Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aProverbe 7:1-27

LI TI ATËNË NI

  • Yeda na acommandement ti Nzapa na ngbâ na fini (1-5)

  • Mbeni maseka-koli so lê ti lo ahan pëpe atï na yâ ti handa ti mbeni wali (6-27)

    • “Tongana koli-bagara so a gue na lo ti fâ lo” (22)

7  Molenge ti mbi, bata atënë ti mbi, nga bata acommandement ti mbi nzoni.+   Bata acommandement ti mbi si mo ngbâ na fini;+ ye* so mbi fa na mo, bata ni tongana vuko lê ti mo.   Kanga ni na terê ti ali ti maboko ti mo; sara ni tongana mbeti na ndö ti bê ti mo.+   Tene na ndara: “Mo yeke ita ti mbi ti wali,” nga di iri ti hingango ndo, mo tene: “Fami ti mbi la,”   si ala bata mo yongoro na wali ti kirikiri*+ nga yongoro na wali so asara lango-sioni,* so atënë ti yanga ti lo anzere nzerengo.*+   Kâ na yâ ti fenêtre ti da ti mbi, mbi bâ ndo na yâ ti dû ti fenêtre ni.   Na ngoi so mbi yeke bâ azo so lê ti ala ahan pëpe,* mbi bâ na popo ti amaseka mbeni maseka-koli so li ti lo ayeke dä pëpe.+   Lo hon na lege, nduru na coin ti da ti wali ni, na lo mû lege so ague na da ti wali ni.   A yeke na ngoi so lâ ayeke linda, na lakui,+ na ngoi so ndo aga nduru ti vuko. 10  Mbi bâ mbeni wali aga awara lo; lo yü bongo tongana* wali-ndumba,+ nga bê ti lo asi singo na tënë ti handa. 11  Go ti lo atoto ngangu nga li ti lo akpengba.+ Lo yeke duti ka* na yanga-da pëpe. 12  Kete, lo sigi; kete, lo gue na ndo so azo ayeke gue ka dä mingi; nduru na coin ti lege oko oko kue, lo honde terê ti lo ti ku azo.+ 13  Lo gbu maseka-koli ni, lo su yanga ti lo; sân kamene, lo tene na lo: 14  “Mbi doit fade ti mû asandaga ti beoko.+ Laso, mbi sara ye alingbi na zendo ti mbi awe. 15  Ndani la mbi ga ti wara mo; mbi ga ti gi peko ti mo, na mbi wara mo awe! 16  Mbi bi apendere couverture na ndö ti gbogbo ti mbi; a sara ni na lin ti Égypte,+ na acouleur nde nde. 17  Mbi fi yombo ti myrrhe, ti aloès na ti cinnamome+ na ndö ti gbogbo ti mbi. 18  Ga, e sara bolingo juska na ndapre; zia e wara ngia na yâ ti bolingo ti e ni, 19  ndali ti so koli ti mbi ayeke na yanga-da pëpe; lo voyagé na mbeni yongoro ndo. 20  Lo hon na bozo ti nginza na maboko ti lo, na lo yeke kiri pëpe juska lango so nze aga kota awe si.” 21  Wali ni ahanda lo na atënë so lo leke ni na kode si anzere.+ Lo handa lo na anzerengo tënë. 22  Hio tongaso, lo tï na peko ti wali so, tongana koli-bagara so a gue na lo ti fâ lo, tongana buba zo so a yôro maboko ti lo na yâ ti keke so a kôro dû dä* ti punir lo,+ 23  juska lê ti kokora alï na yâ ti foie ti lo. Tongana ndeke so akpe hio ti lï na yâ ti gbanda, lo hinga pëpe so lo gue ti girisa fini* ti lo.+ 24  Fadeso, amolenge ti mbi, ala mä mbi; ala dengi mê na atënë so mbi yeke tene. 25  Zia bê ti mo apusu mo ti tourné ti mû lege ti lo pëpe. sara hange si mo girisa na mo tï na ndö ti lege ti lo pëpe,+ 26  ndali ti so lo sara si gbâ ti azo atï awara kuâ,+ na azo so lo fâ ala ayeke gbani.+ 27  Da ti lo ague na zo na Dû ti kuâ;* a descend na gbe ni na yâ ti achambre ti kuâ.

Kete tënë

Wala “ndia.”
Na Hébreu: “wande.” Bâ aPr 2:16.
Na Hébreu: “wande.” Bâ aPr 2:16.
Wala “ahanda zo.”
Wala “so ahinga ndo mingi pëpe.”
Wala “lo yeke na bongo ti.”
Na Hébreu: “Gere ti lo ayeke ngbâ ka.”
Wala “na yâ ti achaîne.”
Wala “âme.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.