Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aJuge 16:1-31

LI TI ATËNË NI

  • Samson ague na Gaza (1-3)

  • Samson na Dalila (4-22)

  • Samson afâ aPhilistin kozo si lo kui (23-31)

16  Mbeni lâ, Samson ague na Gaza, lo bâ mbeni wali-ndumba kâ, na lo gue na ndo ti lo.  A tene na azo ti Gaza, a tene: “Bâ Samson aga ge.” Tongaso, ala ngoro ndo so lo yeke dä, ala honde terê ti ala na yanga ti gbagba ti gbata ni, ala ku lo na bï ni so kue. Ala duti kpô na bï ni kue, ala tene: “Tongana ndo ahan awe, e yeke fâ lo.”  Ye oko, Samson alango juska na bê ti bï. Na pekoni, lo londo, lo gbu aporte ti yanga ti gbagba ti gbata ni, lo gbu acadre ni use kue nga na barre ni, lo gboto ni. Lo yô ni na ndö ti go ti lo, lo gue na ni na li ti hoto so abâ ndo lê na lê na gbata ti Hébron.  Na pekoni, Samson atï mbeni wali so asara kodro na yâ ti Popo-hoto* ti Sorec; iri ti lo ayeke Dalila.+  Tongaso, aseigneur ti aPhilistin ague na terê ti wali ni, ala tene: “Handa lo si lo*+ fa na mo ye so asara si lo yeke ngangu mingi so, nga si e hinga tongana nyen ti hon lo na ngangu, ti kanga lo nga ti zia lo na gbe ti e. Tongana mo sara ni awe, e oko oko kue, e yeke mû na mo alê ti nginza ti argent 1 100.”  Mbeni ngoi na pekoni, Dalila ahunda Samson, atene: “Pardon, tene na mbi: kota ngangu ti mo so alondo na ndo wa? Nyen la zo alingbi ti kanga mo na ni si lo sara ye ti bê ti lo na mo?”  Samson atene na lo, atene: “Tongana a kanga mbi na afini kamba ti kokora* mbasambala so ade ti hule ape, mbi yeke woko tongana senge zo.”  Tongaso, aseigneur ti aPhilistin amû na lo afini kamba ti kokora mbasambala so ade ti hule pëpe, na lo kanga Samson na ni.  Andâ ala honde ambeni zo na yâ ti mbeni chambre so ayeke na yâ ni kâ; Dalila adekongo, atene: “Samson, bâ aPhilistin la na ndö ti mo so!” Na mango tënë so, lo fâ yâ ti akamba ti kokora so, tongana ti so kamba ti sarango na bongo* ayeke fâ gï yeke tongaso na ngoi so wâ andu ni.+ Zo oko ahinga nda ti ngangu ti lo ni pëpe. 10  Dalila atene na Samson: “Bâ, mo handa mbi* nga mo tene mvene na mbi awe. Pardon, ti fadeso fa na mbi ye so zo alingbi ti kanga mo na ni.” 11  Lo tene na lo: “Tongana a kanga mbi na fini kamba so ade ti sara kua na ni pëpe, mbi yeke woko tongana senge zo.” 12  Tongaso, Dalila amû afini kamba ni, lo kanga lo na ni na lo dekongo, lo tene: “Samson, bâ aPhilistin la na ndö ti mo so!” (Andâ azo ni ahonde terê ti ala na yâ ti mbeni chambre so ayeke na yâ ni kâ.) Na mango tënë so, lo fâ yâ ti akamba so ayeke na maboko ti lo mo bâ mo tene a yeke kamba ti bongo.+ 13  Na pekoni, Dalila atene na Samson: “Juska na ndembe so, mo handa mbi nga mo tene mvene na mbi.+ Fa na mbi ye so zo alingbi ti kanga mo na ni.” Lo tene na lo: “Li ti mbi so a sara ni na pete mbasambala so, mo kanga ni na kamba ti kpongo na bongo.” 14  Dalila asara tongaso, na lo yôro piquet dä si agbu ni ngangu. Na pekoni lo dekongo, lo tene: “Samson, bâ aPhilistin la na ndö ti mo so!” Samson azingo na lango, lo gboto piquet ni nga na kamba ni. 15  Ti fadeso, lo tene na Samson: “Tongana nyen la mo peut ti tene mo ye mbi,+ so mo zi bê ti mo na mbi ape so? Mo handa mbi fani ota nga mo ke ti fa na mbi ye so asara si mo yeke ngangu mingi so.”+ 16  So lâ na lâ lo yeke son li ti Samson na oko tënë nga lo zia lo kpô pëpe, Samson* anze kue juska lo ye ti kui.+ 17  Ni la lo zi bê ti lo kue na lo, lo tene: “Rasoir andu li ti mbi lâ oko pëpe, ngbanga ti so mbi yeke Naziréen ndali ti Nzapa ngbene ye so a dü mbi.*+ Tongana a fâ kuä ti li ti mbi, ngangu ti mbi ayeke hon, mbi yeke woko nga mbi yeke ga tongana tanga ti azo kue.” 18  Tongana Dalila abâ so Samson azi bê ti lo kue na lo awe, hio lo iri aseigneur ti aPhilistin,+ lo tene: “Ala ga, ndali ti so lo zi bê ti lo kue na mbi awe.” Tongaso, aseigneur ti aPhilistin aga na ndo ti lo na nginza ni na maboko ti ala. 19  Lo sara si Samson alango na ndö ti gere ti lo; na pekoni lo iri mbeni koli ti fâ kuä ti li ti lo so a sara ni na pete mbasambala. Fadeso Dalila ayeke na ngangu na ndö ti lo, ndali ti so ngangu ti lo ni akomanse ti hon. 20  Lo dekongo, lo tene: “Samson, bâ aPhilistin la na ndö ti mo so!” Samson azingo na lango, lo tene: “Mbi yeke sigi tongana ti kozo+ na mbi yeke kpe.” Me lo hinga pëpe so Jéhovah azia lo awe. 21  Tongaso, aPhilistin agbu lo, ala kôro lê ti lo. Na pekoni ala mû lo, ala gue na lo na Gaza, ala kanga lo na achaîne use so a sara ni na cuivre, na lo ga zo ti nekango alê ti kobe na yâ ti da ti kanga. 22  Me kuä ti li ti lo so a fâ ni lani akomanse ti sigi.+ 23  Aseigneur ti aPhilistin abungbi ti mû kota sandaga na nzapa ti ala Dagon+ nga ti sara ngia, ndali ti so ala yeke tene: “Nzapa ti e azia wato ti e Samson na maboko ti e awe.” 24  Tongana azo ni abâ lo, ala sepela nzapa ti ala, ala tene: “Nzapa ti e azia wato ti e na maboko ti e awe, lo so lo futi kodro ti e+ nga lo fâ azo ti e mingi.”+ 25  So bê ti ala ayeke na ngia mingi, ala tene: “E iri Samson si lo sara ambeni ye ti ngia e bâ.” Tongaso, a iri Samson na da ti kanga ti ga ti sara ambeni ye si ala he ngia dä. Ala zia lo na popo ti apilier ti da ni. 26  Samson atene na molenge-koli so agbu maboko ti lo: “Zia maboko ti mbi na terê ti apilier ti da ni si mbi calé terê ti mbi dä.” 27  (Andâ akoli na awali asi singo na yâ ti da ni. Aseigneur ti aPhilistin kue ayeke dä. Nga akoli na awali 3 000 tongaso ayeke na ndö ti da ni, ala yeke bâ ye so Samson ayeke sara, na ala yeke he ngia dä.) 28  Ti fadeso Samson+ airi Jéhovah, atene: “Jéhovah, Seigneur ti dunia kue, pardon, dabe ti mo na mbi. Nzapa ti mbi, pardon, ti tanga ni la, mû na mbi ngangu+ si mbi kiri na aPhilistin peko ti ye so ala sara ndali ti oko ti lê ti mbi so.”+ 29  Samson agbu apilier use so da ni aluti na ndö ni, oko na maboko ti lo ti koli nga oko na maboko ti lo ti wali, na lo zia ngangu ti lo dä. 30  Lo dekongo, lo tene: “Zia mbi* na aPhilistin kue e kui.” Na pekoni, lo pusu apilier ni na ngangu ti lo kue, na da ni atuku na ndö ti aseigneur ni nga na azo kue so ayeke na yâ ni.+ Tongaso, azo so lo fâ ala na ngoi so lo kui ayeke mingi ahon ala so lo fâ ala na ngoi so lo ngbâ na fini.+ 31  Na pekoni, aita ti lo ti koli nga na azo ti sewa ti babâ ti lo kue aga amû kuâ ti lo, ala kiri na ni. Ala gue na lo, ala lu lo na popo ti Zorah+ na Eshtaol na ndo so a lu kuâ ti babâ ti lo Manoah+  dä. Lo duti juge na Israël ngu 20.+

Kete tënë

Wala “Sara si lo yeda ti.”
Wala “kamba ti terê ti bio.”
Wala “kamba ti lin.”
Wala “mo he mbi hengo.”
Wala “âme ti Samson.”
Na Hébreu: “ngbene ye so mbi sigi na yâ ti mama ti mbi.”
Wala “âme ti mbi.”