, a lingbi na dixième ti épha.*

Kete tënë

Na Hébreu: “Na popo ti alakui use.”
Litre 2,2 tongaso. Bâ na B14.
Wala “a-âme.”
Wala “lango ti batango sabbat.”
Wala “Wungo terê.”
Na Hébreu tënë so aye peut-être ti tene: “So nyen la?”
Coriandre ayeke mbeni keke so a lu ni na so lê ni ayeke vuru vuru.
Na Hébreu: “Témoin.” Na bango ni a ye ti sara tënë ti sanduku ti mbele.
Épha oko ayeke litre 22. Bâ na B14.