Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 13:1-22

LI TI ATËNË NI

  • Akozo molenge ti koli oko oko kue ayeke ti Jéhovah (1, 2)

  • Matanga ti mapa so a sara na levure pëpe (3-10)

  • Akozo molenge ti koli oko oko kue ayeke ti Nzapa (11-16)

  • A tene na azo ti Israël ti mû lege ti Kota Ngu-Bengba (17-20)

  • Mbinda nga na wâ (21, 22)

13  Jéhovah atene na Moïse, atene:  “Na popo ti azo ti Israël, mo zia nde ndali ti mbi akozo molenge ti koli* oko oko kue. Akozo molenge ti koli kue so azo na anyama adü ayeke ti mbi.”+  Moïse atene na azo ni: “Ala dabe ti ala na lango so ala sigi na Égypte,+ ndo* so ala sara ngbâa dä, ndali ti so Jéhovah asigi na ala na kodro ni na ngangu maboko ti lo.+ Ni la, ye so a sara na levure, ala te pëpe.  Ala yeke sigi laso, na nze ti Abib.*+  Tongana Jéhovah ague na mo ande na kodro ti azo ti Canaan, ti azo ti mara ti Heth, ti azo ti mara ti Amori, ti azo ti Hévi na azo ti mara ti Jébus,+ kodro so lo deba yanga ti lo na akotara ti mo ti mû na mo,+ kodro so lait na mafuta ti otoro asi singo dä,+ a lingbi mo sara matanga so na yâ ti nze ni so.  Lango mbasambala mo yeke te mapa so a sara na levure pëpe;+ na mbasambala lango ni, a yeke sara ande mbeni matanga ndali ti Jéhovah.  Lango mbasambala mo yeke te mapa so a sara na levure pëpe.+ A lingbi a wara na ndo ti mo pëpe mbeni ye so a sara na levure.+ Na yâ ti kodro* ti mo kue, a yeke bâ pëpe mbeni mengo farine so akpi awe.  Na lango ni so mo yeke tene ande na molenge ti mo, mo tene: ‘A yeke ndali ti ye so Jéhovah asara ngbanga ti mbi na ngoi so mbi sigi na Égypte.’+  Ye so ayeke ga tongana mbeni nzoroko na ndö ti maboko ti mo nga na ndö ti lê ti mo,*+ tongana mbeni ye so mo yeke dabe ti mo na ni,* si ndia ti Jéhovah aduti na yanga ti mo; ngbanga ti so na ngangu maboko ti lo, Jéhovah asigi na mo na Égypte. 10  Mo sara ye alingbi na mbela so na ngoi so a fa na mo, na yâ ti ngu oko oko.+ 11  “Tongana Jéhovah ague na mo na kodro ti azo ti Canaan, gï tongana ti so lo deba yanga ti lo ti mû na mo nga na akotara ti mo,+ 12  a lingbi mo mû na Jéhovah akozo molenge ti koli kue,* nga na akozo molenge ti anyama ti mo kue, akoli ni. Akoli ni ayeke ti Jéhovah.+ 13  A lingbi mo mû taba na place ti kozo molenge ti kororo. Tongana mo mû taba na place ni pëpe, a lingbi mo kungbi go ti lo. Ti akozo molenge ti mo ti koli, a lingbi mo mû mbeni ye na place ti ala.+ 14  “Tongana molenge ti mo ahunda mo ande atene: ‘Nda ti ye so aye ti tene nyen?’, fade mo tene na lo: ‘A yeke na lege ti ngangu maboko si Jéhovah asigi na e na Égypte, na gbe ti ngbâa.+ 15  Na ngoi so li ti Pharaon akpengba ti zia e ti gue,+ Jéhovah afâ akozo molenge ti kodro ti Égypte kue, a londo na akozo molenge ti azo ti si na akozo molenge ti anyama.+ Ndani la si mbi yeke mû na Jéhovah akozo molenge ti koli kue* na sandaga, na popo ti amolenge ti mbi ti koli kue, mbi yeke mû mbeni ye na place ti lo so ayeke kozo ni.’ 16  Ye so ayeke duti tongana mbeni nzoroko na ndö ti maboko ti mo nga tongana mbeni yanga ti bongo so a kanga ni na ndö ti lê ti mo,*+ ngbanga ti so a yeke na lege ti ngangu maboko si Jéhovah asigi na e na Égypte.” 17  Tongana Pharaon azia azo ni ague, Nzapa ahon na ala na lege ti kodro ti aPhilistin pëpe, atâa so lege ni ayeke nduru, ndali ti so Nzapa atene: “Azo ti Israël alingbi ti changé bango ndo ti ala tongana ala tingbi na bira, na ala yeke kiri na Égypte.” 18  Tongaso, Nzapa afa na azo ti Israël ti mû lege ti benyama ti Kota Ngu-Bengba.+ Azo ti Israël asigi na kodro ti Égypte tongana aturugu so a leke ala ti gue na bira. 19  Moïse amû nga abio ti Joseph ague na ni, ngbanga ti so Joseph ahunda lani na amolenge ti Israël ti deba yanga ti ala polele na lo, lo tene: “Nzapa ayeke bi lê ti lo ande na mbage ti ala, a yeke nzoni ala mû abio ti mbi na ndo so ala hon na ni.”+ 20  Ala londo na Succoth, ala gue asara camp ti ala na Étham na yanga ti benyama. 21  Jéhovah ayeke gue na devant ti ala na kota lâ na yâ ti mbeni mbinda* ti fa lege na ala,+ nga na bï na yâ ti wâ ti mû lumière na ala, tongaso si ala lingbi ti tambela na kota lâ nga na bï.+ 22  Na kota lâ, mbinda ni ahon yongoro na devant ti azo ni pëpe nga na bï, wâ ni ahon yongoro na devant ti ala pëpe.+

Kete tënë

Na Hébreu: “ye kue so azi lege ti da ti molenge.”
Na Hébreu: “da ti ngbâa.”
Bâ na B15.
Na Hébreu: “Na ayanga ti sese.”
Na Hébreu: “na popo ti lê ti mo.”
Wala “mbeni ye ti dango bê.”
Na Hébreu: “zo kue so azi lege ti da ti molenge.”
Na Hébreu: “ye kue so azi lege ti da ti molenge.”
Na Hébreu: “na popo ti lê ti mo.”
A yeke tongana gbâ ti guru so ayeke monté.