Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aJuge 11:1-40

LI TI ATËNË NI

  • A tomba juge Jephté, na pekoni lo ga mokonzi (1-11)

  • Jephté atara ti sara tënë na Ammon (12-28)

  • Yanga so Jephté amû nga molenge ti lo ti wali (29-40)

    • Tënë na ndö ti dutingo kumbamba ti molenge ti Jephté (38-40)

11  Jephté,+ zo ti Galaad, ayeke ngangu zo ti bira; lo yeke molenge ti mbeni wali-ndumba, na babâ ti lo ayeke Galaad.  Me wali ti Galaad adü nga na lo amolenge ti koli. Tongana amolenge ti wali ti lo akono awe, ala tomba Jephté, ala tene na lo: “Mo yeke wara héritage na da ti babâ ti e pëpe, ndali ti so mama ti mo ayeke nde.”  Tongaso, Jephté akpe aita ti lo, lo gue lo sara kodro na sese ti Tob. Azo so aduti gï senge aga na terê ti Jephté, na ala mû peko ti lo.  Mbeni lâ, azo ti Ammon asara bira na Israël.+  Na ngoi so azo ti Ammon asara bira na Israël, hio a-ancien ti kodro ti Galaad ague ti mû Jephté na sese ti Tob ti kiri na lo.  Ala tene na Jephté: “Ga, mo komande aturugu ti e si e tiri na azo ti Ammon.”  Me Jephté atene na a-ancien ti Galaad: “Ala la ake mbi bê oko si ala tomba mbi na da ti babâ ti mbi so ape?+ Ndani nyen si ala ga fadeso na mbage ti mbi na ngoi so ye aga ngangu mingi na ala so?”  Na mango tënë so, a-ancien ti Galaad atene na Jephté: “Ndani la e kiri e ga ti bâ mo so. Tongana mo gue na e na mo tiri na azo ti Ammon, mo yeke komande na ndö ti azo ti Galaad kue.”+  Tongaso, Jephté atene na a-ancien ti Galaad, atene: “Tongana ala kiri na mbi kâ ti tiri na azo ti Ammon, na tongana Jéhovah asö benda na ndö ti ala ndali ti mbi, mbi yeke ga zo so akomande ala.” 10  A-ancien ti Galaad atene na Jephté: “Zia Jéhovah aduti témoin* na popo ti e tongana e sara ye pëpe tongana ti so mo tene.” 11  Tongaso, Jephté na a-ancien ti Galaad ague, na azo ni azia lo ti komande na ndö ti ala na aturugu ti ala. Jephté akiri atene peko ti atënë kue so lo tene na gbele Jéhovah na sese ti Mizpah.+ 12  Na pekoni, Jephté atokua azo na gbia ti azo ti Ammon,+ lo tene: “Nyen la ason mo na terê ti mbi,* si mo ga ti sara bira na kodro ti mbi so?” 13  Tongaso, gbia ti azo ti Ammon atene na azo so Jephté atokua ala: “A yeke ndali ti so, na ngoi so azo ti Israël asigi na Égypte,+ ala mû sese ti mbi so alondo na ngu ti Arnon+ ti si na ngu ti Jabboc juska ti si na Ngu ti Jourdain.+ Mbi ye tënë pëpe, kiri na mbi sese ni.” 14  Me Jephté atokua azo ti tene ala kiri na gbia ti Ammon 15  ti tene na lo tënë so: “Jephté atene: ‘Azo ti Israël amû sese ti azo ti Moab+ wala ti azo ti Ammon pëpe,+ 16  ndali ti so, na ngoi so azo ti Israël asigi na Égypte, ala fâ yâ ti benyama juska na Kota Ngu-Bengba,+ na ala si na Cadès.+ 17  Azo ti Israël atokua azo na gbia ti Édom,+ ala tene: “Pardon, zia e fâ yâ ti kodro ti mo, e hon.” Me gbia ti Édom ake. Ala tokua ndo na gbia ti Moab+ nga, me lo yeda pëpe. Tongaso, azo ti Israël angbâ ti sara kodro na Cadès.+ 18  Na ngoi so ala yeke fâ yâ ti benyama, ala hon na terê ti sese ti Édom+ na ti Moab. Ala hon na mbage ti est ti sese ti Moab,+ na ala sara camp na ndo so ayeke na terê ti ngu ti Arnon; ala ndu yanga ti sese ti Moab pëpe,+ ndali ti so ngu ti Arnon la ayeke yanga ti sese ti Moab. 19  “‘Na pekoni, azo ti Israël atokua azo na Sihon, gbia ti azo ti mara ti Amori so ayeke gbia ti Hesbon; azo ti Israël atene na lo: “Pardon, zia e fâ yâ ti sese ti mo ti gue na sese ti e.”+ 20  Me Sihon agi bê ti lo na ndö ti azo ti Israël so aye ti fâ yâ ti sese ti lo ti hon, ni la lo bungbi azo ti lo kue, ala sara camp na Jahaz, na ala tiri na azo ti Israël.+ 21  Tongaso, Jéhovah Nzapa ti Israël azia Sihon na azo ti lo kue na maboko ti azo ti Israël, si azo ti Israël asö benda na ndö ti ala na amû sese kue ti azo ti mara ti Amori, so ayeke awa ti kodro ni.+ 22  A yeke tongaso si ala mû sese kue ti azo ti mara ti Amori, ti londo na ngu ti Arnon ti si na ngu ti Jabboc, nga na sese so alondo na benyama ti si na Ngu ti Jourdain.+ 23  “‘A yeke Jéhovah Nzapa ti Israël la atomba azo ti mara ti Amori na gbele azo ti lo Israël;+ fadeso mo la mo ye ti tomba ala? 24  Mo yeke mû pëpe sese kue so nzapa ti mo Kémos+ amû ni na mo? Tongaso, zo kue so Jéhovah Nzapa ti e atomba lo na gbele e, e yeke tomba lo.+ 25  Mo yeke nzoni ahon Balak+ molenge ti Zippor, gbia ti Moab? Lâ oko lo tiri na azo ti Israël wala lo sara bira na ala awe? 26  Na yâ ti ngu 300 so azo ti Israël ayeke sara kodro na Hesbon+ na akodro so ayeke na gbe ti Hesbon,* na Aroër na akodro so ayeke na gbe ti lo nga na yâ ti agbata kue so ayeke na terê ti ngu ti Arnon, mo gi ti mû akodro ni so lâ oko pëpe ngbanga ti nyen?+ 27  Mbi sara siokpari na terê ti mo pëpe, me tongana mo tiri na mbi, mo sara ye na lege ni pëpe. Zia Jéhovah so ayeke Juge+ afâ ngbanga laso na popo ti azo ti Israël na azo ti Ammon.’” 28  Me gbia ti azo ti Ammon ake ti mä tënë so Jephté atokua ti tene a tene na lo. 29  Yingo ti Jéhovah aga na ndö ti Jephté,+ na lo fâ yâ ti sese ti Galaad nga na ti Manassé ti gue na Mizpéh ti Galaad;+ lo londo na Mizpéh ti Galaad lo gue juska na kodro ti azo ti Ammon. 30  Jephté amû zendo+ na Jéhovah, lo tene: “Tongana mo zia azo ti Ammon na maboko ti mbi, 31  zo so asigi na yanga-da ti mbi ti yamba mbi na ngoi so mbi kiri na siriri na peko ti bira so mbi sara na azo ti Ammon, lo yeke ga ti mo Jéhovah;+ mbi yeke mû lo na mo tongana sandaga so a zö ni agbi kue.”+ 32  Tongaso, Jephté ague ti tiri na azo ti Ammon, na Jéhovah azia ala na maboko ti lo. 33  Lo fâ ala gbani gbani na yâ ti agbata 20, ti londo na Aroër ti si juska na Minnith; lo fâ azo juska na kodro ti Abel-Kéramim. A yeke tongaso si azo ti Israël asö benda na ndö ti azo ti Ammon. 34  Jephté ague ngbii lo si na ndo ti lo na Mizpah,+ na bâ, molenge ti lo ti wali asigi ti yamba lo; lo yeke pika tambourin na lo yeke dodo. Lo yeke gï oko molenge so lo dü. Lo yeke na mbeni molenge ti koli wala ti wali pëpe, gï lo oko awe. 35  Gï so lo bâ lo, lo suru bongo na terê ti lo, lo tene: “Aï, molenge ti mbi! Mo zia kota vundu na bê ti mbi awe,* ndali ti so mo ga zo so mbi tomba lo ti hon ayo. Mbi mû zendo na Jéhovah awe, na mbi peut ti changé yanga ti mbi ape.”+ 36  Me lo tene na babâ ti lo: “Babâ ti mbi, tongana mo mû zendo na Jéhovah awe, sara na mbi tongana ti so mo tene,+ ngbanga ti so ndali ti mo, Jéhovah akiri na awato ti mo, azo ti Ammon, peko ti sioni so ala sara.” 37  Lo kiri lo tene na babâ ti lo, lo tene: “Zia a sara ye so ndali ti mbi: Zia mbi duti gï mbi oko nze use, zia mbi gue na yâ ti ahoto, zia mbi na akamarade ti mbi e toto ndali ti so mbi yeke hinga ande koli lâ oko pëpe.”* 38  Babâ ti lo atene: “Mo gue.” Tongaso, lo zia lo lo gue nze use; lo na akamarade ti lo ague na yâ ti ahoto ti toto ndali ti so lo yeke hinga ande koli lâ oko pëpe. 39  Tongana nze use ni ahunzi awe, lo kiri na ndo ti babâ ti lo, na babâ ti lo asara ye alingbi na zendo so lo mû na ndö ti lo.+ Lo bungbi na koli lâ oko pëpe. Ye so a yeke sara ka lani* na Israël ayeke so: 40  Ngu oko oko, na yâ ti lango osio, amaseka-wali ti Israël ayeke gue ti gonda molenge ti Jephté, zo ti Galaad.

Kete tënë

Na Hébreu: “zo so amä tënë.”
Na Hébreu: “Ti mbi na mo nyen dä?”
Wala “so angoro Hesbon.”
Wala “mo sara si mbi ba na sese ngangu.”
Wala “mbi na akamarade ti mbi e toto ndali ti so mbi yeke sara ande mariage lâ oko pëpe.”
Wala “Ndia so a lu lani.”