Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Esdras 5:1-17

LI TI ATËNË NI

  • A-Juif akiri na ndö ti kua ti lekengo temple ni (1-5)

  • Tattenaï atokua mbeti na Gbia Darius (6-17)

5  Prophète Aggée,+ na prophète Zacharie+ âta ti Iddo,+ atene aprophétie lani na aJuif so ayeke na Juda nga na Jérusalem. Ala tene aprophétie ni na iri ti Nzapa ti Israël so ayeke fa lege na ala.  A yeke tongaso si Zorobabel+ molenge ti Shéaltiel na Jéshua+ molenge ti Jéhozadac alondo ti kiri ti leke da ti Nzapa+ so ayeke na Jérusalem. Aprophète ti Nzapa ayeke na ala na ayeke kpengba ala.+  Na ngoi ni so, Tattenaï so ayeke gouverneur ti Mbage ti ngu ni, na Shéthar-Bozenaï nga na amba ti ala awakua aga ahunda ala, atene: “Zo wa la amû yanga na ala ti leke da so nga ti hunzi ti leke akeke ti gbagba ni?”  Na pekoni ala hunda ala, atene: “Azo so ayeke sara da ni so iri ti ala ayeke zo wa?”  Me lê ti Nzapa ayeke na ndö ti a-ancien ti aJuif ni,+ tongaso Tattenaï na amba ti lo akanga lege pëpe na ala ti sara kua ni juska a tokua ndo na Darius, nga ala ku ti tene Darius asû mbeni mbeti ti kiri tënë na ndö ni na ala si.  Bâ mbeni copie ti mbeti so Tattenaï, gouverneur ti ando so ayeke na Mbage ti ngu ni, na Shéthar-Bozenaï na amba ti lo awakua nga na akete gouverneur so ayeke na ando so ayeke na Mbage ti ngu ni, atokua ni na Gbia Darius la.  Ala sû mbeti ni atene: “Na Gbia Darius: “Zia siriri kue aduti na mo gbia!  Gbia, zia mo hinga so e gue lani na kodro-komanda ti Juda na da ti kota Nzapa, na e bâ so a ngbâ ti leke da ni na akota tênë so ala yeke roulé ni juska na ndo ni, nga a yeke zia akota keke na yâ ti amur ti gbagba ni. Azo ni ayeke sara kua ni na bê ti ala kue na kua ni ayeke maï nzoni na maboko ti ala.  Tongaso, e hunda a-ancien so ayeke na ndö ti kua ni, e tene: ‘Zo wa la amû yanga na ala ti leke da so nga ti hunzi ti leke akeke ti gbagba ni?’+ 10  E hunda iri ti ala nga, tongaso si e lingbi ti sû iri ti azo so ayeke mû li ni na yâ ti kua ni na mbeti ti tokua na mo. 11  “Ala kiri tënë na e, atene: ‘E yeke awakua ti Nzapa ti yayu na ti sese, e yeke kiri ti leke da so a leke ni lani angu mingi awe, da so mbeni kota gbia ti Israël aleke ni lani ahunzi kue.+ 12  Me ngbanga ti so akotara ti e asara lani si ngonzo agbu Nzapa ti yayu,+ lo zia e na maboko ti Nébucadnezzar,+ gbia ti Babylone, zo ti Chaldée, so akungbi da so+ lani na lo gbu azo ni lo gue na ala na Babylone.+ 13  Ye oko, na yâ ti kozo ngu ti komandema ti Cyrus, gbia ti Babylone, Gbia Cyrus asû lani maboko ti lo na gbe ti mbeni mbela so amû lege na e ti kiri ti leke da ti Nzapa so.+ 14  Nga, asembe ti lor na ti argent ti da ti Nzapa, so Nébucadnezzar amû ni lani na yâ ti temple ti Jérusalem si lo gue lo zia ni na yâ ti temple ti Babylone, Gbia Cyrus asigi na ni na yâ ti temple ti Babylone+ si lo mû ni na mbeni koli so iri ti lo ayeke Sheshbazzar,*+ lo so Cyrus azia lo lani gouverneur.+ 15  Cyrus atene na lo: “Mo mû asembe so. Mo gue mo zia ni na yâ ti temple so ayeke na Jérusalem, na zia si a kiri a leke da ti Nzapa na ngbene ndo ni.”+ 16  Tongaso, Sheshbazzar ni wani aga lo zia agere ti da ti Nzapa+ so ayeke na Jérusalem. Ngbene ye na ngoi ni kâ, kua ti da ni angbâ juska fadeso, me ade a hunzi pëpe.’+ 17  “Ni la tongana gbia abâ so a yeke nzoni, zia a gi nda ti tënë so nzoni na yâ ti da ti batango amosoro ti gbia so ayeke na Babylone, ti bâ wala Gbia Cyrus amû lani yanga ti kiri ti leke da ti Nzapa so ayeke na Jérusalem.+ Nga, a yeke nzoni gbia asû mbeni mbeti ti fa na e tënë ti bê ti lo na ndö ti tënë so.”

Kete tënë

Peut-être a yeke Zorobabel so a sara tënë ti lo na Esd 2:2 nga na 3:8.