Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Esdras 9:1-15

LI TI ATËNË NI

  • Mariage so azo ti Israël asara na ambeni zo ti mara nde (1-4)

  • Esdras asambela ti hunda pardon (5-15)

9  Gï so a hunzi ti sara aye so awe, amokonzi ni aga na terê ti mbi, ala tene: “Azo ti Israël, aprêtre nga na azo ti mara ti Lévi aduti nde pëpe na azo ti akodro* so angoro ala nga na asioni sarango ye ti azo ni so.+ Aye ti sioni so azo ti Canaan, azo ti mara ti Heth, azo ti Périzzi, azo ti mara ti Jébus, azo ti mara ti Ammon, azo ti Moab, azo ti Égypte+ nga na azo ti mara ti Amori+ ayeke sara.  Azo ti Israël amû amolenge-wali na popo ti azo so si aga awali ti ala na ala mû nga ambeni molenge-wali ni ala mû na amolenge ti ala ti koli.+ Biani, azo ti Israël so ayeke ahale* so ayeke nzoni-kue+ abungbi terê ti ala na azo ti akodro so angoro ala.+ Amokonzi nga na akota zo ti kodro la ayeke akozo zo ti sara ye ti sioni so.”  Gï so mbi mä tënë ni, mbi suru bongo na terê ti mbi nga na kota bongo ti mbi so maboko ni ayeke dä pëpe so, mbi gboto kuä ti li ti mbi nga na kuä ti yanga ti mbi na mbi duti na yâ ti sese na kota vundu.  Tongaso, azo kue so mbeto ti tënë ti Nzapa ti Israël asara ala abungbi na terê ti mbi ndali ti siokpari so azo so a gue na ala ândö na ngbâa so asara, na oko ngoi ni mbi ngbâ na yâ ti sese ni na kota vundu juska na ngoi ti mungo sandaga ti alê ti kobe ti lakui.+  Tongana ngoi ti mungo sandaga ti alê ti kobe ti lakui+ ni alingbi awe, mbi londo na yâ ti sese ni na ndo so mbi duti dä fade na yâ ti kota vundu so, na abongo ti mbi ni so asuru kirikiri angbâ na terê ti mbi; mbi sara agenou na mbi yôro maboko ti mbi na nduzu na Jéhovah Nzapa ti mbi,  mbi tene: “Nzapa ti mbi, kamene ahon ndö ti mbi nga li ti mbi ane ti yô lê ti mbi na mbage ti mo, Nzapa ti mbi, ndali ti so siokpari ti e awu mingi na ahon ndö ti li ti e nga ndö ti siokpari ti e amonté juska na yayu.+  A londo na ngoi ti akotara ti e juska laso, siokpari ti e ayeke kota mingi.+ A yeke ndali ti asioni ti e la mo zia e na agbia ti e nga na aprêtre ti e na maboko ti agbia ti ambeni kodro si ala fâ e na épée,+ ala gbu e ague na e na ngbâa,+ ala gbu akungba ti e+ nga ala zia kamene na lê ti e, tongana ti laso so.+  Me ti fadeso e wu pupu kete, mo Jéhovah Nzapa ti e mo sara nzoni bê na e na lege so mo zia si mbeni tanga ti azo ni asö fini ti ala, na lege so mo mû na e mbeni ndo* so ayeke kpô na yâ ti ndo ti mo so ayeke nzoni-kue.+ Nzapa ti e mo sara tongaso na e si e duti na ngia na e wu terê ti e kete na gbe ti ngbâa.  Atâa so e yeke angbâa,+ mo Nzapa ti e mo zia si e ngbâ na gbe ti ngbâa pëpe. Me mo fa tâ ndoye ti mo na mbage ti e na lege so mo sara si agbia ti Perse+ asara nzoni bê na e, ti kiri ti mû ngangu na e tongaso si e kiri e leke da ti Nzapa ti e,+ na ti leke ndo ni so abuba kue awe si e duti na Juda nga na Jérusalem mo bâ mo tene e yeke na peko ti mbeni gbagba* so a sara ni na tênë. 10  “Me ti fadeso, Nzapa ti e, tënë ti nyen la e lingbi ti tene na peko ti ye so asi so? Ndali ti so e ke acommandement ti mo 11  so mo mû lani na e na lege ti awakua ti mo aprophète, mo tene: ‘Sese so ala yeke gue ti mû ni ti ga ti ala so ayeke mbeni sese so ayeke sioni ndali ti so azo ti kodro ni ayeke sara aye ti sioni. Azo ni so asara aye so ayeke sioni mingi, na ala sara si aye ti sioni amû yâ ti ndo ni kue.+ 12  Tongaso, ala mû amolenge ti ala ti wali ala mû na amolenge-koli ti azo so pëpe wala ala yeda ti mû amolenge ti azo so ti wali ti mû na amolenge ti ala ti koli pëpe.+ Ala gi lâ oko pëpe ti sara mbeni ye ti tene azo so aduti na siriri wala ala gi nzoni maïngo ti ala pëpe,+ tongaso si ala, azo ti Israël, ala lingbi ti ga ngangu na ala te anzoni ye ti sese ni si ala na amolenge ti ala amû sese ni ti ga ti ala teti lakue lakue.’ 13  Na peko ti aye kue so aga na ndö ti e ndali ti aye ti sioni so e sara nga na kota siokpari so e sara, mo Nzapa ti e, mo sara ye na mbage ti e alingbi na siokpari so e sara so pëpe,+ me mo zia lani lege na e so e yeke ge so ti sö kuâ;+ 14  eskê e yeke kiri ti ke acommandement ti mo? e yeke kiri ti sara songo na lege ti mariage na azo so ayeke sara aye ti sioni tongaso so?+ Fade ngonzo asara ande mo na terê ti e na mo futi e kue biani biani ape? 15  Jéhovah Nzapa ti Israël, mo yeke mbilimbili+ ndali ti so mbeni tanga ti e asö kuâ juska laso. Bâ e la na devant ti mo so na asiokpari ti e na li ti e; ndali ti ye so, zo oko alingbi pëpe ti luti na devant ti mo.”+

Kete tënë

Na Hébreu: “azo ti asese ni.”
Na Hébreu: “ngongoa.”
Na Hébreu: “mbeni piquet.”
Wala “mbeni gbagba ti batango terê.”