Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Michée 7:1-20

LI TI ATËNË NI

  • Asioni sarango ye na Israël (1-6)

    • Awato ti zo ayeke azo ti da ti lo (6)

  • “Mbi yeke ngbâ ti ku” (7)

  • A yeke kiri na sioni na azo so asara sioni na azo ti Nzapa (8-13)

  • Michée asambela Nzapa na lo sepela lo (14-20)

    • Jéhovah akiri tënë (15-17)

    • ‘Zo wa la ayeke Nzapa tongana Jéhovah zo wa?’ (18)

7  Mawa na mbi! Mbi ga tongana zo so, na peko ti so a bungbi alê ti keke ti ngoi ti ndowa awe na a ro tanga ti alê ti vigne so angbâ na yâ ti yaka, lo wara mbeni lê ti vigne ti te pëpe, akozo lê ti figue so mbi sara nzara* ni mingi so ayeke dä pëpe.   Zo so ayeke be-ta-zo ayeke dä encore ape* na ndö ti sese ni; Na popo ti azo, a wara pëpe mbeni zo so ayeke sara ye na lege ni.+ Ala kue ahonde terê ti ala ti tuku mênë.+ Zo oko oko ayeke gi ita ti lo wani ti gbu lo na kota gbanda.   Maboko ti ala ayapu na sarango ye ti sioni;+ amokonzi ayeke hunda ye na tïtî azo, ajuge ayeke hunda goro,+ akota zo ti kodro ayeke fa na gigi nzara ti ye so bê ti ala aye,*+ na ala kue amä terê ti sara aye ni so.   Zo so ayeke nzoni mingi na popo ti ala ayeke tongana sisi, zo so ayeke sara ye tâ na lege ni ahon tanga ni kue na popo ti ala, lo yeke sioni mingi ahon gbagba so a sara na asisi. Me lango so asinziri ti ala asara tënë ni lani, lango so a yeke ga ti kiri na azo peko ti sioni so ala sara, ayeke ga.+ Tongaso li ti ala ayeke ga ande kirikiri.+   Ala zia bê ti ala kue pëpe na zo so ayeke nduru na ala. Ala sara confiance na kamarade ti ala pëpe.+ Mo bata yanga ti mo, même na wali so alango na kate ti mo.   Biani, molenge-koli ake babâ ti lo bê oko, molenge-wali alondo ti ke mama ti lo,+ wali ayeke ke mama ti koli ti lo;+ awato ti zo ayeke azo ti da ti lo.+   Me ti mbi, mbi yeke ngbâ ti bâ ndo ti bâ gango ti Jéhovah.+ Mbi yeke ngbâ ti ku* Nzapa ti salut ti mbi.+ Nzapa ti mbi ayeke mä mbi.+   Mo wato* ti mbi, mo he mbi pëpe. Atâa mbi tï awe, mbi yeke londo ande; atâa mbi yeke na yâ ti vukongo ndo, Jéhovah ayeke ga ande lumière ti mbi.   Mbi yeke kanga bê na gbe ti kota ngonzo ti Jéhovah (ndali ti so mbi sara siokpari na terê ti lo)+ juska lo gbu koko ti mbi, na lo fâ ngbanga ti mbi na lege ti mbilimbili. Lo yeke sigi na mbi ande ti gue na mbi na yâ ti lumière; na mbi yeke bâ ande sarango ye ti mbilimbili so lo sara. 10  Wato ti mbi nga kue ayeke bâ ni ande, kamene ayeke hon ndö ti lo, ndali ti so lo tene lani na mbi, lo tene: “Jéhovah Nzapa ti mo ni ayeke na ndo wa?”+ Lê ti mbi ayeke bâ ande wato ti mbi. Ti fadeso, a yeke dö lo na gere ande tongana popoto na ndö ti lege. 11  A yeke duti ande lango ti sarango amur ti gbagba ti mo na tênë; na lango ni so, a yeke pusu akatikati ni na peko ande.* 12  Na lango ni so, ala yeke ga ande na mbage ti mo; ala yeke londo kâ na Assyrie nga na agbata ti Égypte ti ga, ala yeke londo na Égypte juska na Kota Ngu;* ala yeke londo na ngu-ingo juska ti si na mbeni ngu-ingo, nga ala londo na mbeni hoto ti si na mbeni hoto si ala ga.+ 13  Ndö ti sese ni ayeke ngbâ ande senge ndali ti azo ti kodro ni, ye so asi ndali ti aye so azo ni asara.* 14  Mo mû keke ti mo, mo fa lege na mara ti mo, na ataba ti mara so ayeke ti mo,+ mara so ayeke duti lani gï lo oko na yâ ti gbako, na popo ti yaka ti akeke so azo ayeke te lê ni. Zia ala te ye na Basan nga na Galaad+ tongana ti ândö. 15  “Tongana ti lango so ala sigi lani na Égypte, mbi yeke fa na ala aye ti dongo bê.+ 16  Amara ayeke bâ ni ande na kamene ayeke sara ala, atâa ngangu kue so ala yeke na ni.+ Ala yeke zia maboko ti ala na ndö ti yanga ti ala; mê ti ala ayeke kanga ande. 17  Ala yeke su ande fuku ti sese tongana angbo;+ ala yeke sigi ande na yâ ti angangu gbagba ti ala na mbeto tongana anyama so ayeke hara na sese. Ala yeke ga na mbage ti Jéhovah Nzapa ti e, na mbeto ayeke hon ndö ti ala, nga ala yeke sara mbeto ti mo ande.”+ 18  Zo wa la ayeke Nzapa tongana mo zo wa? Mo so mo yeke pardonné afaute nga mo yeke zi siokpari+ ti tanga ti azo ti mo so angbâ, so ayeke héritage ti mo.+ Mo yeke ngbâ gï lakue ti sara ngonzo pëpe, ndali ti so a nzere na mo ti fa tâ ndoye ti mo na mbage ti azo.+ 19  Mo yeke kiri ti sara ande nzoni bê na e.+ Mo yeke hon na ndö ti afaute ti e.* Mo yeke tuku ande asiokpari ti e kue kâ na gbe ti ngu-ingo.+ 20  Mo yeke fa na Jacob so mo yeke be-ta-zo na lo, mo yeke fa tâ ndoye na mbage ti Abraham, tongana ti so mo deba yanga ti mo na akotara ti e ândö giriri.+

Kete tënë

Wala “âme ti mbi asara nzara ni.”
Wala “agirisa.”
Wala “ye so âme ti ala asara nzara ni.”
Wala “kanga bê ti ku.”
Na Hébreu: “wato” ni so ayeke wali.
A lingbi nga ti tene “ambela ayeke duti ande yongoro kâ.”
So ti tene Euphrate.
Na Hébreu: “ngbanga ti lengo ti peko ti kua ti ala.”
Wala “Mo dö asiokpari ti e na gbe ti gere ti mo.”