Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aProverbe 18:1-24

LI TI ATËNË NI

  • Zo so azi terê ti lo yamba na azo asara ye na ndara ape (1)

  • Iri ti Jéhovah ayeke mbeni ngangu tour (10)

  • Na yâ ti li ti zo, lo pensé so mosoro ayeke bata lo (11)

  • Ti mä tënë ti azo use kue ayeke lege ti ndara (17)

  • Mbeni kamarade ayeke dä so aye zo ahon ita ti zo ni (24)

18  Zo so azi terê ti lo yamba na azo ayeke gi ti sara gï ye so bê ti lo aye; lo ke* ndara kue ti sara ye ti nzoni.   Hingango ndo anzere na zo ti buba kete pëpe; me lo ye gï ti fa ye so ayeke na yâ ti bê ti lo.+   Tongana zo ti sioni aga, hengo zo nga kue ayeke ga; ndo so nengo zo ayeke dä pëpe, ye ti kamene ayeke nga dä.+   Tënë ti yanga ti zo ayeke tongana angu so alï mingi.+ Ndo so ndara asigi dä ayeke tongana li ti ngu so ayeke sua.   A yeke nzoni pëpe ti mû mbage ti zo ti sioni+ wala ti ke ti fâ ngbanga ti zo ti mbilimbili na lege ni.+   Tënë ti yanga ti zo ti buba asara si papa alondo,+ nga yanga ti lo asara si lo wara pika.+   Yanga ti zo ti buba afuti lo;+ tënë ti yanga ti lo ayeke tongana kûkû ndali ti fini* ti lo.   Tënë ti zo ti pango zo ayeke tongana ye so anzere na yanga ti zo;*+ zo amene ni na a descend droit na yâ ti lo.+   Zo so asara kua na goigoi ayeke ita ti zo so asara si ye abuba.+ 10  Iri ti Jéhovah ayeke mbeni ngangu tour.+ Zo ti mbilimbili akpe lo lï na yâ ni, na a bata lo.*+ 11  Mosoro ti zo ti mosoro ayeke gbata ti lo so ngangu gbagba angoro ni; na yâ ti li ti lo, a yeke tongana mbeni ngangu gbagba so abata zo.+ 12  Bê ti fandara ague na zo ti tï sioni;+ na kozo si zo awara gloire, a lingbi lo sara terê ti lo kete si.+ 13  Tongana zo afa bibe ti lo na ndö ti mbeni tënë kozo ti hinga ye nzoni na ndö ni, a yeke mbeni ye ti buba nga ye ti kamene mingi.+ 14  Bibe ti zo alingbi ti mû ngangu na lo na yâ ti kobela ti lo;+ me tongana bê ti zo awoko kue,* lo peut ti gbu lê ni?+ 15  Zo so ayeke na hingango ndo ayeke wara hingango ye,+ nga mê ti azo ti ndara agi ti wara hingango ye. 16  Matabisi so zo amû asara si lege azi na lo;+ a sara si lo wara lege ti si na gbele akota zo. 17  Kozo zo so amû tënë na gbele ngbanga, azo so amä lo apensé so lo yeke na raison,+ juska mba ti lo ni aga ahunda yâ ti lo.+ 18  Desizion so a mû na peko ti bingo mbeni ye ti hinga na nda ti ye asara si papa ahunzi,+ na a sara si tënë ahunzi na popo ti* azo so amä terê kete pëpe. 19  Gingo ti dë bê ti ita so mo son bê ti lo ayeke ngangu ahon mungo mbeni gbata so ngangu gbagba ayeke na terê ni;+ ambeni tënë so ayeke na popo ti azo ayeke tongana abarre na yanga ti ngangu gbagba.+ 20  Tënë ti yanga ti zo ayeke sara si yâ ti lo asi;+ tënë so asigi na yanga ti lo ayeke sara si lo wara ye alingbi na nzara ti lo. 21  Yanga ti zo ayeke na ngangu ti fâ zo wala ti sara si zo angbâ na fini;+ azo so aye tënë ayeke wara ye ti peko ni.+ 22  Zo so awara nzoni wali awara mbeni ye so ayeke nzoni,+ na Jéhovah ayeke bâ lo na nzoni lê.*+ 23  Wayere avoro yanga na ngoi so lo yeke sara tënë, me zo ti mosoro asara tënë na zo gï na ngangu ngangu. 24  Ambeni zo ayeke dä so ayeke nduru ti sara gï sioni na mba na popo ti ala,+ me mbeni kamarade ayeke dä so aye zo ahon ita ti zo ni.+

Kete tënë

Wala “zere.”
Wala “âme.”
Wala “tongana aye so zo amene ni na nzara ni.”
Na Hébreu: “a zia lo na nduzu kâ,” so ti tene zo apeut ti si na lo pëpe, lo duti nzoni.
Wala “anze kue.”
Na Hébreu: “azi yâ ti.”
Wala “ayeke sara nzoni bê na lo.”