Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

aJuge 1:1-36

LI TI ATËNË NI

  • Akodro so Juda na Siméon amû ni (1-20)

  • Azo ti Jébus angbâ ti sara kodro na Jérusalem (21)

  • Joseph amû gbata ti Béthel (22-26)

  • A tomba azo ti Canaan kue kue kue ape (27-36)

1  Na peko ti kuâ ti Josué,+ azo ti Israël ahunda Jéhovah,+ atene: “Na popo ti e, zo wa la ayeke gue kozo ti tiri na azo ti Canaan?”  Jéhovah atene: “Mara ti Juda la ayeke gue kozo.+ Mbi yeke zia* kodro ni na maboko ti lo.”  Azo ti Juda atene na aita ti ala azo ti Siméon, atene: “Ala ga e gue na sese so a mû na e*+ ti tiri na azo ti Canaan. Na pekoni, e na ala e yeke gue nga na sese so a mû na ala.” Tongaso, azo ti Siméon ague na ala.  Tongana azo ti Juda ague, Jéhovah azia azo ti Canaan nga na azo ti Périzzi na maboko ti ala,+ na ala sö benda na ndö ti azo 10 000 na kodro ti Bézec.  Ala wara Adoni-Bézec na yâ ti kodro ti Bézec ni, ala tiri na lo, nga ala sö benda na ndö ti azo ti Canaan+ nga na azo ti Périzzi.+  Tongana Adoni-Bézec akpe, ala tomba lo, ala gbu lo, ala fâ akota li ti maboko ti lo nga na akota li ti gere ti lo.  Adoni-Bézec atene: “Agbia 70 ayeke ro kobe so atï na sese na gbe ti table ti mbi; a fâ lani akota li ti maboko ti ala nga na akota li ti gere ti ala. Ye so mbi sara so la Nzapa akiri peko ni na mbi so.” Ala mû lo ague na lo na Jérusalem,+ na lo kui kâ.  Nga, azo ti Juda atiri na azo ti Jérusalem+ na ala mû gbata ni; ala fâ azo ti yâ ni na épée, na ala gbi gbata ni.  Na pekoni, azo ti Juda adescend ti tiri na azo ti Canaan so asara kodro na ndo so ahoto ayeke dä, na Négueb nga na Séphélah.+ 10  Azo ti Juda ague atiri na azo ti Canaan so asara kodro na Hébron (ândö iri ni ayeke Kiriath-Arba), na ala sö benda na ndö ti Shéshaï, Ahiman na Talmaï.+ 11  Ala londo na ndo so, ala gue ala sara bira na azo ti kodro ti Debir.+ (Ândö iri ti Debir ayeke Kiriath-Sépher.)+ 12  Caleb+ atene: “Zo so asö benda na ndö ti Kiriath-Sépher na lo mû ni, mbi yeke mû molenge ti mbi Acsah na lo ti ga wali ti lo.”+ 13  Othniel,+ molenge ti Kenaz+ so ayeke ngambe ti Caleb, la amû gbata ni. Tongaso, Caleb amû na Othniel molenge ti lo Acsah ti ga wali ti lo. 14  Na ngoi so Acsah ayeke gue na yanga-da, lo tene na koli ti lo ti hunda mbeni sese na Caleb, babâ ti lo. Na pekoni, Acsah adescend na ndö ti kororo ti lo.* Caleb ahunda lo, atene: “Mo ye mbeni ye?” 15  Acsah atene na lo: “Pardon, mû na mbi mbeni matabisi ti fa so mo iri tufa na ndö ti mbi; ndali ti so sese so mo mû na mbi ayeke na mbage ti sud,* mû na mbi nga Gulloth-Maïm.”* Tongaso, Caleb amû na lo Gulloth ti mbage ti nduzu nga na Gulloth ti mbage ti gbe ni. 16  Ahale ti kogara ti Moïse,+ zo ti mara ti Kéni,+ alondo na gbata ti akeke ti mbûrü,+ ala na azo ti Juda, ti gue na yâ ti benyama ti Juda so ayeke na mbage ti sud ti Arad.+ Ala gue kâ na ala sara kodro na popo ti azo ti kodro ni.+ 17  Me azo ti Juda na aita ti ala azo ti Siméon ague atiri na azo ti Canaan so asara kodro na Zéphath na ala futi kodro ni.+ Ala zia iri ti kodro ni Hormah.*+ 18  Na pekoni, azo ti Juda amû Gaza+ na asese ti lo, Askélon+ na asese ti lo nga na Écron+ na asese ti lo. 19  Jéhovah ayeke na terê ti azo ti Juda, ni la ala mû ndo so ahoto ayeke dä, me ala wara lege pëpe ti tomba azo so asara kodro na kpangbala ndo ngbanga ti so azo ni ayeke na apuse ti bira so azembe ayeke na terê ti aroue ni.*+ 20  Tongana ti so Moïse atene lani,+ ala mû gbata ti Hébron na Caleb, na lo tomba amolenge ti Anak ota so asara kodro kâ.+ 21  Me azo ti Benjamin atomba pëpe azo ti mara ti Jébus so asara kodro na Jérusalem; ni la, azo ti mara ti Jébus na azo ti Benjamin angbâ ti sara kodro ndo oko na Jérusalem juska laso.+ 22  Na yâ ti angoi ni so, ahale ti Joseph+ ague ti tiri na Béthel, na Jéhovah ayeke na terê ti ala.+ 23  Ahale ti Joseph ayeke bembe ndo na Béthel (ândö iri ti gbata ni ayeke Luz),+ 24  na azo ti bembengo ndo ni abâ mbeni koli so ayeke sigi na yâ ti gbata ni. Tongaso, ala tene na lo: “Pardon, fa na e lege ti lingo na yâ ti gbata ni, na e yeke sara nzoni bê na mo.”* 25  Koli ni afa na ala lege ni; ala fâ azo ti gbata ni na épée, me koli so nga na azo ti sewa ti lo kue, ala zia ala yamba ti hon.+ 26  Koli ni ague na kodro ti azo ti mara ti Heth, lo leke mbeni gbata kâ si lo zia iri ni Luz; na a yeke iri ti gbata ni juska laso. 27  Azo ti Manassé amû pëpe gbata ti Beth-Shéan na akodro so ayeke na gbe ti Beth-Shéan* nga na gbata ti Taanak+ na akodro so ayeke na gbe ti lo. Ala sö benda pëpe na ndö ti azo ti gbata ti Dor na akodro so ayeke na gbe ti lo, azo ti gbata ti Jibléam na akodro so ayeke na gbe ti lo nga na azo ti gbata ti Méguiddo na akodro so ayeke na gbe ti lo.+ Azo ti Canaan angbâ gï ti sara kodro na sese ni. 28  Tongana Israël aga ngangu mara awe, ala forcé azo ti Canaan ti sara akua ti ngangu,+ me ala tomba ala kue kue kue pëpe.+ 29  Azo ti Éphraïm atomba pëpe azo ti Canaan so asara kodro na Guézer. Azo ti Canaan angbâ ti sara kodro na popo ti ala na Guézer.+ 30  Azo ti Zabulon atomba pëpe azo ti gbata ti Kitron nga na azo ti gbata ti Nahalol.+ Azo ti Canaan angbâ ti sara kodro na popo ti ala, nga azo ti Zabulon ni aforcé ala ti sara akua ti ngangu.+ 31  Azo ti Aser atomba pëpe azo ti gbata ti Acco, ti Sidon,+ ti Ahlab, ti Aczib,+ ti Helbah, ti Aphic+ nga na ti Réhob.+ 32  Tongaso, azo ti Aser angbâ ti sara kodro na popo ti azo ti Canaan so asara kodro na sese ni, ndali ti so ala tomba ala pëpe. 33  Azo ti Nephtali atomba pëpe azo ti gbata ti Beth-Shémesh nga na ti Beth-Anath,+ me ala ngbâ ti sara kodro na popo ti azo ti Canaan so asara kodro na sese ni.+ Ala forcé azo ti gbata ti Beth-Shémesh nga na ti Beth-Anath ti sara akua ti ngangu. 34  Azo ti mara ti Amori akanga lege na azo ti Dan si ala ngbâ na ndo so ahoto ayeke dä, ala zia lege pëpe na azo ti Dan ti descend na kpangbala ndo.+ 35  Tongaso, azo ti mara ti Amori angbâ gï ti sara kodro na ndö ti Hoto ti Hérès, ti Aijalon+ nga na ti Shaalbim.+ Me tongana ngangu* ti ahale ti Joseph akiri ague na li ni,* ala forcé azo ni ti sara akua ti ngangu. 36  Sese ti azo ti mara ti Amori alondo na lege so amonté ti gue na Acrabbim,+ a londo na Séla a monté gï montengo.

Kete tënë

Wala “Mbi zia awe.”
Na Hébreu: “part ti e.”
A lingbi nga ti tene “lo pika maboko ti lo na ngoi so lo yeke na ndö ti kororo ni.”
Wala “Négueb.”
Ndani aye ti tene “Abassin so ngu ayeke dä.”
Ndani aye ti tene “Ndo so a zia ni nde ti futi ni.”
Na Hébreu: “apuse ti mbarata so a sara ni na wen.”
Na Hébreu: “e yeke fa tâ ndoye na mbage ti mo.”
Wala “so angoro Beth-Shéan.”
Na Hébreu: “maboko.”
Na Hébreu: “ane mingi.”