Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Osée 9:1-17

LI TI ATËNË NI

  • Siokpari ti Éphraïm asara si Nzapa ake lo (1-17)

    • Sarango na nzapa so ayeke ye ti kamene (10)

9  “Israël, duti na ngia pëpe,+ nga mo sara ngia pëpe tongana ti tanga ti azo nde nde kue, ndali ti so na lege ti ndumba* so mo sara, mo hon yongoro na Nzapa ti mo.+ Mo ye futa ti wali-ndumba na ando nde nde kue ti pikango lê ti kobe.+   Me ndo ti pikango lê ti kobe nga na ndo ti sarango vin ayeke mû ande kobe na mo pëpe, na mo yeke wara fini vin pëpe.+   Ala yeke ngbâ ande pëpe ti lango na yâ ti kodro ti Jéhovah.+ Éphraïm ayeke kiri ande na Égypte, nga, na yâ ti kodro ti Assyrie, ala yeke te ye so aga sioni awe.+   Ala yeke tuku vin ti mû na sandaga na Jéhovah encore ape;+ asandaga ti ala ayeke nzere na lo pëpe.+ Asandaga ni ayeke tongana mapa ti ngoi ti vundu. Azo kue so ate ni, a yeke sara si ala ga sioni. Mapa ni ayeke gï ndali ti ala wani;* a yeke lï ande na ni na yâ ti da ti Jéhovah pëpe.   Nyen la ala yeke sara ande na lango ti bungbi,* na lango ti matanga ti Jéhovah?   Ala yeke kpe ndali ti futingo.+ Égypte ayeke bungbi ala ndo oko,+ na Memphis ayeke lu akuâ ti ala.+ Akeke ti sisi ayeke mû ndo na terê ti anzoni ye ti ala so a sara na argent, na akete keke ti sisi ayeke mû ndo na yâ ti atente ti ala.   Lango so a yeke iri zo ti kiri tënë ndali ti ye so lo sara ayeke si ande.+ Lango so a yeke punir zo ayeke ga. Israël ayeke hinga ni. Prophète ti ala ayeke ga ande zo ti buba, na zo so yingo ti Nzapa ayeke fa ye na lo ayeke sara ye tongana zo so ye asara li ti lo. So afaute ti mo ayeke gbani gbani, bê ti azo mingi la ayeke son na terê ti mo.”   Sinziri+ ti Éphraïm ayeke lani na Nzapa ti mbi.+ Me fadeso, alege kue ti aprophète ti lo+ ayeke tongana agbanda ti zo ti gbungo andeke. Bê ti azo so ayeke na yâ ti da ti Nzapa ti lo ason.   Sarango ye ti ala abuba mingi, tongana ti azo ti gbata ti Guibéah+  ândö. Lo yeke dabe ti lo na afaute ti ala, na lo yeke punir ala ndali ti asiokpari ti ala.+ 10  “Na ngoi so mbi wara Israël lani,+ lo yeke tongana alê ti vigne na yâ ti benyama. Na ngoi so mbi bâ akotara ti ala lani, ala yeke tongana akozo lê ti figue so asigi na terê ti keke ti figue. Me ala gue na peko ti Baal ti Péor;+ ala mû terê ti ala na ye ti kamene,*+ na ala ga tongana mbeni fungo ye, legeoko tongana ye so ala ye ni mingi so. 11  Gloire ti Éphraïm ahuru ahon tongana ndeke; dungo molenge ayeke dä pëpe, zo oko ayeke na ngo pëpe nga mungo ngo ayeke dä pëpe.+ 12  Même tongana ala bata amolenge, mbi yeke sara si amolenge ni akui juska zo oko angbâ pëpe.+ Mawa na ala na ngoi so mbi tourné peko na ala!+ 13  Na lê ti mbi, Éphraïm, so a lu lo na ndo ti tengo pere ti anyama, ayeke lani tongana Tyr.+ Me fadeso, a lingbi Éphraïm asigi na amolenge ti lo si a gue na ala a fâ ala.” 14  Jéhovah, mû na ala ye so mo doit ti mû na ala: Sara si ala mû ngo, me ngo ni atuku tukungo, nga sara si ngu ti me ti ala ayeke dä pëpe.* 15  “Aye ti sioni kue so ala sara, ala sara na Guilgal,+ ndali ti so a yeke kâ la si mbi ke ala. Mbi yeke tomba ala na da ti mbi ngbanga ti sioni sarango ye ti ala.+ Mbi yeke ye ala encore ape;+ amokonzi ti ala kue ayeke azo ti kpengba-li. 16  A yeke futi ande Éphraïm.+ Gunda ti azo ni ayeke hule tongana ti keke, na ala yeke lë pëpe. Même tongana ala dü, mbi yeke fâ amolenge ni so ala ye ala mingi so.” 17  Nzapa ti mbi ayeke ke ala, ndali ti so ala mä yanga ti lo pëpe.+ Ala yeke ga azo so afono gï na nduzu na popo ti amara.+

Kete tënë

Wala “lango-sioni; gingo akoli nde nde.”
Wala “ndali ti âme ti ala wani.”
Wala “ti matanga so a fa na ala ti sara.”
Wala “na nzapa so ayeke ye ti kamene.”
Wala “ahule.”