Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Philémon 1:1-25

LI TI ATËNË NI

  • Abara (1-3)

  • Ndoye ti Philémon nga na mabe ti lo (4-7)

  • Paul avoro yanga ndali ti Onésime (8-22)

  • Andangba bara (23-25)

 Paul, zo ti kanga+ ndali ti iri ti Christ Jésus, legeoko na Timothée+ ita ti e, atokua mbeti so na mo Philémon mba ti e wakua so e ye mo mingi,  e tokua mbeti so nga na ita ti e ti wali Apphia, na Archippe,+ mba ti e turugu ti Christ, nga na congrégation so ayeke na yâ ti da ti mo:+  Zia kota nzobe nga na siriri so alondo na Nzapa Babâ ti e nga so alondo na Seigneur Jésus Christ aduti na ala.  Mbi yeke kiri singila lakue na Nzapa ti mbi na ngoi so mbi yeke sara tënë ti mo na yâ ti asambela ti mbi,+  ndali ti so mbi ngbâ lakue ti mä tënë ti mabe ti mo nga na ti ndoye so mo yeke na ni na mbage ti Seigneur Jésus nga na mbage ti azo ti be-vulu kue.  Mbi sambela ti tene mabe so mo yeke fa ni na mbage ti amba ti mo ague na mo ti hinga nzoni ye kue so e wara na lege ti Christ.  Mbi wara ngia mingi nga bê ti mbi adë ndali ti ndoye ti mo, ngbanga ti so yengo terê so ayeke na popo ti azo ti be-vulu akiri akpengba ndali ti mo, ita ti mbi.  Ni la, atâa so na yâ ti Christ mbi lingbi fade ti mû yanga na mo na kamene oko pëpe ti sara ye so ayeke na lege ni,  mbi ye gï ti wa mo na lege ti ndoye, ndali ti so mbi Paul mbi ga mbakoro awe, nga fadeso mbi yeke zo ti kanga ndali ti Christ Jésus. 10  Mbi voro yanga na mo ndali ti molenge ti mbi, Onésime,+ lo so mbi ga+ babâ ti lo na ngoi so mbi yeke na kanga.* 11  Kozo lo yeke ye oko ndali ti mo pëpe, me fadeso lo yeke nzoni mingi ndali ti mbi na mo kue. 12  Mbi yeke tokua lo ti kiri na mo kâ; lo yeke zo so mbi ye lo na bê ti mbi kue. 13  Mbi ye fade ti zia lo ti ngbâ na terê ti mbi si lo ngbâ ti sara kua na mbi na place ti mo na yâ ti kanga so mbi yeke sara ndali ti nzoni tënë.+ 14  Me, mbi ye ti sara mbeni ye pëpe sân ti mä tënë ti bê ti mo, si nzoni ye so mo sara aduti ye so a gbu mo gbungo na ngangu ti sara ni pëpe, me ye so mo sara na bê ti mo wani.+ 15  Hinga ape a yeke ndali ti ye so la si lo kpe ndali ti kete ngoi,* si na pekoni lo kiri na mo biaku biaku, 16  ti kiri tongana ngbâa encore ape,+ me tongana mbeni zo so ahon ngbâa, so ti tene mbeni ita so e ndoye lo mingi;+ ti mbi, mbi ndoye lo mingi, me ti mo, mo yeke ndoye lo mingi ahon mbi na lege ti mitele nga na yâ ti Seigneur. 17  Ni la, tongana mo bâ mbi tongana kamarade* ti mo, a yeke nzoni mo yamba lo na nzoni bê tongana ti so mo yeke yamba fade na mbi. 18  Nga, tongana ândö lo sara na mo mbeni ye so ayeke na lege ni pëpe wala mbeni ye ti mo ayeke na li ti lo, mo zia ni kue na li ti mbi. 19  Mbi Paul la si mbi yeke sû mbeti so na maboko ti mbi so: Mbi yeke kiri ande na ni na mo; nga girisa pëpe so bon ti mbi nga ayeke na li ti mo, bon ni ayeke fini ti mo. 20  Ti tâ tënë ni, ita ti mbi, zia mo sara ye so na mbi, ngbanga ti so mbi na mo e sara beoko na yâ ti Seigneur. Mo zia si yengo terê so ayeke na popo ti mbi na mo so akiri akpengba ndali ti so e sara beoko na Christ. 21  Mbi hinga na bê ti mbi kue so mo yeke sara ande ye so, ni la mbi yeke sû mbeti so na mo, na mbi hinga so mo yeke sara ni même ahon ti so mbi hunda so. 22  Me na mbage, mo leke ndo ti lango na mbi, ngbanga ti so mbi yeke na beku so ndali ti asambela ti ala, a yeke sara si mbi kiri na ala kâ.*+ 23  Épaphras,+ mba ti mbi zo ti kanga ndali ti Christ Jésus, atokua bara ti lo na mo; 24  Marc, Aristarque,+ Démas+ na Luc+ so ayeke amba ti mbi wakua atokua nga bara ti ala na mo. 25  Zia kota nzobe ti Seigneur Jésus Christ aduti na bibe so ala yeke na ni so.

Kete tënë

Na Grec: “na yâ ti chaîne.”
Na Grec: “ngbonga oko.”
Na Grec: “mba.”
Wala “a yeke zi lege ti tene mbi kiri na popo ti ala.”