Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Apocalypse 19:1-21

LI TI ATËNË NI

  • A sepela Jah ndali ti angbanga so lo fâ (1-10)

    • Mariage ti Kete taba ni (7-9)

  • Zo ti kpengo na vuru mbarata (11-16)

  • Kota matanga ti Nzapa (17, 18)

  • A sö benda na ndö ti nyama ti ngonda ni (19-21)

19  Na peko ti ye so, mbi mä mbeni ye tongana go ti acréature mingi mingi na yayu. Ala tene: “Ala sepela Jah!*+ Salut, na gloire nga na ngangu ayeke ti Nzapa ti e,  ndali ti so angbanga so lo fâ ayeke tâ tënë nga mbilimbili.+ Biani lo fâ ngbanga na li ti kota wali-ndumba so abuba sese na lango-sioni* ti lo so, na lo kiri na lo peko ti sioni so lo sara ndali ti mênë ti angbâa ti lo so ayeke na maboko ti wali so.”+  Ala ngbâ ala tene ti fani use ni: “Ala sepela Jah!*+ Guru ti wâ so agbi wali so ayeke monté na nduzu lakue lakue nga kpu na kpu.”+  A-ancien 24+ nga na acréature osio+ so ayeke na fini akuku, na ala voro Nzapa so aduti na ndö ti trône, ala tene: “Amen! Ala sepela Jah!”*+  Nga, mbeni go alondo na mbage ti trône ni, atene: “Ala sepela Nzapa ti e, ala angbâa ti lo kue+ so akpe mbeto ti lo, akete zo na akota zo.”+  Na pekoni, mbi mä mbeni go tongana go ti acréature mingi mingi, tongana toto ti angu so asua ngangu nga tongana toto ti abekpa so asungba ngangu. Ala tene: “Ala sepela Jah,*+ ngbanga ti so Jéhovah* Nzapa ti e, Lo so ngangu ti lo ahon angangu kue,+ akomanse ti komande tongana gbia awe.+  Zia e duti na ngia na terê ti e anzere mingi; zia e mû gloire na lo, ngbanga ti so mariage ti Molenge ti taba ni asi awe na wali ti lo aleke terê ti lo awe.  Biani, a mû lege na lo ti yü pendere bongo ti lin so aza zango, so saleté ayeke dä pëpe, ndali ti so pendere lin ni aye ti sara tënë ti akusala ti mbilimbili so azo ti be-vulu asara ni.”+  Na pekoni, lo tene na mbi: “Sû tënë so na mbeti: Ngia ayeke na ala so a tisa ala na matanga ti mariage ti Molenge ti taba ni.”+ Nga, lo tene na mbi: “So ayeke atâ tënë so alondo na yanga ti Nzapa.” 10  Na mango tënë so, mbi tï na gbe ti ange ni ti voro lo. Me lo tene na mbi: “Hange! Sara ye tongaso ape!+ Mbi kue mbi yeke gï mba ti mo ngbâa, mbi yeke nga gï ngbâa tongana aita ti mo so kusala ti ala ayeke ti fa tënë na ndö ti Jésus.+ Mo voro Nzapa!+ Ndali ti so fango tënë na ndö ti Jésus la ayeke ye so aprophétie agboto lê dä.”+ 11  Na pekoni, mbi bâ yayu azi, na bâ, mbeni vuru mbarata.+ Lo so aduti na ndö ti mbarata ni, iri ti lo ayeke Be-ta-zo+ so ayeke tene gï tâ tënë;+ lo fâ ngbanga nga lo sara bira na lege ti mbilimbili.+ 12  Lê ti lo ayeke tongana wâ so aza ngangu,+ akpoto mingi ti gbia ayeke na li ti lo. Lo yeke na mbeni iri so a sû ni sungo so mbeni zo ahinga ni pëpe, gï lo oko awe; 13  lo yü mbeni bongo ti ndö ni so mênë andu* terê ni, na iri so a yeke iri na lo ayeke Tënë+ ti Nzapa. 14  Nga, aturugu so ayeke na yayu ayeke mû peko ti lo na ndö ti avuru mbarata, na ala yü pendere vuru bongo ti lin so saleté ayeke dä pëpe. 15  Mbeni yongoro épée+ so yanga ni aza asigi na yanga ti lo, so ayeke ti dë amara na ni, na lo yeke komande ala ande na mbeni keke ti wen.+ Lo dö yâ ti kota dû ti sarango na vin ti kota ngonzo ti Nzapa, Lo so ngangu ti lo ahon angangu kue.+ 16  Lo yeke na mbeni iri so a sû na ndö ti bongo ti lo ti ndö ni, tâ na ndö ti cuisse ti lo, a tene: Gbia ti agbia na Seigneur ti aseigneur.+ 17  Mbi bâ nga mbeni ange so ayeke luti na yâ ti lâ, lo dekongo na kota go nga lo tene na andeke kue so ayeke huru na lê ti nduzu:* “Ala ga ge, ala bungbi terê ti ala ndali ti kota matanga ti Nzapa,+ 18  si ala te nyama ti terê ti agbia, ti amokonzi ti aturugu, ti angangu zo,+ ti ambarata na ti azo so aduti na ndö ti ambarata ni,+ ti azo kue, ti azo so ayeke angbâa pëpe na ti angbâa, ti akete zo na akota zo.” 19  Na pekoni, mbi bâ nyama ti ngonda ni, agbia ti sese nga na aturugu ti ala abungbi terê ti ala ti tiri bira na lo so aduti na ndö ti mbarata ni nga na aturugu ti lo.+ 20  A gbu nyama ti ngonda ni, a gbu nga prophète ti wataka+ ni so ayeke sara lani afä na lê ti lo si lo yeke handa azo so awara marque ti nyama ti ngonda+ ni nga na ala so avoro statue ti lo.+ A mû ala na fini lê ti ala, a bi ala na yâ ti lac ti wâ so soufre ayeke gbi dä.+ 21  Me tanga ti azo ni, a fâ ala na yongoro épée so asigi na yanga ti lo so aduti na ndö ti mbarata ni.+ Na andeke kue ate nyama ti terê ti ala yâ ti ala asi.+

Kete tënë

Wala “Alléluia!” “Jah” ayeke nduru iri ti Jéhovah.
Na Grec: pornéïa. Bâ na kete bakari.
Wala “Alléluia!” “Jah” ayeke nduru iri ti Jéhovah.
Wala “Alléluia!” “Jah” ayeke nduru iri ti Jéhovah.
Wala “Alléluia!” “Jah” ayeke nduru iri ti Jéhovah.
Bâ na A5.
A lingbi nga ti tene “a fi mênë na.”
Wala “na yâ ti pupu.”