Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Exode 10:1-29

LI TI ATËNË NI

  • Ye ti ngangu 8: agbadora (1-20)

  • Ye ti ngangu 9: bingo (21-29)

10  Na pekoni, Jéhovah atene na Moïse: “Gue na gbele Pharaon, ngbanga ti so mbi zia si li ti lo na ti azo ti kua ti lo akpengba,+ ti tene mbi sara aye ti kpene so tâ na gbele lo,+  si mo lingbi ti tene na amolenge ti mo nga na a-âta ti mo tënë ti ye ti ngangu so mbi sara na Égypte nga aye ti kpene so mbi sara na popo ti ala,+ ala yeke hinga so mbi yeke Jéhovah.”  Tongaso, Moïse na Aaron ague na gbele Pharaon, ala tene na lo: “Jéhovah Nzapa ti aHébreu atene: ‘Juska lawa si mo yeke ke ti woko terê ti mo na gbe ti mbi?+ Mo zia azo ti mbi ague si ala lingbi ti sara na mbi.  Tongana mo ngbâ ti ke ti zia lege na azo ti mbi ti gue, bâ, kekereke mbi yeke ga na agbadora na ndö ti sese ti mo kue.  Agbadora ni ayeke mû ande ndö ti lê ti sese ni na zo ayeke bâ sese ni pëpe. Ala yeke te tanga ti aye so akota glason abuba ni pëpe si angbâ so. Ala yeke te akeke ti ala kue so angbâ ti sigi sigingo na ngonda.+  Agbadora ni ayeke mû yâ ti ada ti mo, ada ti azo ti kua ti mo kue na ada kue ti Égypte, na mbeni lege so même ababâ ti mo na a-âta ti mo ade abâ ni lâ oko pëpe, ti londo na lango so ala yeke na fini na ndö ti sese so juska laso.’”+ Na ndö ti tënë so lo tourné, lo sigi na gbele Pharaon.  Na pekoni, azo ti kua ti Pharaon atene na lo: “Juska lawa si koli so ayeke ngbâ ti ga na kpale na* e? Zia azo ni ague, tongaso si ala lingbi ti sara na Jéhovah Nzapa ti ala. Bâ, Égypte abuba awe, ade mo hinga ape?”  Tongaso, a kiri a iri Moïse na Aaron na gbele Pharaon, si lo tene na ala: “Ala gue, ala sara na Jéhovah Nzapa ti ala. Me azo wa mbilimbili la ayeke gue?”  Moïse atene: “E na amaseka ti e, ambakoro, amolenge ti e ti koli na amolenge ti e ti wali, ataba ti e nga na abagara ti e+ la si e yeke gue ndali ti so e yeke na mbeni matanga ti sara na Jéhovah.”+ 10  Me Pharaon atene na ala: “Tâ tongana mbi zia ala na amolenge ti ala ague, andâ Jéhovah ayeke na ala!+ Ti tâ tënë ni, ala yeke leke ti sara mbeni ye ti sioni la. 11  Ên-ën, mbi ye ape! Gï ala akoli ni la si alingbi ti gue ti sara na Jéhovah, ndali ti ye so ala ye la.” Na ndö ti tënë so, a tomba ala na gbele Pharaon. 12  Jéhovah atene na Moïse: “Yôro maboko ti mo na ndö ti kodro ti Égypte si agbadora aga na ndö ti kodro ni ti te akugbe ti keke kue ti kodro ni, aye kue so akota glason abuba ni pëpe so.” 13  Hio, Moïse ayôro maboko ti lo na ndö ti kodro ti Égypte, na Jéhovah asara si mbeni pupu so alondo na mbage ti est aya na ndö ti kodro ni kue na lango ni so kue nga na bï ni kue. Na ndapre, pupu ni amû agbadora aga na ni. 14  Agbadora amonté na ndö ti kodro ti Égypte kue nga ala duti na ndö ti lê ti sese ni kue.+ Ye ni ayeke tâ ngangu mingi.+ Ade a bâ gbâ ti agbadora tongaso lâ oko pëpe na a yeke kiri ti bâ gbani tongaso mbeni pëpe. 15  Ala mû ndö ti lê ti sese ni kue, nga lê ti sese ni avuko na ala. Ala te akugbe ti keke ti kodro ni nga na alengo kue ti keke so akota glason abuba ni pëpe. Ala zia mbeni fini kugbe oko tongaso angbâ na ndö ti keke pëpe, nga ala zia mbeni pere angbâ na yâ ti kodro ti Égypte pëpe. 16  Hio, Pharaon airi Moïse na Aaron na lo tene na ala: “Mbi sara siokpari na terê ti Jéhovah Nzapa ti ala nga na terê ti ala. 17  Fadeso, ala pardonné siokpari ti mbi gï ti so ni so awe, na ala voro yanga na Jéhovah Nzapa ti ala si lo zi ye ti fango zo so na ndö ti mbi.” 18  Moïse asigi na gbele Pharaon na lo voro yanga na Jéhovah.+ 19  Tongaso, Jéhovah asara si pupu ni achangé aga mbeni kota pupu so alondo na mbage ti ouest si amû agbadora ni ahon na ala, a tuku ala na yâ ti Kota Ngu-Bengba. Gbadora oko tongaso angbâ pëpe na sese ti Égypte kue. 20  Me, Jéhovah azia si li ti Pharaon akpengba+ na lo zia lege pëpe na azo ti Israël ti gue. 21  Na pekoni, Jéhovah atene na Moïse: “Yôro maboko ti mo na nduzu si bingo amû yâ ti kodro ti Égypte, mbeni bingo so avuko pitipiti.” 22  Hio, Moïse ayôro maboko ti lo na nduzu na mbeni bingo so avuko pitipiti amû yâ ti kodro ti Égypte kue lango ota.+ 23  Ala lingbi ti bâ mba ti ala pëpe, zo oko alondo na place ti lo pëpe lango ota. Me ti azo ti Israël, ala kue ayeke na lumière na yâ ti ada ti ala.+ 24  Pharaon airi Moïse na lo tene na lo: “Ala gue, ala sara na Jéhovah.+ Gï ataba ti ala na abagara ti ala la si ayeke ngbâ. Même amolenge ti ala alingbi nga ti gue na ala.” 25  Me Moïse atene: “Mo wani la mo yeke mû ande anyama na e* si e mû ambeni na sandaga na e mû ambeni na sandaga so a zö ni agbi kue, ngbanga ti so a lingbi e yâa sandaga na Jéhovah Nzapa ti e.+ 26  Anyama ti e nga kue ayeke gue legeoko na e, mbeni nyama* oko tongaso ayeke ngbâ pëpe, ngbanga ti so e yeke mû ambeni ti voro na Jéhovah Nzapa ti e, e hinga pëpe ye so e yeke mû ande ti voro na Jéhovah juska e si kâ.” 27  Me Jéhovah azia si li ti Pharaon akpengba, lo yeda pëpe ti zia lege na ala ti gue.+ 28  Tongaso Pharaon atene na Moïse: “Hon na lê ti mbi kâ! Mo kiri mo ga na lê ti mbi encore ape, lango so mo yeke bâ lê ti mbi, mo yeke kui.” 29  Moïse atene na lo: “Tongana ti so mo tene awe, mbi yeke gi ti bâ lê ti mo encore ape.”

Kete tënë

Na Hébreu: “ti duti tongana kûkû ndali ti.”
Wala “mû lege na e ti wara anyama.”
Na Hébreu: “mbeni li ti gere ti nyama.”