Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Amos 3:1-15

LI TI ATËNË NI

  • Tënë ti fango ngbanga ti Nzapa (1-8)

    • Nzapa ayeke fa tënë ti bê ti lo (7)

  • Tënë na terê ti Samarie (9-15)

3  “Azo ti Israël, ala mä tënë so Jéhovah atene na ala, tënë so andu ala azo ti sewa kue so mbi sigi na ala lani na Égypte:   ‘Gï ala la mbi hinga na popo ti asewa kue ti sese,+ ndani la mbi yeke hunda ala ti kiri tënë ndali ti afaute ti ala kue.+   Eskê azo use ayeke tambela legeoko sân ti tene ala mä terê kozo?*   Na yâ ti ngonda, tongana nyama ti gbungo ni ayeke dä pëpe, bamara ayeke dekongo? Bamara so akono awe* ayeke toto na ndo so lo lango dä tongana ade lo gbu mbeni nyama ape?   Tongana kûkû ti gbungo ndeke ayeke dä pëpe,* ndeke ayeke tï na yâ ti kûkû? Tongana kûkû agbu ye pëpe, kûkû ni ayeke londo na nduzu?   Tongana a hûru didi na yâ ti gbata, terê ti azo ayeke dö ape? Tongana ye ti ngangu asi na yâ ti gbata, a yeke Jéhovah la aga na ye ni so ape?   Kozo ti tene Jéhovah, Seigneur ti dunia kue, asara mbeni ye, lo yeke fa tënë ti bê ti lo* na awakua ti lo aprophète.+   Bamara adekongo awe!+ Zo wa la mbeto ayeke sara lo ape? Jéhovah, Seigneur ti dunia kue, asara tënë awe! Prophète wa la ayeke duti kpô?’+   ‘Ala fa tënë ni na ndö ti angangu tour ti Ashdod nga na ndö ti angangu tour ti kodro ti Égypte. Ala tene: “Azo, ala bungbi ndo oko ti sara bira na ahoto ti Samarie;+ ala bâ wusuwusu nga na asarango ye ti likisi so ayeke na yâ ni.”+ 10  Jéhovah atene: “Ala hinga pëpe tongana nyen ti sara ye na lege ni; sarango ye ti ngangu nga na futingo ye aga gbani tongana mosoro so ala bata na yâ ti angangu tour ti ala.”’ 11  Tongaso, bâ tënë so Jéhovah, Seigneur ti dunia kue, atene la: ‘Mbeni wato ayeke ngoro terê ti kodro ni,+ lo yeke zi ngangu ti ala nga lo yeke mû aye na yâ ti angangu tour ti ala.’+ 12  Bâ tënë so Jéhovah atene la: ‘Legeoko tongana ti so berger ayeke zi gï agere ti taba use wala mbage ti mê ti taba ni na yanga ti bamara, gï kete wungo ti azo ti Israël la ayeke kpe na maboko ti awato ti ala, ala so aduti fadeso na Samarie na ndö ti apendere gbogbo nga na apendere tange ti ala.’*+ 13  Seigneur ti dunia kue, Jéhovah ti aturugu, atene: ‘Ala ahale ti Jacob, ala mä tënë so nga ala gboto mê ti azo dä.* 14  Na lango ni so, mbi yeke hunda na azo ti Israël ti kiri tënë ndali ti aye ti kpengba-li* so ala sara.+ Mbi yeke ga ti futi nga agbalaka ti Béthel.+ Mbi yeke fâ adidi so ayeke na terê ti gbalaka oko oko kue nga adidi ni ayeke tï na sese.+ 15  Mbi yeke kungbi ada ti ngoi ti dê nga na ti ngoi ti ndowa.’ ‘Mbi yeke kungbi ada so a sara na apembe ti doli,+ nga na akota* da,’+ tënë ti yanga ti Jéhovah la.”

Kete tënë

Wala “ala mä terê awe si na pekoni ala wara terê?”
Wala “Koli-bamara so akono awe.”
A lingbi nga ti tene “Tongana a zia kobe na lê ti kûkû ni pëpe.”
Wala “secret ti lo.”
Wala “atange ti gbata ti Damas.”
Wala “ala fa sioni ti azo na ala.”
Wala “aye so ake ndia.”
A lingbi nga ti tene “gbâ ti.”