Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aJuge 17:1-13

LI TI ATËNË NI

  • Ayanda ti Michée nga na prêtre ti lo (1-13)

17  Mbeni koli ayeke dä so asara kodro na ndo so ahoto ayeke dä na Éphraïm;+ iri ti lo ayeke Michée.  Lo tene na mama ti lo, lo tene: “Alê ti nginza ti argent 1 100 so a mû ni lani na terê ti mo so, so mo deba ndo ndali ni na mê ti mbi so, bâ, a yeke na mbi. Mbi la mbi mû ni lani.” Mama ti lo atene: “Zia Jéhovah asara tufa na ndö ti molenge ti mbi.”  Tongaso, lo kiri na alê ti nginza ti argent 1 100 so na mama ti lo, me mama ti lo atene: “Mbi yeke zia argent so nde ndali ti Jéhovah, si molenge ti mbi amû ni ti leke mbeni statue so a leke ni na kode nga na statue ti wen.*+ Tongaso, mbi kiri na ni na mo.”  Tongana lo kiri na argent ni na mama ti lo awe, mama ti lo amû alê ti nginza ti argent ni 200, lo mû ni na zo ti lekengo aye na argent. Lo leke mbeni statue na kode nga na statue ti wen,* na a zia ni na yâ ti da ti Michée.  Michée ayeke na mbeni da so lo zia anzapa ti lo dä; lo sara mbeni éphod+ nga na astatue ti téraphim,*+ na lo zia mbeni molenge ti lo ti sara kua na lo tongana prêtre.+  Na ngoi ni so, gbia ayeke na Israël pëpe.+ Zo oko oko ayeke sara ye so ayeke nzoni na lê ti lo.*+  Mbeni maseka-koli ayeke lani na Bethléhem+ ti Juda; lo yeke zo ti mara ti Lévi,+ me na mbeni ngoi, lo sara kodro na popo ti azo ti Juda.  Lo zia gbata ti Bethléhem ti Juda ti gue ti gi mbeni ndo ti sara kodro dä. Na yâ ti tambela ti lo, lo si na da ti Michée so ayeke na ndo so ahoto ayeke dä, na Éphraïm.+  Michée ahunda lo, atene: “Mo londo na ndo wa?” Lo tene: “Mbi yeke zo ti mara ti Lévi; mbi sara kodro na Bethléhem ti Juda, na mbi yeke fono ti gi mbeni ndo ti sara kodro dä.” 10  Michée atene na lo: “Mo ngbâ na ndo ti mbi ge, mo ga tongana babâ* nga prêtre ndali ti mbi. Ngu oko oko, mbi yeke mû na mo alê ti nginza ti argent bale-oko, bongo nga na kobe.” Tongaso, zo ti mara ti Lévi so alï na da ti lo. 11  A yeke tongaso si zo ti mara ti Lévi ni angbâ na ndo ti Michée, na maseka-koli ni aga tongana mbeni molenge ti lo. 12  Nga Michée azia zo ti mara ti Lévi so ti sara kua tongana prêtre ndali ti lo,+ na lo lango na da ti Michée. 13  Michée atene: “Fadeso mbi hinga so Jéhovah ayeke sara nzoni na mbi, ndali ti so mbeni zo ti mara ti Lévi aga prêtre ti mbi awe.”

Kete tënë

Wala “statue so a tö wen aga ngu si a leke na ni.”
Wala “statue so a tö wen aga ngu si a leke na ni.”
Wala “anzapa ti yâ ti sewa; ayanda.”
Wala “ye so lo pensé ayeke na lege ni.”
Wala “zo ti mungo wango.”