Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Michée 3:1-12

LI TI ATËNË NI

  • A sigi na nda ti amokonzi nga na aprophète (1-12)

    • Yingo ti Jéhovah asara si ngangu asi Michée singo (8)

    • Aprêtre ni afa ye ti wara nginza na pekoni (11)

    • Jérusalem ayeke ga place ti gbâ ti afango brique ti da (12)

3  Mbi tene: “Ala mä si, ala, amokonzi ti ahale ti Jacob nga na ala, azo so ayeke na ndö ti azo ti Israël.+ Ala la adoit ti hinga lege ti fango ngbanga ti mbilimbili, ni la ape?   Me ala ke ye so ayeke ye ti nzoni+ na ala ye gï ye so ayeke ye ti sioni.+ Ala zi poro ti terê ti azo ti mbi nga na nyama ti terê ti azo ni na ndö ti abio ni.+   Ala yeke te nga nyama ti terê ti azo ti mbi.+ Ala yeke zi poro ti terê ti azo ni, ala yeke kungbi yâ ti abio ti ala, na ala fâ yâ ti ala kete kete,+ tongana mbeni ye so a yeke tö ni na yâ ti tawa,* tongana nyama so ayeke na yâ ti tawa.   Na ngoi ni so, ala yeke iri ndo ande na Jéhovah ti mû maboko na ala, me lo yeke kiri tënë na ala pëpe. Lo yeke honde ande lê ti lo na ala na ngoi ni so,+ ndali ti asioni ye so ala yeke sara.+   Âdu ti aprophète so ayeke sara si azo ti mbi ahon kirikiri,+ ala so tongana ala yeke te mbeni ye* na pembe ti ala,+ ala dekongo, atene: ‘Siriri!’+ me tongana mbeni zo azia ye oko na yanga ti ala pëpe, ala gi ti sara bira na zo ni; bâ tënë so Jéhovah atene na ndö ti aprophète ni so la, lo tene:   ‘Bï ayeke ga na ndö ti ala,+ na ala yeke bâ ande mbeni vision pëpe;+ me gï vukongo ndo la ala yeke duti na yâ ni, ala yeke bâ mbadi encore ape. Lâ ayeke lï na ndö ti aprophète ni, kota lâ ayeke ga vukongo ndo na ndö ti ala.+   Kamene ayeke sara ande azo ti bango vision,+ vundu ayeke sara azo ti bango mbadi. Ala kue ayeke kanga ye na ndö ti kuä ti ndö ti yanga ti ala,* ndali ti so Nzapa akiri tënë na ala pëpe.’”   Ti mbi, yingo ti Jéhovah asara si ngangu asi mbi singo, a sara nga si mbi hinga ti fâ ngbanga mbilimbili na mbi yeke na mbeto oko pëpe, tongaso si mbi fa tënë ti kpengba-li ti ahale ti Jacob na ala, nga ti fa siokpari ti azo ti Israël na ala.   Ala mä si, ala amokonzi ti da ti azo ti Jacob nga na ala azo so ayeke na ndö ti azo ti Israël,+ ala so ake fango ngbanga ti mbilimbili nga ala ba yâ ti aye kue so ayeke droit,+ 10  ala so ayeke leke Sion na lege ti tukungo mênë nga Jérusalem na lege ti ye so ayeke mbilimbili pëpe.+ 11  Amokonzi* ni afâ ngbanga ndali ti goro,+ aprêtre ni afa ye ti wara futa na pekoni,+ aprophète ni abâ mbadi ndali ti nginza.*+ Me ala zia bê ti ala na Jéhovah,* ala tene: “Eskê Jéhovah ayeke na e ape?+ Ye ti sioni oko ayeke si na e pëpe.”+ 12  Tongaso, ndali ti ala, a yeke dë ande Sion tongana ti so zo ayeke dë yaka, Jérusalem ayeke ga ndo so gï gbâ ti afango brique ti da la ayeke dä,+ hoto ti Da* ni ayeke ga tongana hoto na yâ ti gbako.+

Kete tënë

Wala “tawa so yanga ni akono.”
A lingbi nga ti tene “tongana ala yeke te kobe.”
Wala “Ala kue ala gbu yanga ti ala.”
Na Hébreu: “Ali.”
Wala “argent.”
Wala “ala tene ala zia bê ti ala na Jéhovah.”
Wala “hoto ti temple.”