Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Amos 7:1-17

LI TI ATËNË NI

  • Avision so afa so a ga nduru ti futi Israël awe (1-9)

    • Agbadora (1-3, wâ (4-6), fil à plomb (7-9)

  • A tene na Amos ti zia ti fa tënë ti prophétie (10-17)

7  Jéhovah, Seigneur ti dunia kue, asara si mbi bâ mbeni vision: Bâ, Lo ga na gbâ ti agbadora na ngoi so tanga ti alê ti kobe akomanse ti sigi.* So ayeke tanga ti alê ti kobe so a lu ni na peko ti so a fâ pere ti gbia.  Tongana agbadora ahunzi ti te aye ti yaka kue awe, mbi tene: “Pardon, Jéhovah, Seigneur ti dunia kue, pardonné azo ti mo!+ Jacob ayeke sö kuâ* tongana nyen? so lo woko ngbii so!”+  Tongaso, Jéhovah akiri agbu li ti lo dä,*+ na Jéhovah atene: “Ye so ayeke si ande pëpe.”  Jéhovah, Seigneur ti dunia kue, asara si mbi bâ mbeni vision. Jéhovah, Seigneur ti dunia kue, atene so lo yeke punir azo na lege ti wâ. Wâ ni asara si kota ngu so alï ahule, nga a gbi mbeni mbage ti kodro ni.  Na pekoni, mbi tene: “Pardon, Jéhovah, Seigneur ti dunia kue, zia si aye so asi pëpe.+ Jacob ayeke sö kuâ* tongana nyen? so lo woko ngbii so!”+  Tongaso, Jéhovah akiri agbu li ti lo dä,*+ na lo tene: “Ye so nga ayeke si ande pëpe,” tënë ti yanga ti Jéhovah, Seigneur ti dunia kue, la.  Jéhovah asara si mbi bâ mbeni vision. Mbi bâ Jéhovah so aluti na ndö ti gbagba so a mû mesure ni na fil à plomb,* na fil à plomb ni ayeke na maboko ti lo.  Jéhovah atene na mbi: “Amos, mo bâ nyen?” Mbi tene: “Mbi bâ fil à plomb.” Jéhovah atene: “Mbi yeke na popo ti azo ti mbi, azo ti Israël, ti mû mesure ti ala na fil à plomb ti bâ wala ala yeke droit. Mbi yeke pardonné ala encore ape.+  A yeke futi ando ti ahale ti Isaac+ so ayeke na nduzu, nga a yeke futi ando ti Israël so ayeke nzoni-kue.+ Mbi yeke ga na épée na terê ti ahale ti Jéroboam.”+ 10  Amasiah, so ayeke prêtre na Béthel,+ atokua ndo na Jéroboam+ gbia ti Israël, lo tene: “Amos aleke ti sara sioni na mo tâ na milieu ti azo ti Israël.+ Azo ni akanga bê gbä na atënë kue so Amos ayeke tene so.+ 11  Amos atene: ‘Épée ayeke fâ Jéroboam, nga, nyen na nyen, a yeke gue na azo ti Israël na kodro-wande.’”+ 12  Amasiah atene na Amos: “Mo zo ti fango peko ti avision so, hon mo gue na sese ti Juda, sara kua kâ ti wara kobe* ti mo, na mo tene prophétie ni kâ.+ 13  Me a lingbi mo tene prophétie na Béthel encore ape,+ ndali ti so Béthel ayeke ndo ti gbia so ayeke nzoni-kue+ nga ndo so temple ti royaume ni ayeke dä.” 14  Amos akiri tënë na Amasiah, atene: “Mbi yeke lani pëpe mbeni prophète wala molenge ti prophète, me mbi yeke zo ti batango anyama,+ nga mbi yeke bâ lege ti akeke ti sycomore so afigue asigi dä.* 15  Me Jéhovah azi mbi na terê ti anyama ni, na Jéhovah atene na mbi: ‘Gue mo tene prophétie na azo ti mbi, azo ti Israël.’+ 16  Tongaso mä tënë ti Jéhovah: ‘Mo yeke tene: “Tene prophétie na terê ti azo ti Israël pëpe,+ nga diko tënë pëpe+ na terê ti ahale ti Isaac.” 17  Ni la Jéhovah atene: “Wali ti mo ayeke ga wali-ndumba na yâ ti gbata, nga épée ayeke fâ amolenge ti mo ti koli na ti wali. A yeke mû mesure ti kodro ti mo na kamba ti kangbi ni na azo, na mo yeke kui na kodro-wande. Nyen na nyen, a yeke gue na azo ti Israël na kodro-wande.”’”+

Kete tënë

So ti tene na yâ ti janvier na février.
Na Hébreu: “ayeke kiri ti londo.”
Wala “aregretté.”
Na Hébreu: “ayeke kiri ti londo.”
Wala “aregretté.”
A yeke kamba so a kanga na terê ti tênë so a sara kua na ni ti bâ wala mbeni mur ayeke droit.
Na Hébreu: “ti te mapa.”
Wala “mbi kôro dû na terê ti alê ti figue.”