Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aProverbe 4:1-27

LI TI ATËNË NI

  • Wango ti ndara ti mbeni babâ (1-27)

    • Kota ye ni kue ayeke ti gi ti wara ndara (7)

    • Mû lege ti azo ti sioni ape (14, 15)

    • Lege ti zo ti mbilimbili ayeke su gï sungo (18)

    • “Bata bê ti mo” (23)

4  Amolenge ti mbi, ala mä tënë so mbeni babâ ayeke tene na ala ti fa lege na ala.+ Ala dengi mê ala mä ndo tongaso si ala hinga ndo,   ndali ti so mbi yeke fa ye na ala nzoni; ye so mbi fa na ala,* ala zia ni pëpe.+   Mbi yeke lani nzoni molenge ti babâ ti mbi,+ nga mbi la mama ti mbi aye mbi mingi.+   Babâ afa ye na mbi, lo tene: “Bata tënë ti mbi nzoni na bê ti mo.+ Bata acommandement ti mbi, na mo yeke ngbâ na fini.+   Gi ti wara ndara, gi ti wara hingango ndo.+ Ye so mbi tene na mo, girisa ni pëpe nga sara ye ague nde na ni pëpe.   Zia lege ni pëpe, na a yeke bata mo. Ye ni, na a yeke bata fini ti mo.   Ndara ayeke kota ahon tanga ti aye kue;*+ tongaso gi ti wara ni; nga na ndö ti aye kue so mo gi ti wara ni, gi ti wara hingango ndo.+   Bâ ni tongana kota ye na lê ti mo, na lo yeke sara si mo ga kota.+ Lo yeke sara si mo ne na lê ti azo ndali ti so mo gbu ni na kate ti mo.+   A yeke duti tongana mbeni pendere ye ti baba na li ti mo; a yeke duti tongana mbeni pendere couronne na li ti mo.” 10  Molenge ti mbi, mä mbi, mä tënë so mbi tene na mo, na gigi ti mo ayeke ninga.+ 11  Mbi yeke fa na mo lege ti sara ye na ndara;+ mbi yeke gue na mo na ndö ti lege ti mbilimbili.+ 12  Tongana mo tambela, mbeni ye ti kanga lege na mo si mo tambela gbä ayeke duti dä pëpe; nga tongana mo mû loro, mo yeke pika gere ti mo pëpe. 13  Lege so a fa na mo, gbu ni ngangu; zia ni ahon pëpe.+ Bata ni nzoni, ndali ti so a yeke fini ti mo la.+ 14  Mû lege ti azo ti sioni pëpe, nga tambela na ndö ti lege ti asioni zo pëpe.+ 15  Mû lege ti ala pëpe, kpe ni;+ tourné peko na ni, hon ti mo nde,+ 16  ndali ti so tongana ala sara sioni pëpe, ala yeke lango pëpe. Lango ayeke kpe na lê ti ala juska ala kinda mbeni zo awe si. 17  Sarango ye ti sioni la ayeke mapa ti ala ti tengo ni, nga sarango ye ti ngangu na zo la ayeke vin ti ala ti nyongo ni. 18  Me lege ti azo ti mbilimbili ayeke tongana lumière ti lâ so asigi na ndapre si asu yeke yeke juska aga kota lâ.+ 19  Lege ti azo ti sioni ayeke tongana bingo; ala hinga pëpe ye so asara si ala pika gere ti ala. 20  Molenge ti mbi, dengi mê mo mä tënë ti mbi, mä atënë ti mbi nzoni. 21  Zia lê ti mo angbâ gï na ndö ni, bata ni na gbe ti bê ti mo,+ 22  ndali ti so a yeke fini ndali ti azo so awara ni+ nga a yeke sara si terê* ti ala kue ayeke na nzoni seni. 23  Bata bê ti mo ahon tanga ti aye kue so mo yeke bata,+ ndali ti so aye so amû fini na zo alondo na bê. 24  Zia si tënë ti kirikiri angbâ yongoro kâ,+ nga zia si tënë ti handa aduti yongoro na mo. 25  A yeke nzoni mo bâ ndö gï droit na devant ti mo, a yeke nzoni lê ti mo* ayeke gï droit na devant ti mo.+ 26  Sara si lege so gere ti mo ahon dä aduti nzoni lege,*+ tongaso si alege ti mo kue aduti anzoni lege. 27  Hon na mbage ti koli wala na mbage ti wali pëpe.+ Tongana mo bâ ye ti sioni, mû mbeni lege nde.

Kete tënë

Wala “ndia ti mbi.”
Wala “kozo ye.”
Na Hébreu: “nyama ti terê.”
Wala “lê ti mo so aza.”
A lingbi nga ti tene “Gbu li ti mo nzoni na ndö ti lege so mo ye ti mû.”