Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aJuge 6:1-40

LI TI ATËNË NI

  • Madian asara pasi na azo ti Israël (1-10)

  • Mbeni ange adë bê ti Juge Gédéon (11-24)

  • Gédéon afâ yâ ti gbalaka ti Baal (25-32)

  • Yingo ti Nzapa asara kua na ndö ti Gédéon (33-35)

  • Tënë ti poro ti terê ti taba (36-40)

6  Me azo ti Israël akiri asara ye so ayeke sioni na lê ti Jéhovah;+ tongaso, Jéhovah azia ala na maboko ti azo ti Madian ngu mbasambala.+  Maboko ti Madian akomande ngangu na ndö ti azo ti Israël.+ Ndali ti azo ti Madian, azo ti Israël aleke ando ti hondengo terê dä* na yâ ti ahoto, na yâ ti adû ti tênë nga na yâ ti ando so a yeke ngangu ti tene zo asi dä.+  Tongana azo ti Israël alu alê ti kobe, azo ti Madian, azo ti mara ti Amalec+ nga na azo ti mbage ti Est+ ayeke ga ti sara bira na ala.  Ala yeke sara camp na terê ti azo ti Israël ti tiri na ala, ala yeke buba akobe ti kodro ni juska na Gaza, na ala yeke zia ye oko pëpe na azo ti Israël ti tene ala te; ala yeke zia taba wala bagara wala kororo na ala pëpe.+  Na gango ti ala, ala yeke ga na anyama ti ala nga na atente gbani gbani tongana agbadora.+ A lingbi ti diko wungo ti ala na achameau ti ala pëpe;+ ala yeke ga na yâ ti kodro ni ti futi ni.  Tongaso, ndali ti azo ti Madian, azo ti Israël atï na yâ ti kota yere; na ala iri Jéhovah ti mû maboko na ala.+  Na ngoi so azo ti Israël airi Jéhovah ti mû maboko na ala ndali ti azo ti Madian,+  Jéhovah atokua mbeni prophète na azo ti Israël na lo tene na ala: “Jéhovah Nzapa ti Israël atene: ‘Mbi mû ala na Égypte, ndo so ala sara lani ngbâa dä, mbi sigi na ala.+  Tongaso, mbi zi ala na maboko ti azo ti Égypte nga na maboko ti azo kue so ayeke sara ye ti ngangu na ala, mbi tomba azo ni so na gbele ala nga mbi mû na ala sese ti azo ni.+ 10  Nga, mbi tene na ala, mbi tene: “Mbi yeke Jéhovah Nzapa ti ala.+ Azo ti mara ti Amori so ala yeke sara kodro na sese ti ala so, ala kpe mbeto ti anzapa ti ala pëpe.”+ Me ala mä mbi pëpe.’”*+ 11  Mbeni lâ, ange ti Jéhovah aga,+ lo duti na gbe ti kota keke so ayeke na Ophrah, so ayeke ti Joash, zo ti mara ti Abiézer.+ Molenge ti lo Gédéon+ ayeke pika alê ti blé na yâ ti dû ti sarango na vin ti honde ni si azo ti Madian abâ ni pëpe. 12  Ange ti Jéhovah asi na lo, lo tene: “Mo, ngangu zo ti bira, Jéhovah ayeke na mo.”+ 13  Gédéon angbâ atene na lo: “Pardon, seigneur ti mbi; tongana Jéhovah ayeke na e, a sara tongana nyen si aye so kue asi na e so?+ Akusala ti dongo bê so ababâ ti e asara tënë ni na e so ayeke na ndo wa?+ Ababâ ti e atene na e, atene: ‘Jéhovah la amû e na kodro ti Égypte lo sigi na e ape?’+ Me ti fadeso, Jéhovah ake e awe,+ na lo zia e na maboko ti azo ti Madian.” 14  Jéhovah abâ lo lê na lê, na lo tene: “Gue na ngangu so mo yeke na ni so, na mo yeke sö ande azo ti Israël na maboko ti azo ti Madian.+ Mbi la mbi tokua mo.” 15  Gédéon atene na lo: “Pardon Jéhovah. Mbi yeke sö azo ti Israël tongana nyen? Na yâ ti mara ti Manassé, mara* ti mbi la ayeke kete mingi, nga na yâ ti da ti babâ ti mbi, mbi la mbi yeke kete mingi.” 16  Me Jéhovah atene na lo: “So mbi yeke duti ande na terê ti mo,+ mo yeke sö benda na ndö ti azo ti Madian, mo bâ mo tene ala yeke zo oko.” 17  Na pekoni, Gédéon atene na lo: “Tongana mbi nzere na lê ti mo, sara mbeni ye ti fa na mbi so mo la mo yeke sara tënë na mbi so. 18  Pardon, mo hon pëpe juska mbi kiri ge na matabisi, na mbi zia ni na gbele mo.”+ Tongaso, lo tene: “Mbi yeke ngbâ ge juska mo kiri si.” 19  Gédéon ague, lo mû ngasa so akono awe na lo leke kobe, nga lo mû épha* ti farine, lo sara na mapa so a sara na levure pëpe.+ Lo zia nyama ti ngasa ni na yâ ti sakpa nga lo zia soupe ni na yâ ti tawa; na lo ga na ni na gbele lo na gbe ti kota keke ni. 20  Ange ti tâ Nzapa atene na lo, atene: “Mû nyama ni nga na mapa so a sara na levure pëpe so, mo zia ni na ndö ti kota tênë so kâ so, mo tuku soupe ni dä.” Na Gédéon asara tongaso. 21  Na pekoni, ange ti Jéhovah ayôro keke so ayeke na maboko ti lo, lo ndu nyama ni nga na mapa ni; wâ asigi na yâ ti tênë ni agbi nyama ni na mapa ni kue.+ Ange ti Jéhovah angbâ agirisa na lê ti Gédéon. 22  Ge la, Gédéon ahinga so a yeke ange ti Jéhovah la.+ Hio, Gédéon adekongo, lo tene: “Mawa na mbi, Jéhovah, Seigneur ti dunia kue, ndali ti so mbi bâ ange ti Jéhovah lê na lê!”+ 23  Me Jéhovah atene na lo: “Duti na siriri. Sara mbeto pëpe,+ mo yeke kui pëpe.” 24  Tongaso, Gédéon aleke mbeni gbalaka kâ teti Jéhovah, na a iri ni Jéhovah-Shalom*+ juska laso. A ngbâ na Ophrah, kodro ti azo ti mara ti Abiézer. 25  Na bï ni so, Jéhovah atene na lo: “Mû koli-bagara ti babâ ti mo so ade ti kono kue pëpe, use koli-bagara ni so ayeke na ngu mbasambala, na mo kungbi na sese gbalaka ti Baal so babâ ti mo aleke nga mo dë na sese yongoro yanda* so ayeke na terê ti gbalaka ni.+ 26  Mû atênë, mo leke ni na molongo ti tene aduti gbalaka teti Jéhovah Nzapa ti mo na li ti hoto so; na pekoni, mû use koli-bagara ni mo yâa na sandaga so a zö ni agbi kue na ndö ti anduru keke ti yongoro yanda* so mo dë ni na sese.” 27  Tongaso, Gédéon amû akoli bale-oko na popo ti awakua ti lo na lo sara kua so Jéhovah ahunda na lo ti sara. Me so mbeto ti azo ti da ti babâ ti lo nga na ti azo ti gbata ni asara lo mingi, lo sara ni na kota lâ pëpe me na bï. 28  Tongana azo ti gbata ni azingo hio na ndapre, ala bâ so a kungbi gbalaka ti Baal na sese, a dë na sese yongoro yanda* so ayeke na terê ti gbalaka ni, nga a mû use koli-bagara ni na sandaga awe na ndö ti fini gbalaka so a leke ni. 29  Ala hunda terê na popo ti ala, ala tene: “Zo wa la asara ye so zo wa?” Tongana ala gi nda ti ye ni nzoni awe, ala tene: “Gédéon, molenge ti Joash, la asara ye so.” 30  Azo ti gbata ni atene na Joash: “Sigi na molenge ti mo si a fâ lo, ndali ti so lo kungbi gbalaka ti Baal na sese nga lo dë na sese yongoro yanda* so ayeke na terê ti gbalaka ni.” 31  Joash+ atene na azo kue so alondo na terê ti lo so: “Ala la adoit ti gbu koko ti Baal ni? Ala la adoit ti sö lo? Zo so agbu koko ti lo, a doit ti fâ lo na ndapre so.+ Tongana lo yeke mbeni nzapa, zia lo wani lo gbu koko ti lo,+ ndali ti so mbeni zo akungbi gbalaka ti lo na sese.” 32  Na lango ni so, lo iri Gédéon Jérubbaal,* na lo tene: “Zia Baal wani agbu koko ti lo, ndali ti so mbeni zo akungbi gbalaka ti lo na sese.” 33  Azo ti Madian kue,+ azo ti mara ti Amalec kue+ nga na azo ti mbage ti Est kue abungbi aturugu ti ala oko,+ ala fâ ngu ala gue na Popo-hoto* ti Jizréel na ala sara camp ti ala kâ. 34  Yingo ti Jéhovah aga na ndö ti Gédéon+ na lo hûru didi;+ na azo ti mara ti Abiézer+ amû peko ti lo. 35  Lo tokua ndo na yâ ti kodro ti azo ti Manassé kue, na ala nga amû peko ti lo. Lo tokua nga ndo na yâ ti kodro ti azo ti Aser, ti Zabulon nga na ti Nephtali, na ala ga ti wara terê na lo. 36  Na pekoni, Gédéon atene na tâ Nzapa: “Tongana mo yeke sö azo ti Israël na lege ti mbi tongana ti so mo tene,+ 37  bâ, mbi yeke zia poro ti terê ti taba na sese na place ti pikango lê ti kobe. Tongana ngu ti pere atï gï na ndö ti poro ni, me tanga ti sese ni kue angbâ na hulengo ni, mbi yeke hinga so mo yeke sö azo ti Israël na lege ti mbi tongana ti so mo tene.” 38  Na ye ni asi tongaso. Na ndade ni, tongana lo zingo hio na ndapre si lo pete poro ti terê ti taba ni, ngu ti pere so asigi dä asi kota dû ti sembe. 39  Ye oko, Gédéon atene na tâ Nzapa: “Zia ngonzo ti mo alondo tongana wâ na terê ti mbi pëpe, me mbi ye ti kiri ti hunda mbeni ye na mo. Pardon, mbi ye si mo sara gï mbeni ye oko awe na poro ti taba ni. Pardon, mbi ye si gï poro ni la ahule, me tanga ti sese ni kue ayeke gï ngu.” 40  Nzapa asara tongaso na bï ni so; gï poro ni la ahule, me sese ni kue ayeke gï na ngu ti pere.

Kete tënë

A lingbi nga ti tene “ando na gbe ti sese so a yeke bata aye dä.”
Na Hébreu: “ala mä go ti mbi pëpe.”
Na Hébreu: “saki oko.”
Litre 22 tongaso. Bâ na B14.
Ndani aye ti tene “Jéhovah ayeke siriri.”
Ndani aye ti tene “Zia Baal agbu koko ti lo wani na gbe ti ngbanga.”
Wala “Kpangbala ndo.”