Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aJuge 3:1-31

LI TI ATËNË NI

  • Jéhovah atara Israël (1-6)

  • Othniel, kozo juge (7-11)

  • Juge Éhud afâ Gbia Églon so akono mingi (12-30)

  • Jude Shamgar (31)

3  So ayeke amara so Jéhovah azia si ala ngbâ na sese ni si ala lingbi ti tara azo ti Israël kue so ade amû mbage na yâ ti bira na sese ti Canaan pëpe+  (si azo ti Israël so a dü ala na pekoni amû mbage na yâ ti bira, azo so ahinga sarango bira kozo pëpe amanda ni). Amara ni so ayeke:  aseigneur oku ti aPhilistin,+ azo ti Canaan kue, azo ti Sidon+ nga na azo ti Hévi+ so asara kodro na ndö ti Hoto ti Liban,+ a londo na Hoto ti Baal-Hermon a si juska na Lebo-Hamath.*+  Ala ga mbeni ye so amû lege ti tara azo ti Israël ti bâ wala ala yeke bata ande acommandement ti Jéhovah so lo mû na akotara ti ala na lege ti Moïse.+  Tongaso, azo ti Israël asara kodro na popo ti azo ti Canaan,+ azo ti mara ti Heth, azo ti mara ti Amori, azo ti Périzzi, azo ti Hévi nga na azo ti mara ti Jébus.  Ala mû amolenge ti azo ni so ti ga awali ti ala, nga ala mû amolenge ti ala wani na amara so ti ga awali ti amolenge ti ala, na ala komanse ti voro anzapa ti amara so.+  Tongaso, azo ti Israël asara ye so ayeke sioni na lê ti Jéhovah, na ala girisa Jéhovah Nzapa ti ala, ala voro aBaal+ nga na ayongoro yanda.*+  Na bango ye so, ngonzo agbu Jéhovah ngangu na terê ti azo ti Israël, na lo zia ala na maboko ti Cushan-Rishathaïm, gbia ti Mésopotamie.* Azo ti Israël asara kua na Cushan-Rishathaïm ngu miombe.  Na ngoi so azo ti Israël airi Jéhovah ti mû maboko na ala,+ Jéhovah amû mbeni sauveur ti zi ala;+ a yeke Othniel,+ molenge ti Kénaz so ayeke ngambe ti Caleb ti koli. 10  Yingo ti Jéhovah aga na ndö ti lo,+ na lo ga juge ti azo ti Israël. Tongana lo gue ti sara bira, Jéhovah azia Cushan-Rishathaïm, gbia ti Mésopotamie,* na maboko ti lo na lo sö benda na ndö ti Cushan-Rishathaïm. 11  Na pekoni, kodro ni aduti na siriri* ngu 40. A si na mbeni ngoi, Othniel molenge ti Kénaz akui. 12  Azo ti Israël akiri asara ye so ayeke sioni na lê ti Jéhovah.+ Ni la Jéhovah azia si Églon, gbia ti Moab,+ asö benda na ndö ti azo ti Israël, ndali ti so ala sara ye so ayeke sioni na lê ti Jéhovah. 13  Lo sara nga si azo ti Ammon+ nga na ti Amalec+ aga na terê ti ala. Ala sara bira na azo ti Israël na ala mû gbata ti akeke ti mbûrü.+ 14  Azo ti Israël asara kua na Églon, gbia ti Moab, ngu 18.+ 15  Na pekoni, azo ti Israël atoto na Jéhovah ti mû maboko na ala,+ na Jéhovah amû na ala mbeni sauveur;+ a yeke Éhud+ molenge ti Guéra so ayeke zo ti mara ti Benjamin;+ lo yeke sara kua gï na maboko ti lo ti wali.+ Mbeni lâ, impôt so azo ti Israël adoit ti futa na Églon, gbia ti Moab, ala zia ni na maboko ti Éhud ti gue na ni. 16  Andâ Éhud aleke mbeni épée so yanga ni ayeke use, so ayo coudée* oko, na lo kanga ni na terê ti cuisse ti lo na mbage ti koli na gbe ti bongo ti lo. 17  Lo mû na Églon, gbia ti Moab, impôt ni. Églon akono mingi. 18  Tongana Éhud amû impôt ni na lo awe, lo tene na amba ti lo so ayô ye ni ti tene ala gue. 19  Me na ngoi so ala si na Guilgal+ na ndo so ayanda so a leke na kode ayeke dä,* lo kiri ti lo na ndo ti gbia ni, na lo tene: “Gbia, mbi yeke na mbeni tënë ti tene na mo gï mo oko.” Tongaso, gbia ni atene: “Ala duti kpô!” Ge, awakua ti lo kue azia lo, ala sigi. 20  Tongaso, Éhud ague na terê ti lo na ngoi so lo yeke duti gï lo oko na yâ ti chambre ti lo so ayeke na ndö ti li ti da ni, so yâ ni adë pendere. Éhud atene na lo: “Nzapa atokua mbi ti tene na mo mbeni tënë.” Ge, lo londo na ndö ti trône* ti lo. 21  Éhud ayôro maboko ti lo ti wali, lo gboto épée so lo kanga na terê ti cuisse ti lo na mbage ti koli, lo yôro na yâ ti gbia ni. 22  Keke ti zembe ni alï kue na yâ ti lo kâ, na mafuta amû ndö ni kue; Éhud agboto zembe ni pëpe, na puru ti gbia ni asigi. 23  Éhud asigi na gbe ti véranda,* lo kanga yanga ti chambre ni na peko ti lo na clé, na lo hon. 24  Na peko ti so lo hon awe, awakua ti gbia ni aga, ala bâ so ayanga ti chambre ni akanga na clé. Ni la ala tene: “Âmanke lo ngbâ na kabinë* na yâ ti dede ndo ti lo kâ.” 25  Ala ngbâ ti ku juska kamene asara ala; me tongana ala bâ so lo zi ayanga-da ni pëpe, ala mû clé, ala zi ni, na ala bâ kuâ ti seigneur ti ala la alango na sese so. 26  Na ngoi so ala ngbâ ti ku, Éhud akpe lo hon ndo so ayanda so a leke na kode ayeke dä,*+ lo si nzoni na Séirah. 27  Tongana lo si kâ, lo hûru didi+ na ndo so ahoto ayeke dä na Éphraïm;+ tongaso azo ti Israël alondo kâ ala yeke descend, na lo yeke na devant ti ala. 28  Na pekoni, lo tene na ala: “Ala mû peko ti mbi, ndali ti so Jéhovah azia awato ti ala, azo ti Moab, na maboko ti ala awe.” Tongaso, azo ni amû peko ti lo, na ala mû ndo so a yeke fâ Ngu ti Jourdain dä na gere, ti mû lege na ala ti gbu azo ti Moab; ala zia lege na zo oko pëpe ti fâ ngu ni. 29  Na ngoi ni so, ala fâ azo ti Moab 10 000 tongaso,+ ala kue ayeke angangu koli so mbeto ayeke na yâ ti ala pëpe; zo oko akpe pëpe.+ 30  A yeke tongaso si azo ti Israël asö benda na ndö ti azo ti Moab; na kodro ni aduti na siriri* ngu 80.+ 31  Na peko ti Éhud, Shamgar,+ molenge ti Anath, alondo, lo fâ aPhilistin 600+ na saworo;+ lo nga kue lo sö azo ti Israël.

Kete tënë

Wala “na lege ti lingo na Hamath.”
Na Hébreu: “Aram-Naharaïm.”
Na Hébreu: “Aram.”
Wala “awu terê ti lo.”
Peut-être kete coudée so ayo centimètre 38 tongaso. Bâ na B14.
A lingbi nga ti tene “ndo ti pikango atênë.”
Wala “ye ti duti.”
A lingbi nga ti tene “dû so a leke ni ti tene pupu alï dä.”
Na Hébreu: “lo yeke bi bongo na ndö ti gere ti lo.”
A lingbi nga ti tene “ndo ti pikango atênë.”
Wala “awu terê ti lo.”