Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 15:1-27

LI TI ATËNË NI

  • Bia ti songo benda so Moïse na azo ti Israël ahe ni (1-19)

  • Miriam ahe nga ti lo mbeni bia ni (20, 21)

  • Ngu so ase sengo aga nzoni ngu (22-27)

15  Na ngoi ni so, Moïse na azo ti Israël ahe bia so na Jéhovah:+ “Zia mbi he bia na Jéhovah, ngbanga ti songo benda so amû na lo kota gloire.+ Lo bi mbarata na zo ti kpengo na mbarata ni na yâ ti ngu-ingo.+   Jah* ayeke ngangu ti mbi, ndali ti so lo ga salut ti mbi.+ Lo yeke Nzapa ti mbi, fade mbi sepela lo.+ Lo yeke Nzapa ti babâ ti mbi,+ fade mbi gonda lo.+   Jéhovah ayeke ngangu zo ti bira.+ Iri ti lo ayeke Jéhovah.+   Lo bi apuse ti mbarata ti Pharaon na aturugu ti lo na yâ ti ngu-ingo,+ lo sara si Kota Ngu-Bengba amene akpengba turugu ti Pharaon.+   Angu so ayeke sua na ngangu amene ala. Ala lï ngu ala descend na gbe ni kâ tongana tênë.+   Jéhovah, maboko ti mo ti koli ayeke ngangu,+ Jéhovah, maboko ti mo ti koli alingbi ti fâ yâ ti wato kete kete.   So mo yeke tâ kota mingi, mo lingbi ti kinda ala so alondo ti ke mo;+ mo tokua ngonzo ti mo so ayeke tongana wâ si agbi ala tongana pere.*   Pupu ti hôn ti mo asara si angu abungbi na ndö ti terê. Angu ni aluti tongana gbagba so akanga lege na ngu. Angu so ayeke sua aga akpengba na bê ti ngu-ingo.   Wato ni atene: ‘Mbi yeke tomba peko ti ala! Mbi yeke wara ala! Mbi yeke kangbi yâ ti akungba ti ala so mbi gbu na bira juska alingbi na nzara ti mbi!* Mbi yeke gboto épée ti mbi! Mbi yeke hon ala na ngangu!’+ 10  Mo hûru pupu ti hôn ti mo, ngu-ingo amene ala.+ Ala lï ngu tongana plomb na yâ ti angu so ayeke sua. 11  Jéhovah! Nzapa wa na popo ti anzapa ayeke tongana mo?+ Zo wa ayeke tongana mo? mo so mo yeke nzoni kue kue kue so?+ Mo so a lingbi a kpe mbeto ti mo na a sepela mo, mo so mo sara aye ti kpene.+ 12  Mo yôro maboko ti mo ti koli, na sese amene ala kue.+ 13  Na lege ti tâ ndoye so mo yeke na ni, mo fa lege na azo so mo zi ala.+ Na lege ti ngangu ti mo, fade mo fa lege na ala ti gue na ala na ndo ti duti ti mo so ayeke nzoni-kue. 14  Azo ayeke mä tënë ni,+ ala yeke dö na mbeto. Vundu* ayeke hon ndö ti azo ti kodro ti Philistie. 15  Na ngoi ni so, mbeto ayeke hon ndö ti amokonzi* ti Édom. Terê ti angangu* gbia ti Moab ayeke dö na mbeto.+ Bê ti azo ti kodro ti Canaan kue ayeke nze ande.+ 16  Kota mbeto ayeke tï ande na ndö ti ala.+ Jéhovah, ngangu maboko ti mo asara si ala yeke luti kpô tongana tênë, juska azo ti mo ahon, juska azo ti mo so mo sara ala+ ahon.+ 17  Jéhovah, mo yeke gue na ala si mo lu ala tongana keke na ndö ti hoto ti mo,+ a yeke mbeni place so mo leke fade awe ti duti dä, mbeni ndo so ayeke nzoni-kue, so maboko ti mo, Jéhovah, si aleke ni. 18  Jéhovah ayeke komande ande kpu na kpu tongana gbia.+ 19  Na ngoi so ambarata ti Pharaon, apuse ti bira ti lo nga na azo ti kpengo na ambarata ti lo alï na yâ ti ngu-ingo,+ Jéhovah asara si ngu ni akiri na ndö ti ala,+ me azo ti Israël atambela ti ala na ndö ti kuru sese na popo ti ngu-ingo ni.”+ 20  Tongaso, prophète-wali Miriam, ita ti Aaron ti wali, amû tambourin na maboko ti lo. Awali kue amû peko ti lo, ala yeke pika atambourin nga ala yeke dodo. 21  Miriam akiri tënë na akoli ni na lege ti bia, lo tene: “Ala he bia na Jéhovah, ngbanga ti songo benda so amû na lo kota gloire.+ Lo bi mbarata na zo ti kpengo na mbarata ni na yâ ti ngu-ingo.”+ 22  Na pekoni Moïse amû azo ti Israël na Kota Ngu-Bengba lo gue na ala na benyama ti Shur, ala tambela lango ota na benyama, me ala wara ngu pëpe. 23  Na pekoni, ala si na Marah,*+ me ala lingbi ti nyon ngu ti Marah ni pëpe ngbanga ti so ngu ni ase sengo. Ndani la lo zia iri ni Marah. 24  Azo ni akomanse ti kasa Moïse,+ ala tene: “E yeke nyon ande nyen?” 25  Lo toto na Jéhovah,+ ni la Jéhovah afa na lo mbeni keke. Tongana lo bi ni na yâ ti ngu ni, ngu ni anzere. Na ndo so, Nzapa alu na ala mbeni ndia so alingbi ti mû lege ti fâ ngbanga na li ti zo. A yeke na ndo so la si lo tara bê ti ala.+ 26  Lo tene: “Tongana mo mä yanga ti Jéhovah Nzapa ti mo mbilimbili na mo sara ye so ayeke nzoni na lê ti lo, mo dengi mê na acommandement ti lo, nga mo bata andia ti lo kue,+ fade akobela so mbi ga na ni na ndö ti azo ti Égypte,+ mbi yeke ga na mbeni oko tongaso pëpe na ndö ti mo, ndali ti so mbi Jéhovah mbi yeke sava mo.”+ 27  Na pekoni ala si na Élim, ndo so ali ti ngu 12 nga na akeke ti mbûrü 70 ayeke dä. Tongaso ala sara camp ti ala na terê ti ngu ni.

Kete tënë

“Jah” ayeke nduru iri ti Jéhovah.
Na Hébreu: “saleté ti peko ti yaka.”
Wala “âme ti mbi.”
Na Hébreu: “Songo yâ so agbu wali so aye ti dü.”
Wala “acheik.”
Wala “asioni.”
Ndani aye ti tene “Sengo ye.”