Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aJuge 8:1-35

LI TI ATËNË NI

  • Azo ti Éphraïm apapa na Gédéon (1-3)

  • A tomba peko ti agbia ti Madian na a fâ ala (4-21)

  • Gédéon ake ti duti gbia (22-27)

  • Nduru tënë na ndö ti gigi ti Gédéon (28-35)

8  Azo ti Éphraïm atene na Gédéon: “Nyen la mo sara na e tongaso so? Na ngoi so mo gue ti sara bira na azo ti Madian,+ ngbanga ti nyen mo iri e ape?” Na ala papa na lo ngangu.+  Me lo tene na ala: “Ye so mbi sara alingbi na ye so ala sara? Eskê tanga ti alê ti vigne ti azo ti Éphraïm+ so angbâ si a ro ni ayeke nzoni ahon alê ti vigne kue ti azo ti Abiézer so a ro ni na ngoi ti kongo lê ti kobe ape?+  Nzapa azia Oreb na Zéeb, amokonzi ti Madian, na maboko ti ala.+ Ye so mbi sara alingbi na ti ala?” Tongana lo sara tënë tongaso,* bê ti ala adë.*  Gédéon asi na Ngu ti Jourdain, lo fâ ngu ni. Lo na azo 300 so ayeke na terê ti lo awoko kue, me ala ngbâ gï ti tomba peko ti azo ni.  Lo tene na azo ti Succoth: “Pardon, ala mû mbeni mapa na azo so amû peko ti mbi, ndali ti so ala woko kue awe, nga mbi ngbâ ti tomba peko ti Zébah na Zalmunna, agbia ti Madian.”  Me amokonzi ti Succoth atene: “Zébah na Zalmunna* ayeke na maboko ti mo awe si e mû mapa na aturugu ti mo?”  Na mango tënë so, Gédéon atene: “Nzoni, tongana Jéhovah azia Zébah na Zalmunna na maboko ti mbi awe, mbi yeke mû akeke ti sisi na akî ti benyama ti pika na ala ngangu.”+  Lo londo kâ, lo monté na Penuel, lo hunda gï oko ye na ala, me azo ti Penuel atene gï oko tënë so azo ti Succoth atene.  Lo tene na azo ti Penuel: “Tongana mbi kiri na siriri, mbi yeke kungbi tour ti ala na sese.”+ 10  Zébah na Zalmunna na aturugu ti ala 15 000 tongaso ayeke na Carcor. So ayeke tanga ti aturugu kue ti azo ti Est so angbâ la,+ ndali ti so akoli 120 000 so ayeke na épée la akui. 11  Gédéon angbâ ti monté na lege ti azo so alango na yâ ti atente, so ayeke na est ti Nobah nga na Jogbéah,+ na lo sara bira na camp ti ala; andâ azo ni aleke terê ti ala ti sara bira pëpe. 12  Tongana Zébah na Zalmunna akpe, lo tomba peko ti Zébah na Zalmunna, agbia use ti Madian, lo gbu ala, na ye so asara si li ti azo ti camp ni kue aga kirikiri. 13  Gédéon molenge ti Joash alondo na bira ni ti kiri; lo mû lege so ahon ti gue na Hérés. 14  Na lege, lo gbu mbeni maseka-koli so ayeke zo ti Succoth, na lo hunda lo. Tongaso, maseka ni asû na mbeti iri ti amokonzi nga na a-ancien ti Succoth, akoli 77, na lo mû ni na lo. 15  Lo gue lo wara azo ti Succoth, na lo tene: “Zébah na Zalmunna ni la, so ala gi yanga ti mbi ndali ti ala, ala tene: ‘Zébah na Zalmunna* ayeke na maboko ti mo awe si e mû mapa na azo ti mo so awoko kue?’”+ 16  Na pekoni, lo mû a-ancien ti gbata ni, lo pika ala na akeke ti sisi na akî ti benyama ti tene li ti azo ti Succoth aga dä.+ 17  Nga, lo kungbi tour ti Penuel+ na sese, na lo fâ akoli ti gbata ni. 18  Lo hunda Zébah na Zalmunna, lo tene: “Akoli so ala fâ ala na Tabor ayeke tongana nyen?” Ala tene: “Ala yeke tongana mo, zo oko oko kue akpa molenge ti mbeni gbia.” 19  Lo tene na ala: “Aita ti mbi la ala fâ ala so, amolenge ti mama ti mbi. Ti tâ tënë ni, so Jéhovah ayeke na fini, tongana fade ala zia ala ngbâ na fini, ka mbi yeke fâ ala pëpe.” 20  Lo tene na kozo molenge ti lo Jéther: “Londo, mo fâ ala!” Me maseka-koli ni asigi na épée ti lo pëpe; mbeto asara lo, ndali ti so lo de maseka mingi. 21  Tongaso, Zébah na Zalmunna atene: “Mo la mo londo mo fâ e, ndali ti so a hinga koli na ngangu ti lo.” Ge la, Gédéon alondo lo fâ Zébah na Zalmunna;+ nga lo mû aye ti baba so akpa nze, so ayeke na go ti achameau ti ala. 22  Mbeni lâ, azo ti Israël atene na Gédéon: “Komande na ndö ti e, mo, molenge ti mo ti koli nga na âta ti mo ti koli, ndali ti so mo sö e na maboko ti azo ti Madian.”+ 23  Me Gédéon atene na ala: “Mbi yeke komande na ndö ti ala pëpe, nga molenge ti mbi ti koli ayeke komande na ndö ti ala pëpe. Jéhovah la ayeke komande na ndö ti ala.”+ 24  Gédéon akiri atene: “Mbi ye ti hunda mbeni ye na ala: Mbi ye si zo oko oko na popo ti ala amû na mbi mbeni bague ti hôn na popo ti aye so lo gbu na bira.” (Ala yeke na abague ti hôn ti lor, ndali ti so ala yeke azo ti Ismaël.)+ 25  Ala tene: “E yeke mû ni na mo.” Tongaso, ala gbara yâ ti mbeni yongoro bongo, na zo oko oko amû bague ti hôn na popo ti aye so lo gbu na bira, lo bi ni na ndö ti bongo ni. 26  Nengo ti abague ti hôn ti lor so lo hunda asi sicle* ti lor 1 700; a mû na lo nga aye ti baba so akpa nze, aye so a zia na terê ti ye ti go, abongo ti gbia ti Madian so a sara ni na laine ti violet nga na aye ti go so ayeke na go ti achameau.+ 27  Gédéon amû ni, lo sara na mbeni éphod,+ lo zia ni na gbata ti lo Ophrah+ si azo kue abâ ni; azo ti Israël kue asara ndumba na ni kâ, na lege ti yingo,+ na a ga mbeni kûkû ti gbungo Gédéon na azo ti da ti lo.+ 28  A yeke tongaso si azo ti Israël asö benda na ndö ti azo ti Madian,+ na ala gi yanga ti* azo ti Israël encore ape; na ngoi ti Gédéon, kodro ni aduti na siriri* ngu 40.+ 29  Jérubbaal+ molenge ti Joash akiri na ndo ti lo, na lo ngbâ kâ. 30  Gédéon adü amolenge ti koli 70,* ndali ti so lo yeke na gbâ ti awali. 31  Mbeni wali ti lo ti use ndo so asara kodro na Sichem adü na lo mbeni molenge ti koli, na lo zia iri ti lo Abimélek.+ 32  Gédéon, molenge ti Joash, aga mbakoro mingi si lo kui; a lu lo na ndo so a lu babâ ti lo Joash dä, na kodro ti Ophrah ti azo ti mara ti Abiézer.+ 33  Gï so Gédéon akui, azo ti Israël akiri asara ndumba na lege ti yingo na aBaal,+ na ala soro Baal-Bérith ti ga nzapa ti ala.+ 34  Azo ti Israël adabe ti ala pëpe na Jéhovah Nzapa ti ala,+ lo so azi ala lani na maboko ti awato ti ala kue so angoro ala;+ 35  nga, ala fa tâ ndoye pëpe na mbage ti azo ti da ti Jérubbaal, wala Gédéon, na peko ti anzoni ye kue so lo sara ndali ti Israël.+

Kete tënë

Na Hébreu: “tene tënë so.”
Na Hébreu: “yingo ti ala adë na terê ti lo.”
Na Hébreu: “Yâ ti maboko ti Zébah na ti Zalmunna.”
Na Hébreu: “Yâ ti maboko ti Zébah na ti Zalmunna.”
Sicle oko ane gramme 11,4. Bâ na B14.
Na Hébreu: “ala yô li ti ala na nduzu na terê ti.”
Wala “awu terê ti lo.”
Na Hébreu: “ayeke na amolenge-koli 70 so asigi na yâ ti cuisse ti lo.”