Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aJuge 15:1-20

LI TI ATËNË NI

  • Samson akiri na aPhilistin peko ti sioni ti ala (1-20)

15  Mbeni lâ, na ngoi ti kongo lê ti blé, Samson ague ti bâ wali ti lo; lo gue na mbeni kete ngasa. Lo tene: “Mbi ye ti gue na yâ ti chambre* ti bâ wali ti mbi.” Me babâ ti wali ni ake na lo ti gue.  Babâ ni atene: “Mbi tene na yâ ti bê ti mbi, mbi tene: ‘Ti tâ tënë ni, mo ke lo.’+ Ni la mbi mû lo na mbeni oko ti akoli so aduti na terê ti mo na ngoi ti matanga ni.+ Ngambe ti lo ti wali ayeke pendere mingi ahon lo ape? Pardon, mû lo na place ti yaya ni.”  Ye oko, Samson atene: “Ti so ni so, zo alingbi ti bi tënë na li ti mbi pëpe tongana mbi sara sioni na aPhilistin.”  Tongaso, Samson ague agbu ambo ti ngonda* 300. Na pekoni, lo mû ala use use, lo kanga damba ti ala na terê ti mba; lo mû aye ti zango wâ na yanga ni, lo zia ni oko oko na popo ti adamba ti anyama ni.  Lo zia wâ na terê ti aye ti zango wâ ni, lo zia anyama ni ti lï na yâ ti ayaka ti aPhilistin, so akobe ni angbâ na lê ni. Lo gbi akobe kue so a kanga gere ni, ati so angbâ na lê ti yaka ni nga na ayaka ti vigne na akeke ti olive.  A-Philistin ahunda ndo, atene: “Zo wa la asara ye so zo wa?” A tene na ala, a tene: “A yeke Samson, kogara ti zo ti Timnah so, ndali ti so lo mû wali ti Samson, lo mû lo na mbeni koli so aduti na terê ti lo Samson ni na ngoi ti matanga ni lani.”+ Na mango tënë so, aPhilistin ague agbi wali ni na babâ ti lo.+  Tongaso, Samson atene na ala: “So ala sara ye tongaso, mbi yeke zia ala pëpe juska mbi kiri na ala peko ti sioni so ala sara.”+  Lo fâ ala na peko ti terê;* lo fâ gbâ ti ala. Na pekoni, lo gue lo lango na yâ ti mbeni dû* so ayeke na yâ ti kota tênë ti Étam.  Mbeni lâ, aPhilistin aga asara camp na Juda, na ala yeke fono na Léhi.+ 10  Azo ti Juda ahunda ndo, atene: “Ndani nyen si ala ga ti sara bira na e?” Ala tene: “E ga ti gbu Samson* ti sara na lo oko ye so lo sara na e.” 11  Tongaso, akoli ti Juda 3 000 adescend na dû* so ayeke na yâ ti kota tênë ti Étam, ala tene na Samson: “Mo hinga pëpe so aPhilistin la ayeke komande na ndö ti e?+ Mo sara tongaso na e ngbanga ti nyen?” Lo tene na ala: “Ye so ala sara na mbi la mbi kue mbi sara na ala.” 12  Ala tene na Samson: “E ga ti gbu mo* ti zia mo na maboko ti aPhilistin.” Samson atene: “Ala deba yanga na mbi so ala la ayeke sara sioni na mbi pëpe.” 13  Ala tene na lo: “Ên-ën, e yeke sara sioni na mo pëpe, e yeke kanga gï mo, na e zia mo na maboko ti ala, me e yeke fâ mo pëpe.” Tongaso, ala kanga lo na afini kamba use na yâ ti dû ti tënë ni kâ, ala gboto lo na gigi. 14  Tongana lo si na Léhi, aPhilistin adekongo ti songo benda na ngoi so ala tingbi na lo. Mo ye ti bâ, yingo ti Jéhovah amû na lo ngangu,+ na akamba so a kanga na maboko ti lo aga tongana kamba ti lin so wâ agbi ni, na a tï na sese.+ 15  Lo wara fini bio ti ngbangba ti koli-kororo; lo yôro maboko ti lo, lo mû ni na lo fâ akoli 1 000 na ni.+ 16  Samson atene: “Mbi mû bio ti ngbangba ti kororo, mbi fâ na akoli 1 000.+ Mbi mû bio ti ngbangba ti kororo, mbi fâ na ala, mbi dö kuâ ti ala na ndö ti terê.” 17  Tongana lo hunzi tënë ti lo awe, lo bi bio ni na ngonda, na lo iri ndo ni so Ramath-Léhi.*+ 18  Nzara ti ngu ahon ndö ti lo si lo iri Jéhovah, lo tene: “Mo la mo mû kota salut na mbi wakua ti mo. Me ti fadeso, mbi doit ti kui na nzara ti ngu? Nga mbi yeke tï na maboko ti azo so afâ ganza ape so?” 19  Tongaso, Nzapa asuru yâ ti mbeni dû so ayeke na Léhi, na ngu asigi dä.+ Na peko ti so lo nyon ngu ni awe, yingo* ti lo akiri dä na lo wara ngangu. Ndani la lo iri ndo ni so En-Haccoré,* na a ngbâ na Léhi juska laso. 20  Na ngoi ti aPhilistin, lo duti juge na Israël ngu 20.+

Kete tënë

Wala “chambre so ayeke na yâ ti da ni kâ.”
Wala “arenard.” Mbeni mara ti ambo ti ngonda so ala kono mingi pëpe, nga ala yo na nduzu mingi pëpe; amê ti ala ayo yongo nga lê ti ala ahan mingi.
Na Hébreu: “Lo pika ala, lo zia gere ti ambeni na ndö ti cuisse ti ambeni.”
Wala “kota tênë so yâ ni asuru.”
Wala “ti kanga Samson na kamba.”
Wala “kota tênë so yâ ni asuru.”
Wala “ti kanga mo na kamba.”
Ndani aye ti tene “Kete hoto ti bio ti ngbangba.”
Wala “ngangu.”
Ndani aye ti tene “Li ti ngu ti zo so ayeke iri ndo.”