Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Abdias 1:1-21

LI TI ATËNË NI

  • A yeke kiri na Édom so asara ye na fandara na gbe ni (1-9)

  • Édom asara ngangu na Jacob (10-14)

  • Lâ ti Jéhovah ayeke ga na ndö ti amara kue (15, 16)

  • Ahale ti Jacob ayeke kiri na kozo dutingo ti ala (17-21)

    • Jacob ayeke tongana wâ so ayeke gbi Édom (18)

    • Komandema ayeke ga ti Jéhovah (21)

 Vision ti Abdias:* Bâ tënë so Jéhovah, Seigneur ti dunia kue, atene na ndö ti Édom:+ “E mä mbeni tënë so Jéhovah atene. A tokua mbeni zo na popo ti amara, a tene: ‘Ala londo, e leke terê ti e ti sara bira na lo.’”+   “Bâ, mbi sara si mo ga mbeni senge ye na popo ti amara; azo ake mo na bê oko.+   Fandara ti bê ti mo ahanda mo,+ mo so mo lango na yâ ti adû ti kota tênë, mo so mo sara kodro na ndo so ayo na nduzu, mo tene na bê ti mo, mo tene: ‘Zo wa la akpa ti descend mbi na sese?’   Même tongana mo leke ndo ti lango ti mo kâ na nduzu* tongana ti aigle, wala mo zia da ti mo na popo ti atongoro, mbi yeke mû mo kâ ti descend na mo,” tënë ti yanga ti Jéhovah la.   “Tongana azo ti nzi aga na ndo ti mo, tongana azo ti gbungo aye ti zo na ngangu aga na bï, ala yeke nzi gï aye so ala ye ti nzi ni ape? Wala tongana azo ti kongo lê ti vigne asi na ndo ti mo, ala yeke zia ambeni lê ti vigne na peko ti ala ape?+ Me awato ti mo ayeke futi mo biani biani!*   Bâ tongana nyen azo agi aye ti Ésaü! Bâ tongana nyen azo agi amosoro ti lo so lo honde ni!   Azo atomba mo juska mo fâ katikati ti kodro ti mo. Ala so mo na ala amä terê nzoni so,* ala handa mo. Azo so ayeke na siriri na mo atiri na mo na asö benda na ndö ti mo. Azo so mo na ala ate mapa legeoko ayeke bi ande gbanda na ndö ti mo, me mo yeke hinga ye oko dä pëpe.   Jéhovah atene: “Na lango ni so, mbi yeke futi azo ti ndara so ayeke na Édom so ape?+ Nga azo ti kodro ti Ésaü so ayeke na ndo so ahoto ayeke dä si ahinga ti bâ yâ ti aye nzoni so, mbi yeke futi ala ape?   Téman,+ mbeto ayeke hon ande ndö ti angangu turugu ti mo,+ ndali ti so a yeke fâ azo oko oko kue ti Ésaü so ayeke na ndo so ahoto ayeke dä.+ 10  Ye ti ngangu so a sara na ita ti mo Jacob+ ayeke sara si kamene ahon ndö ti mo,+ na mo yeke kui biani biani.+ 11  Na lango so mo luti ti mo lani nde na mo sara ye oko pëpe, na lango so awande amû lani aturugu ti lo na ngbâa,+ na ngoi so awande alï na yanga ti gbagba ti lo na ala yeke sara mbeni ye ti kangbi yâ ti Jérusalem na popo ti ala,+ mo nga kue mo sara ye tongana mbeni oko ti ala. 12  Ye ti ngangu asi na ita ti mo, na terê ti mo adoit fade ti nzere pëpe.+ A futi azo ti Juda, na mo doit fade ti duti na ngia pëpe.+ Ye ti vundu asi na azo ni, na mo doit fade ti pika kate ti mo pëpe. 13  Mo doit fade ti lï pëpe na yâ ti gbata* ti azo ti mbi na ngoi so ye ti ngangu asi na ala.+ Terê ti mo adoit fade ti nzere pëpe ndali ti ye ti vundu so asi na ala. Mo doit fade ti yôro maboko ti mo pëpe ti mû amosoro ti ala na ngoi so ye ti ngangu asi na ala.+ 14  Mo doit fade pëpe ti luti na croisement ti fâ azo so agi ti kpe.+ Mo doit fade pëpe ti gbu azo so asö kuâ ti zia ala na maboko ti awato ti ala na ngoi ti ye ti vundu.+ 15  Lâ ti Jéhovah so ayeke ga na ndö ti amara kue so aga nduru awe.+ Ye so ala sara, a yeke ni la a yeke sara na ala nga.+ Ye so ala sara na amba ti ala so, ni la a yeke kiri na ni na li ti ala. 16  Ala nyon lani vin na ndö ti hoto ti mbi so ayeke nzoni-kue. Amara kue ayeke nyon nga ande kopo ti ngonzo ti mbi lakue.+ Ala yeke nyon ni, na ala yeke mene ni hio hio. Ala yeke ga ande tongana azo so a dü ala lâ oko pëpe. 17  Me azo so akpe ayeke luti ande na ndö ti Hoto ti Sion,+ na hoto ni ayeke ga nzoni-kue.+ Ahale ti Jacob ayeke kiri ti wara aye so ayeke ti ala.+ 18  Ahale ti Jacob ayeke ga tongana wâ, ahale ti Joseph ayeke tongana wâ so ayeke za nga ahale ti Ésaü ayeke ga tongana hulengo saleté so angbâ na lê ti yaka. A yeke bi wâ na terê ti ala na a yeke gbi ala, na mbeni hale ti Ésaü ayeke sö kuâ pëpe,+ ndali ti so Jéhovah wani la asara tënë ni. 19  Ala yeke mû Négueb nga na ndo so ahoto ayeke dä na kodro ti Ésaü ti tene aga ti ala.+ Ala yeke mû Séphélah nga na kodro ti aPhilistin.+ Ala yeke mû ande benyama ti Éphraïm nga na ti Samarie.+ Benjamin ayeke mû ti lo ande Galaad. 20  Azo so a mû ala a gue na ala na ngbâa si ala yeke na yâ ti gbagba so a monté sese si aga koto angoro ni so,*+ so ti tene azo ti Israël, sese so alondo na Canaan juska na Zaréphath ayeke ga ti ala.+ Azo ti Jérusalem so a gue na ala na ngbâa, ala so ayeke lani na Sépharad so, ala yeke mû agbata ti Négueb ti tene aga ti ala.+ 21  Asauveur ayeke monté ande na ndö ti Hoto ti Sion ti fâ ngbanga na ndö ti ndo so ahoto ayeke dä na kodro ti Ésaü,+ na komandema ni ayeke ga ti Jéhovah.”+

Kete tënë

Ndani aye ti tene “Wakua ti Jéhovah.”
A lingbi nga ti tene “mo huru mo gue kâ na nduzu.”
A lingbi nga ti tene “Ala yeke futi aye tongana ti so bê ti ala aye ape?”
Wala “Azo so mo na ala ate mbele.”
Na Hébreu: “yanga ti gbagba.”
Wala “na yâ ti ngangu gbagba.”