Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Amos 2:1-16

LI TI ATËNË NI

  • A dë ngbanga na li ti azo so asara kpengba-li fani mingi (1-16)

2  “Bâ tënë so Jéhovah atene la: ‘“So Moab asara kpengba-li* fani ota+ même fani osio so, mbi yeke changé pëpe ye so mbi mû desizion ti sara, ndali ti so azo ti Moab agbi abio ti gbia ti Édom ti sara na mbamba.   Ni la mbi yeke tokua wâ na ndö ti Moab, nga wâ ni ayeke gbi angangu tour ti Kérioth.+ Moab ayeke kui na yâ ti wusuwusu, na ngoi so azo amû dekongo ti bira nga a yeke hûru didi.+   Mbi yeke zi zo so ayeke komande kodro ni,* nga mbi yeke fâ amokonzi ti Moab kue legeoko na zo so akomande,”+ tënë ti yanga ti Jéhovah la.’   Bâ tënë so Jéhovah atene la: ‘So Juda asara kpengba-li fani ota+ même fani osio so, mbi yeke changé pëpe ye so mbi mû desizion ti sara, ndali ti so azo ti Juda ake ndia* ti Jéhovah nga ala bata pëpe andia ti lo so ayeke fa lege na zo.+ A yeke a-oko mvene so akotara ti ala amû peko ni lani so la asara si ala hon yongoro.+   Ni la mbi yeke tokua wâ na ndö ti Juda, nga wâ ni ayeke gbi angangu tour ti Jérusalem.’+   Bâ tënë so Jéhovah atene la: ‘So Israël asara kpengba-li fani ota+ même fani osio so, mbi yeke changé pëpe ye so mbi mû desizion ti sara, ndali ti so azo ti Israël akä azo ti mbilimbili ti wara argent, nga ala kä awayere na ngere ti senge poro.+   Ala dö yâ ti li ti zo ti mawa na yâ ti fuku ti sese,+ nga ala kanga lege na azo so abâ terê ti ala kete.+ Mbeni zo na babâ ti lo alango na oko wali, na a sara si iri ti mbi so ayeke nzoni-kue abuba.   Ala lango na terê ti agbalaka kue+ na ndö ti bongo so ala gbu na place ti bon.+ Nginza ti amende so azo afuta, ala mû ni ala vo na vin, na ala nyon ni na yâ ti da* ti anzapa ti ala.’   ‘Me mbi la mbi futi lani azo ti mara ti Amori ndali ti azo ti mbi,+ azo ti mara ti Amori so ayo tongana akeke ti cèdre nga ala yeke ngangu tongana akeke ti chêne. Ala yeke tongana mbeni keke so mbi futi alengo ni nga na agunda ni.+ 10  Mbi sigi na ala azo ti mbi lani na kodro ti Égypte,+ nga mbi sara si ala tambela na yâ ti benyama ngu 40+ ti gue ti mû kodro ti azo ti mara ti Amori. 11  Mbi zia ambeni molenge ti ala aprophète+ nga mbi mû ambeni maseka-koli ti ala ti ga aNaziréen.+ Ala azo ti Israël, ni la ape?’ Tënë ti yanga ti Jéhovah la. 12  ‘Me ala ngbâ ti mû vin na aNaziréen ti nyon,+ nga ala mû yanga na aprophète, atene: “A lingbi ala tene prophétie pëpe.”+ 13  Ni la mbi yeke neka ande yâ ti ala na ando so ala yeke dä, tongana ti so puse so ayô gbâ ti alê ti kobe ayeke neka yâ ti ye so lo hon na ndö ni. 14  Zo so ahinga loro mingi ayeke wara ndo ti kpe dä pëpe,+ zo so ayeke ngangu mingi ayeke bata ngangu ti lo pëpe nga zo ti bira ayeke sö fini* ti lo pëpe. 15  Zo ti pikango kokora ayeke dö sese pëpe na azo, zo so ahinga ti mû loro mingi ayeke kpe pëpe nga zo ti kpengo na mbarata ayeke sö fini* ti lo pëpe. 16  Même turugu so ayeke sara ka mbeto pëpe* na popo ti angangu turugu ayeke kpe terê senge na lango ni so,’+ tënë ti yanga ti Jéhovah la.”

Kete tënë

Wala “asara aye so ake ndia.”
Na Hébreu: “juge.”
Wala “fango ye.”
Wala “temple.”
Wala “âme.”
Wala “âme.”
Wala “aturugu so ayeke na bê.”