Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aJuge 9:1-57

LI TI ATËNË NI

  • Abimélek aga gbia na Sichem (1-6)

  • Toli ti Jotham (7-21)

  • Sioni komandema ti Abimélek (22-33)

  • Abimélek aga asara bira na Sichem (34-49)

  • Mbeni wali azia kä na terê ti Abimélek; lo kui (50-57)

9  Mbeni lâ, Abimélek,+ molenge ti Jérubbaal, ague ti bâ aita ti mama ti lo ti koli na Sichem; lo tene na ala nga na afami kue ti âta ti lo ti koli:*  “Pardon, ala hunda akota zo kue ti kodro* ti Sichem, ala tene: ‘So wa la ala ye? Ala ye ti tene amolenge ti Jérubbaal 70 kue+ la akomande na ndö ti ala? wala gï zo oko la akomande na ndö ti ala? Nga ala girisa pëpe so mbi yeke fami* ti ala.’”  Tongaso, aita ti mama ti lo asara tënë ti lo na akota zo ti kodro ti Sichem kue; ni la ala ye ti mû peko ti Abimélek, ndali ti so ala tene: “So ita ti e la.”  Na pekoni, ala zi alê ti nginza ti argent 70 na yâ ti da* ti Baal-Bérith,+ ala mû ni na Abimélek, na lo mû nginza so lo futa na azo so ayeke duti gï senge nga so ayeke na sioni yanga ti tene ala mû peko ti lo.  Na peko ti ye so, lo gue na da ti babâ ti lo na Ophrah,+ lo fâ aita ti lo ti koli,+ akoli 70 so ayeke amolenge ti Jérubbaal; lo fâ ala na ndö ti tênë oko. Zo oko so asö kuâ ayeke Jotham, tanga ti molenge ti Jérubbaal ti koli, ndali ti so lo honde terê ti lo.  Na pekoni, akota zo ti kodro ti Sichem kue nga na azo ti Beth-Millo kue abungbi na terê ti kota keke so ayeke nduru na pilier so ayeke lani na Sichem, ala zia Abimélek gbia.+  Gï so Jotham amä tënë ti ye so asi, lo gue lo luti na li ti Hoto ti Guérizim,+ lo dekongo na azo ni, lo tene: “Ala akota zo ti kodro ti Sichem, ala mä mbi, si Nzapa amä ala.  “Mbeni lâ, akeke ague ti soro mbeni gbia ti komande na ndö ti ala. Ala tene na keke ti olive: ‘Komande na ndö ti e.’+  Me keke ti olive atene na ala: ‘Mbi doit ti zia sarango mafuta* ti mbi, so azo ayeke sara kua na ni ti mû gloire na Nzapa nga na azo, ti gue ti yengi terê ti mbi na ndö ti tanga ti akeke?’ 10  Tongaso, akeke atene na keke ti figue: ‘Ga mo komande na ndö ti e.’ 11  Me keke ti figue atene na ala: ‘Mbi doit ti zia apendere lengo ti mbi so anzere mingi so ti gue ti yengi terê ti mbi na ndö ti tanga ti akeke?’ 12  Akeke atene fadeso na keke ti vigne: ‘Ga mo komande na ndö ti e.’ 13  Me keke ti vigne atene na ala: ‘Mbi doit ti zia ti sigi na fini vin so ayeke zia ngia na bê ti Nzapa nga na azo ti gue ti yengi terê ti mbi na ndö ti akeke?’ 14  Ti hunzi na ni, tanga ti akeke atene na keke ti sisi: ‘Ga mo komande na ndö ti e.’+ 15  Na mango tënë so, keke ti sisi atene na akeke: ‘Tongana ala soro mbi biani ti ga gbia na ndö ti ala, ala ga ala duti na gbe ti dê ti mbi. Me tongana ala ye pëpe, zia wâ asigi na yâ ti keke ti sisi ni agbi akeke ti cèdre ti Liban.’ 16  “So ala soro Abimélek ti ga gbia so, ala sara ye na vuru bê nga na nengo zo la?+ Nzoni bê la ala sara na mbage ti Jérubbaal na azo ti da ti lo so? Ye so ala doit ti sara fade na mbage ti lo la ala sara so? 17  Na ngoi so babâ ti mbi atiri lani ndali ti ala,+ lo zia fini* ti lo na lê ti kuâ ti sö ala na maboko ti azo ti Madian.+ 18  Me laso, ala londo ti ke azo ti da ti babâ ti mbi, ala fâ amolenge ti lo ti koli, akoli 70, na ndö ti tênë oko.+ Na pekoni, ala zia Abimélek, molenge ti ngbâa ti lo ti wali,+ gbia na ndö ti akota zo ti kodro ti Sichem, gï ndali ti so lo yeke ita ti ala. 19  Tongana laso ala yeke sara ye na vuru bê nga na nengo zo na mbage ti Jérubbaal nga na azo ti da ti lo, zia ala duti na ngia ndali ti Abimélek, na lo nga lo duti na ngia ndali ti ala. 20  Me tongana a yeke tongaso pëpe, zia wâ alondo na Abimélek agbi akota zo ti Sichem nga na ti Beth-Millo;+ nga zia wâ alondo na akota zo ti Sichem nga na ti Beth-Millo agbi Abimélek.”+ 21  Na pekoni, Jotham+ akpe lo gue na Béer, lo sara kodro kâ ndali ti so mbeto ti ita ti lo Abimélek asara lo. 22  Abimélek akomande* na ndö ti Israël ngu ota. 23  Na pekoni, Nzapa azia si Abimélek na akota zo ti kodro ti Sichem ake terê* na popo ti ala, na ala sara ye na handa na mbage ti Abimélek. 24  Ye ni asi tongaso ti tene a kiri peko ti aye ti ngangu so a sara na amolenge ti Jérubbaal 70, ti tene ngbanga ti mênë ti ala aga na ndö ti ita ti ala Abimélek ndali ti so lo fâ ala,+ nga na ndö ti akota zo ti kodro ti Sichem ndali ti so ala mû maboko na lo ti fâ aita ti lo. 25  Tongaso, akota zo ti kodro ti Sichem atokua azo, ala honde terê ti ala na li ti ahoto ti ku lo, nga ala yeke nzi aye ti azo kue so ayeke hon na lege ni so. A si na mbeni ngoi, a sara tënë ni na Abimélek. 26  Gaal, molenge ti Ébed, nga na aita ti lo ague na kodro ti Sichem,+ na akota zo ti Sichem azia bê ti ala kue na ndö ti lo. 27  Ala gue na yâ ti yaka ti ala, ala bungbi alê ti vigne, ala pete vin nga ala sara matanga; na pekoni ala gue na yâ ti da ti nzapa ti ala,+ ala te ye, ala nyon ye nga ala deba Abimélek. 28  Na pekoni, Gaal, molenge ti Ébed, atene: “Abimélek ni ayeke zo wa? Nga Sichem ni ayeke zo wa si e sara kua na lo? Lo yeke molenge ti Jérubbaal ape?+ Nga Zébul la ayeke zo ti tokua ti lo ape? Ala sara kua na amolenge ti Hamor, babâ ti Sichem. Me ndani nyen ti tene e sara kua na Abimélek? 29  Tongana fade mbi la mbi komande na ndö ti azo so, ka mbi zi Abimélek na ndö ti ala.” Na pekoni lo tene na Abimélek: “Sara si aturugu ti mo akiri aga gbani, mo ga mo wara mbi.” 30  Tongana Zébul so ayeke mokonzi ti gbata ni amä tënë so Gaal molenge ti Ébed atene, ngonzo agbu lo ngangu. 31  Ni la lo tokua azo na hondengo ni* na Abimélek, lo tene: “Bâ, Gaal, molenge ti Ébed, na aita ti lo ayeke na ndembe so na Sichem; ala yeke pusu azo ti gbata ni ti ke mo. 32  Londo na bï, mo na azo ti mo, ala ga ala honde terê ti ala na yâ ti ngonda. 33  Na ndapre ni, gï na sigingo ti lâ, londo hio mo sara bira na azo ti gbata ni; tongana lo na azo ti lo aga ti sara bira na mo, sara kue ti sö benda na ndö ti lo.”* 34  Tongaso, Abimélek na azo kue so amû peko ti lo alondo na bï, ala kangbi yâ ti terê ti ala na groupe osio, na ala honde terê ti ala ti sara bira na Sichem. 35  Na ngoi so, Gaal, molenge ti Ébed, asigi lo luti na yanga ti gbagba ti gbata ni, Abimélek na azo so amû peko ti lo alondo na ndo so ala honde terê ti ala dä so, ala sigi. 36  Tongana Gaal abâ azo ni, lo tene na Zébul: “Bâ, azo alondo na li ti ahoto ala yeke descend.” Me Zébul atene na lo: “Gï senge gbe ti dê ti ahoto la mo bâ mo tene azo so.” 37  Kete na pekoni, Gaal atene: “Bâ, azo la alondo na milieu ti kodro ni si ayeke descend so; na mbeni groupe ti azo amû lege ti kota keke ti Méonénim la ayeke ga.” 38  Zébul atene na lo: “Mo pika kate ti mo ni fade mo tene: ‘Abimélek ni ayeke zo wa si e sara kua na lo?’+ Azo so mo ke ala so la ape? Gue fadeso mo tiri na ala.” 39  Tongaso, Gaal atï na devant ti akota zo ti kodro ti Sichem, na ala tiri na Abimélek. 40  Abimélek atomba peko ti Gaal, na Gaal akpe na gbele lo; a fâ gbâ ti azo ni juska na yanga ti gbagba ti gbata ni. 41  Abimélek angbâ ti sara kodro na Arumah; na Zébul+ atomba Gaal na aita ti lo na yâ ti kodro ti Sichem. 42  Na ndade ni, azo ni ague na yâ ti ngonda; Abimélek amä tënë ni. 43  Tongaso, lo mû azo ni, lo kangbi yâ ti ala na groupe ota, na ala honde terê ti ala na yâ ti ngonda. Na ngoi so lo bâ azo ti gbata ni so ayeke sigi, lo londo na terê ti ala, lo fâ ala. 44  Abimélek na groupe ti azo so ayeke na lo akpe ague aluti na yanga ti gbagba ti gbata ni; na ngoi ni so, tanga ti agroupe use ni ague atiri na azo so ayeke na yâ ti ngonda so, na ala fâ azo ni. 45  Abimélek asara bira na azo ti gbata ni na yâ ti lango ni so kue, na lo mû gbata ni. Lo fâ azo ti yâ ni, lo kungbi ada ti gbata ni na sese+ nga lo tuku ingo na ndö ti sese ni. 46  Tongana akota zo ti tour ti Sichem kue amä tënë ni, hio ala kpe ala lï na yâ ti ndo ti batango terê* so ayeke na yâ ti da* ti El-Bérith.+ 47  Gï so a tene na Abimélek so akota zo ti tour ti Sichem kue abungbi na ndo oko, 48  Abimélek na azo kue so amû peko ti lo amonté na ndö ti Hoto ti Zalmon. Abimélek amû dö na maboko ti lo, lo fâ maboko ti keke, na lo yô ni na ndö ti go ti lo. Lo tene na azo so ayeke na lo: “Ye so mbi sara, ala nga ala sara ni hio!” 49  Tongaso, azo ni kue afâ nga amaboko ti keke na ala mû peko ti Abimélek. Na pekoni, ala zia amaboko ti keke ni na terê ti ndo ti batango terê ni, ala bi wâ dä. Azo kue so ayeke na yâ ti tour ti Sichem akui nga; a yeke akoli na awali 1 000 tongaso. 50  Na pekoni, Abimélek ague na kodro ti Thébez; lo sara camp na terê ti Thébez na lo mû ni. 51  Mbeni ngangu tour ayeke na milieu ti gbata ni, na akoli, awali nga na akota zo kue ti gbata ni akpe ague dä. Ala kanga yanga ni na peko ti ala, na ala monté na li ti tour ni. 52  Abimélek awara lege ti si na terê ti tour ni, lo sara bira na ni. Lo ga nduru na yanga ti tour ni ti bi wâ na terê ni. 53  Mbeni wali amû tênë ti nekango na ye, lo bi ni si a tï na li ti Abimélek, a kungbi bio ti li ti lo.+ 54  Lo iri wakua ti lo so ayô aye ti bira ti lo ti ga hio, na lo tene na lo: “Gboto épée ti mo, mo fâ mbi, si a tene pëpe, a tene: ‘Wali la afâ lo.’” Na wakua ti lo ni akpo lo na épée si lo kui. 55  Tongana azo ti Israël abâ so Abimélek akui awe, ala kue akiri na ndo ti ala. 56  A yeke tongaso si Nzapa akiri na Abimélek peko ti sioni so lo sara na babâ ti lo na lege so lo fâ aita ti lo ti koli 70.+ 57  Nzapa asara nga si sioni kue so azo ti Sichem asara akiri na li ti ala wani. Tongaso, deba so Jotham,+ molenge ti Jérubbaal,+ airi na ndö ti ala agbu ala.

Kete tënë

Na Hébreu: “fami ti azo ti da ti babâ ti mama ti lo.”
A lingbi nga ti tene “awa ti asese.”
Wala “mênë.”
Wala “temple.”
Wala “alengo.”
Wala “âme.”
Wala “asara terê ti lo tongana mokonzi.”
Na Hébreu: “Nzapa atokua mbeni sioni yingo.”
Wala “na manière.”
Wala “sara na lo ye kue so maboko ti mo apeut ti sara na lo.”
Wala “ngangu gbagba.”
Wala “temple.”