Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aJuge 19:1-30

LI TI ATËNË NI

  • Sioni so azo ti Benjamin asara na terê ti mbeni wali na Guibéah (1-30)

19  Na ngoi ni so, tongana gbia ayeke na Israël pëpe,+ mbeni zo ti mara ti Lévi so asara kodro yongoro kâ na ndo so ahoto ayeke dä na Éphraïm+ amû mbeni wali ti Bethléhem+ ti Juda ti ga wali ti lo.  Me wali ni agi mbeni koli nde, na pekoni lo londo lo kiri na da ti babâ ti lo so ayeke na Bethléhem ti Juda. Lo ngbâ kâ nze osio.  Koli ti lo ague na peko ti lo ti sara tënë na lo si lo yeda ti kiri; lo mû zo ti kua ti lo ti koli nga na akororo use si lo gue na ni. Wali ni ague na lo na yâ ti da ti babâ ti lo. Na ngoi so babâ ti wali ni abâ lo, terê ti lo anzere ti wara terê na lo.  Kogara ti lo, babâ ti maseka-wali ni, ague na lo ngbii lo yeda ti ngbâ kâ lango ota; ala te ye na ala nyon ye, nga lo lango kâ.  Na lango osio ni, tongana ala londo hio na ndapre ti hon, babâ ti wali ni atene na kogara ti lo ni, atene: “Te ye, mo wara ngangu* awe si mo gue.”  Tongaso, ala duti, ala te ye na ala nyon ye, na pekoni babâ ti wali ni atene na koli ni: “Pardon, lango ge na bï so, mo sara ngia* si.”  Tongana koli ni alondo ti hon, kogara ti lo angbâ ti voro yanga na lo, tongaso lo kiri lo lango kâ.  Tongana lo londo hio na ndapre na oku lango ni ti hon, babâ ti wali ni atene: “Pardon, te ye, mo wara ngangu* awe si.” Ala ngbâ ala duti ngbii l’heure ahon, nga ala use kue angbâ ti te ye.  Tongana koli ni alondo ti tene lo, wali ti lo nga na zo ti kua ti lo ahon, kogara ti lo, babâ ti wali ni, atene na lo: “Bâ, lâ aga nduru ti kui awe. Pardon, mo lango ge, ndo aga nduru ti vuko awe. Mo lango ge na bï so, bê ti mo awara ngia si. Kekereke mo lingbi ti londo hio ti kiri na ndo* ti mo.” 10  Ye oko, koli ni aye ti kiri ti lango kâ pëpe, tongaso lo londo lo mû lege lo si na Jébus, wala Jérusalem.+ Akororo ti lo use, so ye ti duti ayeke na ndö ti ala, wali ti lo nga na zo ti kua ti lo ayeke na terê ti lo. 11  Na ngoi so ala si nduru na Jébus, lâ aga nduru ti linda awe. Tongaso, zo ti kua ni atene na wa ti lo, atene: “A yeke nzoni e ngbâ e lango ge na gbata ti azo ti Jébus so ape?” 12  Me wa ti lo atene na lo: “A yeke nzoni pëpe ti tene e luti na gbata ti awande so ayeke azo ti Israël pëpe. E yeke gue juska na Guibéah.”+ 13  Lo kiri lo tene na zo ti kua ti lo: “E gue, e tara ti si na mbeni oko ti agbata ni so; e yeke lango na Guibéah wala na Ramah.”+ 14  Tongaso, ala mû lege ala hon; lâ akomanse ti linda na ngoi so ala yeke nduru na Guibéah, gbata ti azo ti mara ti Benjamin. 15  Ala luti na Guibéah, ala lï na yâ ti gbata ni ti tene ala lango kâ. Na ngoi so ala lï kâ awe, ala duti na ndo so azo ayeke gue ka dä mingi, me zo oko atisa ala ti lango na da ti lo pëpe.+ 16  A si na mbeni ngoi na lakui ni so, mbeni mbakoro-koli alondo na yaka lo yeke kiri. Lo yeke zo ti ndo so ahoto ayeke dä na Éphraïm,+ me lo yeke sara kodro teti mbeni ngoi na Guibéah; me azo ti gbata ni ayeke azo ti mara ti Benjamin.+ 17  Tongana lo yô lê ti lo, lo bâ koli ni so ayeke na ndo so azo ayeke gue ka dä mingi, lo hunda lo, lo tene: “Mo yeke gue na ndo wa? Mo londo na ndo wa la mo ga so?” 18  Lo tene: “E londo na Bethléhem ti Juda, e yeke gue na ndo ti mbi na mbeni ndo so lege ni ayo, so ayeke na ndo so ahoto ayeke dä na Éphraïm. Mbi gue lani na Bethléhem ti Juda,+ na mbi yeke gue na da ti Jéhovah,* me zo oko ayamba mbi na da ti lo pëpe. 19  E yeke na asaleté ti peko ti alê ti kobe nga na kobe so alingbi na akororo ni,+ nga e yeke na mapa+ na vin ndali ti mbi, wali ti mbi nga na zo ti kua ti e. Ye oko amanke e pëpe.” 20  Me mbakoro-koli ni atene: “Siriri aduti na mo! Mbi yeke mû na mo ye kue so mo yeke na bezoin ni, me pardon, mo lango na ndo ni so pëpe.” 21  Tongaso, lo gue na lo na yâ ti da ti lo, na lo mû kobe* na akororo ni. Na pekoni, azo ni asukula gere ti ala, ala te ye nga ala nyon ye. 22  Na ngoi so bê ti ala ayeke na ngia, ambeni zo ti gbata ni so li ti ala ayeke dä pëpe aga angoro da ni, ala yeke pika yanga-da ni ngangu ngangu; ala yeke tene na mbakoro-koli ni so ayeke wa ti da ni: “Sigi na koli so aga na yâ ti da ti mo so, si e lango na lo.”+ 23  Tongaso, wa ti da ni asigi, lo tene na ala: “Aita ti mbi, ala sara ye ti sioni pëpe. Pardon, koli so aga gï gene na da ti mbi. Ala sara kota ye ti kamene so pëpe. 24  Bâ molenge ti mbi ti wali so ade ti hinga koli pëpe nga na wali ti koli ni ayeke ge. Zia mbi sigi na ala, na ala lingbi ti sara ye ti kamene na ala, tongana ala bâ so ala doit ti sara ni.*+ Me ala sara kota ye ti kamene tongaso na koli so pëpe.” 25  Me akoli ni ake ti mä lo, tongaso koli so aga gango so agbu wali ti lo,+ lo sigi na lo na ala. Ala lango na wali ni so na ngangu na bï ni so kue juska na ndapre. Tongana ndo ahan awe, ala zia lo ti gue. 26  Na kota ndapre, wali ni aga, lo tï na sese na yanga ti da ti mbakoro-koli so koli ti lo ayeke dä, na lo lango na ndo so juska lâ asigi. 27  Tongana koli ti wali ni alondo na ndapre na lo zi yanga-da ti tene lo hon, lo bâ wali ti lo so alango na sese na yanga ti da ni, amaboko ti lo ayeke tâ gï na yanga-da ni. 28  Tongaso, lo tene na wali ni: “Londo, e gue.” Me wali ni azi yanga pëpe. Koli ni azia lo na ndö ti kororo, lo mû lege ti kiri na kodro ti lo. 29  Tongana lo si na yanga-da awe, lo mû zembe, lo gbu kuâ ti wali ni, lo dë yâ ti agere ti lo na amaboko ti lo asigi 12, na lo tokua ni na yâ ti sese ti Israël kue. 30  Zo kue so abâ ni atene: “Depuis so azo ti Israël asigi na Égypte juska laso, ye tongaso ade asi lâ oko pëpe nga ade a bâ mara ni pëpe. A yeke nzoni zo oko oko agbu li ti lo dä,* lo pika patara na ndö ni,+ si lo fa na e ye so e doit ti sara.”

Kete tënë

Wala “bê ti mo awara ngangu.”
Wala “sara si bê ti mo awara ngia.”
Wala “bê ti mo awara ngangu.”
Na Hébreu: “tente.”
A lingbi nga ti tene “na mbi yeke sara kua na da ti Jéhovah.”
Wala “kobe ti anyama so a mélangé ni na ambeni ye.”
Wala “ala bungbi na ala na ngangu, nga ala sara ye so ayeke nzoni na lê ti ala.”
Wala “abi bê ti lo dä.”