Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aJuge 5:1-31

LI TI ATËNË NI

  • Bia ti songo benda so Déborah na Barak ahe ni (1-31)

    • Atongoro atiri na Siséra (20)

    • Ngu ti Kishon so asua ngangu (21)

    • Azo so aye Jéhovah ayeke tongana lâ (31)

5  Na lango ni so, Déborah+ na Barak+ molenge ti Abinoam ahe bia,+ atene:   “Ndali ti azo ti Israël so azia yâ ti kuä ti li ti ala gï tongaso* nga ndali ti azo so alondo na bê ti ala wani ti sara ye,+ ala sepela Jéhovah!   Agbia, ala mä tënë so si! Azo ti komande, ala dengi mê ti ala! Mbi yeke he bia na Jéhovah. Mbi yeke he bia ti sepela* Jéhovah+ Nzapa ti Israël.+   Jéhovah, na ngoi so mo londo na Séir mo sigi,+ na ngoi so mo londo na sese ti Édom mo tambela ti sigi, sese ayengi nga ngu apika mingi, ngu ti yâ ti ambinda atï ngangu.   Ahoto amû wâ aga ngu* na gbele Jéhovah,+ même Hoto ti Sinaï amû wâ aga ngu na gbele Jéhovah+ Nzapa ti Israël.+   Na ngoi ti Shamgar,+ molenge ti Anath, na ngoi ti Jaël,+ ndö ti akota lege adë dengo; azo so asara voyage amû akete lege ti ndo ni.   Azo ti akete kodro ti Israël ayeke lani dä encore ape, ala yeke dä encore ape, juska na ngoi so mbi Déborah+ mbi londo, juska na ngoi so mbi londo tongana mama na sese ti Israël.+   Ala soro afini nzapa+ ti voro ni; na pekoni bira alondo na yâ ti gbagba ti gbata ni.+ A wara vala oko wala likongo oko pëpe na popo ti azo 40 000 na Israël.   Bê ti mbi ayeke na ndö ti azo so akomande na Israël+ so ayeda na bê ti ala wani ti gue na azo ni.+ Ala sepela Jéhovah! 10  Ala so akpe na akororo so abe kete, ala so aduti na ndö ti apendere tapis nga na ala so atambela na ndö ti lege, ala gbu li si! 11  Na ando so azo ague ti tö ngu dä, a mä go ti azo so akangbi ngu; kâ, ala fa peko ti akusala ti mbilimbili so Jéhovah asara, akusala ti mbilimbili ti azo ti Israël so ayeke na yâ ti akete kodro. Na pekoni, awakua ti Jéhovah adescend na ayanga ti gbagba ti gbata ni. 12  Déborah, zingo, zingo si!+ Zingo, zingo, mo he bia!+ Barak, londo!+ Mo molenge ti Abinoam, hon na azo so mo gbu ala! 13  Na pekoni, azo so a gbu ala pëpe adescend na ndo ti akota zo ti kodro; azo ti Jéhovah adescend awara mbi si e gue e tiri na awangangu. 14  Azo so ayeke na yâ ti popo-hoto* ayeke azo ti Éphraïm; ala mû peko ti mo, Benjamin, ala tambela na popo ti azo ti mo. Amokonzi ti aturugu alondo na Makir+ adescend, nga ala so kua ti ala ayeke ti mû azo na kua ti turugu* alondo na Zabulon adescend. 15  Amokonzi ti mara ti Issacar ague legeoko na Déborah; Barak asara tongana ti so azo ti Issacar asara.+ A tokua lo ti gue na gere na yâ ti popo-hoto.*+ Na popo ti azo ti mara ti Ruben so agroupe ti ala ayeke nde nde, azo angbâ ti gi bê ti ala mingi na ndö ti desizion so ala doit ti mû. 16  Nyen la si mo duti na popo ti abozo use so a zia na ndö ti akororo so? Si mo yeke mä azo so ayeke hûru flûte ndali ti anyama so?+ Azo ti Ruben so agroupe ti ala ayeke nde nde angbâ ti gi bê ti ala mingi na ndö ti desizion so ala doit ti mû. 17  Azo ti Galaad angbâ ti ala kâ na mbage ti Ngu ti Jourdain;+ nyen la si azo ti Dan angbâ na terê ti abateau so?+ Azo ti Aser aduti gï senge na yanga ti ngu-ingo, na ala ngbâ na terê ti aport.*+ 18  Azo ti Zabulon azia fini ti ala na lê ti kuâ;* azo ti Nephtali asara nga tongaso+ na ando so ayeke na nduzu mingi.+ 19  Agbia aga, na ala tiri; na pekoni agbia ti Canaan atiri+ na Taanak, so ayeke na terê ti angu ti Méguiddo.+ Ala wara lege ti mû argent na peko ti bira ni pëpe.+ 20  Atongoro angbâ na yayu kâ, ala tiri; ala ngbâ na ndo so ala yeke ngoro ka dä, ala tiri na Siséra. 21  Ngu ti Kishon so asua ngangu amû ala ahon na ni,+ ngu so ayeke dä ngbene ye giriri, ngu ti Kishon so asua ngangu. Âme* ti mbi, mo tambela na ndö ti awangangu. 22  Na pekoni, gere ti ambarata apika sese ngangu na ngoi so ambarata ti lo akpe loro ngangu mingi.+ 23  Ange ti Jéhovah atene: ‘Deba aga na ndö ti kodro ti Méroz, na ndö ti azo ni, ndali ti so ala ga pëpe ti mû maboko na Jéhovah, ala ga pëpe na terê ti awangangu ti mû maboko na Jéhovah.’ 24  Tufa ayeke na ndö ti Jaël,+ wali ti Héber,+ zo ti mara ti Kéni, ahon tanga ti awali kue; tufa ayeke na ndö ti lo ahon tanga ti awali kue so alango na yâ ti atente. 25  Lo hunda ngu ti nyongo ni, me lo mû na lo lait. lo mû na lo pendere ngu ti me ti bagara* na yâ ti pendere dû ti sembe.+ 26  Lo yôro maboko ti lo, lo mû piquet, lo yôro maboko ti lo ti koli, lo mû marteau ti azo ti kua. Lo pika yâ ti li ti Siséra na ni, lo kungbi yâ ti abio ti li ti lo; lo pika li ti lo, lo kôro yâ ni.+ 27  Lo tï na sese na popo ti gere ti wali so; lo tï lo ngbâ gï place oko; lo tï na popo ti gere ti lo; lo kui gï na ndo so lo tï lo lango dä so. 28  Mbeni wali abâ ndo na lê ti fenêtre, mama ti Siséra abâ ndo na yâ ti adû ti fenêtre, lo tene: ‘Nyen la si puse ti mbarata ti lo ade ti ga ape so? Nyen la si ade mbi mä toto ti gere ti ambarata ti lo ape so?’+ 29  Awali ti yâ ti yangbo ti gbia so ayeke na ndara mingi akiri tënë na lo; lo nga kue, lo yeke tene na bê ti lo wani, 30  lo tene: ‘Âmanke ala ngbâ ti kangbi yâ ti aye so ala gbu ni; zo ti bira oko oko awara maseka-wali oko, même use. A mû na Siséra atissu so a zia midon na terê ni, atissu so midon ayeke na terê ni, bongo so a kpo dessin na terê ni, tissu so a zia midon na terê ni, bongo use so a kpo dessin na terê ni ti tene azo so agbu ni abi ni na go ti ala.’ 31  Jéhovah, zia si awato ti mo kue akui tongaso,+ me zia si azo so aye mo aduti tongana lâ so asigi na yâ ti gloire ti lo.” Na pekoni, kodro ni aduti na siriri* ngu 40.+

Kete tënë

Wala “aturugu so azia yâ ti kuä ti li ti ala gï tongaso.”
Wala “pika mozoko na.”
A lingbi nga ti tene “ayengi.”
Wala “kpangbala ndo.”
A lingbi nga ti tene “ala so ayeke sara kua na ye ti kua ti wakuasu.”
Wala “kpangbala ndo.”
Wala “ando so abateau ayeke luti dä.”
Wala “ake âme ti ala.”
Wala “lo mû na lo beurre.”
Wala “awu terê ti lo.”