Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Amos 8:1-14

LI TI ATËNË NI

  • Vision ti sakpa ti alê ti keke ti ngoi ti ndowa (1-3)

  • A dë ngbanga na ndö ti azo so ayeke sara pasi na amba ti ala (4-14)

    • Kota nzara na lege ti yingo (11)

8  Jéhovah, Seigneur ti dunia kue, asara si mbi bâ mbeni vision. Mbi bâ mbeni sakpa ti alê ti keke ti ngoi ti ndowa.  Lo tene: “Amos, mo bâ nyen?” Mbi tene: “Mbi bâ mbeni sakpa ti alê ti keke ti ngoi ti ndowa.” Jéhovah atene na mbi: “Ngoi ni alingbi awe ti tene a futi azo ti mbi azo ti Israël. Mbi yeke pardonné ala encore ape.+  Jéhovah, Seigneur ti dunia kue, atene: ‘Na ngoi ni so, abia so a yeke he na temple ayeke ga abia ti vundu.+ A yeke wara gbâ ti akuâ ti azo na ndo kue,+ tongaso si ndo adë ngii.’   Ala dengi mê, ala azo so ayeke tambela na ndö ti awayere nga ala so ayeke fâ azo so abâ terê ti ala kete,+   na ala tene: ‘Lawa la si matanga ti fini nze ayeke hunzi+ si e kä alê ti kobe ti e? Lawa la si Sabbat+ ayeke hunzi si e kä alê ti kobe ti e? Ti tene e sara si épha* ti hakango na ye akiri kete nga sicle* akiri ane ahon ti kozo, tongaso si e changé fason so e yeke pesé ye na azo ti handa na ala.+   Ti tene e mû argent e vo na azo so ye amanke ala, e vo awayere na ngere ti senge poro+ nga e kä alê ti kobe so akpa pëpe so.’   Jéhovah, Gloire ti Jacob, adeba na iri ti lo wani,+ atene: ‘Aye kue so ala sara so, mbi yeke girisa ni lâ oko pëpe.+   Ndani la kodro* ni ayeke yengi, nga azo ti kodro ni kue ayeke sara vundu.+ Kodro ni kue ayeke londo na nduzu tongana Ngu ti Nil, nga a yeke londo na nduzu na a kiri na gbe ni tongana Ngu ti Nil ti Égypte.’+   Jéhovah, Seigneur ti dunia kue, atene: ‘Na ngoi ni so, mbi yeke sara si lâ alinda na midi, nga mbi yeke sara si ndo avuko na yâ ti kodro ni na kota lâ.+ 10  Mbi yeke sara si amatanga ti ala aga angoi ti vundu+ nga abia ti ala kue aga abia ti vundu.* Mbi yeke kanga bongo ti vundu na ngbonda ti ala kue nga mbi yeke sara si azo kue aga ali-mbombo. Mbi yeke sara si azo asara mara ti vundu so a yeke sara ka ndali ti kuâ ti mbeni molenge so a dü lo gï lo oko. Mbi yeke sara nga si hunzingo ti ngoi ni so aduti tongana mbeni lango so amû vundu na zo mingi.’ 11  Jéhovah, Seigneur ti dunia kue, atene: ‘Mbeni ngoi ayeke ga ande so, na yâ ni, mbi yeke sara si mbeni kota nzara amû ndo na yâ ti kodro ni. Nzara ni so ayeke pëpe nzara ti kobe wala nzara ti ngu, me a yeke nzara ti mango tënë ti Jéhovah.+ 12  Azo ayeke tambela tongana zo so asoulé, na ala yeke londo na ndo so ngu-ingo ayeke dä ti gue juska na mbeni ngu-ingo, nga ala yeke londo na nord ti gue juska na est.* Ala yeke gue na ando nde nde ti gi tënë ti Jéhovah, me ala yeke wara ni pëpe. 13  Na ngoi ni so, nzara ti ngu ayeke sara si apendere maseka-wali so ade ti hinga koli pëpe nga na amaseka-koli ayeke évanouir. 14  Azo so adeba na iri ti ye so asara si tënë ayeke na li ti Samarie+ nga so atene: “Dan,+ ti tâ tënë ni so nzapa ti mo ayeke na fini,” nga “ti tâ tënë ni so lege so ague na Béer-Shéba+ ayeke dä”, ala yeke tï, na ala yeke londo encore ape.’”+

Kete tënë

Bâ na B14.
Bâ na B14.
Wala “sese.”
Wala “abia ti totongo kuâ.”
Wala “na mbage so lâ asigi dä.”