Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Lévitique 7:1-38

LI TI ATËNË NI

  • Andia na ndö ti mungo asandaga (1-21)

    • Sandaga ti zingo tënë na li ti zo (1-10)

    • Sandaga ti beoko (11-21)

  • A ke tengo mafuta wala mênë (22-27)

  • Mbage so ayeke ti aprêtre (28-36)

  • Ndangba tënë na ndö ti asandaga (37, 38)

7  “‘Ndia ti sandaga ti zingo tënë na li ti zo+ ayeke so: Sandaga so ayeke mbeni ye so ayeke nzoni kue kue kue.  A yeke fâ ande nyama ti sandaga ti zingo tënë na li ti zo na place so a yeke fâ ka dä nyama ti sandaga so a zö ni agbi kue, nga mbeni prêtre ayeke fi mênë ni+ na terê ti gbalaka ni kue.+  Lo yeke mû ande mafuta ni kue:+ damba ni so ayeke gï mafuta mafuta so, mafuta so ayeke na ndö ti akamba ti yâ ni  nga arognon use na mafuta so ayeke na terê ni si ayeke nduru na filet. Lo yeke zi nga ande aye so ayeke na terê ti foie legeoko na arognon ni.+  Prêtre ni ayeke zö aye so kue na sandaga na Jéhovah na ndö ti gbalaka.+ So ayeke sandaga ti zingo tënë na li ti zo la.  Akoli kue so ayeke aprêtre ayeke te ande ni.+ Ala yeke te ande ni na mbeni place so ayeke nzoni-kue. Sandaga so ayeke mbeni ye so ayeke nzoni kue kue kue.+  Ndia ti lege so a yeke mû na sandaga ndali ti siokpari ayeke oko na ti sandaga ti zingo tënë na li ti zo; nyama ni ayeke ga ti prêtre so asara si a zi siokpari ti zo ni.+  “‘Prêtre so azö nyama so a ga na ni ti mû na sandaga so a zö ni agbi kue, poro ti nyama ni+ ayeke ga ti lo.  “‘Sandaga kue ti lê ti kobe, atâa a yeke ti so a zö ni na four, wala a yôro ni na poêle wala a zö ni na gbarabuba,+ ayeke ti prêtre so ayâa sandaga ni. A yeke ga ande ti lo.+ 10  Me sandaga kue ti lê ti kobe so a mû, atâa a mélangé ni na mafuta+ wala a mélangé ni na mafuta pëpe,+ a yeke kangbi ande yâ ni na amolenge ti Aaron ti koli kue alingbi terê. 11  “‘Ndia ti sandaga ti beoko+ so zo alingbi ti ga na ni na Jéhovah ayeke so: 12  Tongana lo ye ti mû sandaga ti beoko ni ti kiri na singila,+ lo yeke ga ande na sandaga ni, nga na terê ni lo ga na mapa so ayeke ronde ronde, so a sara na levure pëpe, so a mélangé ni na mafuta. Lo yeke ga nga na mapa so a sara ni gï na ngu na farine na a tuku mafuta na ndö ni, nga na mapa so ayeke ronde ronde so a mélangé farine na mafuta nzoni si a më ni. 13  Lo yeke mû amapa nde nde so; na terê ni, lo yeke mû mapa so ayeke ronde ronde so levure ayeke dä nga na sandaga ti beoko ti kiringo singila. 14  Mara ti mapa ni oko oko kue, lo ga na ni na Jéhovah; a yeke ye so a zia ni nde ndali ti lo. Prêtre so afi mênë ti nyama ti sandaga ti beoko, ye ni aga ti lo.+ 15  Kasa ti nyama ti sandaga ti beoko so zo amû ni ti kiri na singila, a yeke te ni na lango ni so zo ni amû sandaga ni. Lo yeke bata ande tanga ni juska na ndade na ndapre pëpe.+ 16  “‘Tongana sandaga ti lo ni ayeke ndali ti mbeni zendo so lo mû+ wala ayeke mbeni sandaga so lo ga na ni na bê ti lo wani,+ a yeke te ande ni na lango ni so lo mû na ni nga na ndade ni senge. 17  Me tanga ti nyama ti sandaga ni so angbâ juska mbeni kekereke, a gbi ni.+ 18  Ye oko, tongana a te nyama ti sandaga ni na ota lango ni, zo so aga na ni ayeke nzere na lê ti Nzapa pëpe. Lo yeke wara ye ti peko ti sandaga ni pëpe. Nyama ni ayeke ga ye so ayeke sioni awe, na zo* so ate ni, lo yeke kiri ande tënë ndali ti faute ti lo.+ 19  Kasa ti nyama so andu mbeni ye so aga sioni awe, a te ni pëpe. A gbi ni. Zo kue so aga sioni pëpe alingbi ti te kasa ti nyama so aga sioni pëpe. 20  “‘Sandaga ti beoko ayeke ye so a mû ni na Jéhovah; tongana zo* so aga sioni awe ate ni, ala fâ lo.+ 21  Tongana mbeni zo* andu mbeni ye so aga sioni, atâa a yeke mbeni ye so asara si zo so aga sioni+ wala mbeni nyama so ndia ake tënë ni+ wala mbeni ye ti saleté,+ si na pekoni lo te kasa ti nyama ti sandaga ti beoko so a mû na Jéhovah, ala fâ zo* ni so.’” 22  Jéhovah angbâ ti sara tënë na Moïse, atene: 23  “Tene na azo ti Israël, mo tene: ‘Ala te pëpe mafuta+ ti bagara wala ti taba wala ti ngasa. 24  Ala lingbi ti sara aye nde nde na mafuta ti nyama so a wara lo na kuâ ni wala mafuta ti nyama so mbeni nyama afâ lo, me ala te ni pëpe.+ 25  Zo so ate mafuta ti nyama so lo ga na ni ti tene a zö ni na sandaga na Jéhovah, ala fâ zo ni so. 26  “‘Na ndo kue so ala sara kodro dä, ala te mênë pëpe,+ atâa a yeke mênë ti ndeke wala ti nyama. 27  Zo* so ate mênë, ala fâ lo.’”+ 28  Jéhovah akiri atene na Moïse, atene: 29  “Tene na azo ti Israël, mo tene: ‘Tongana mbeni zo aga na sandaga ti lo ti beoko na gbele Jéhovah, lo yeke mû ande mbage ti sandaga ni na Jéhovah.+ 30  Lo wani lo yeke ga na mafuta ti nyama ni+ nga na kate ni ti tene a zö ni na sandaga na Jéhovah; lo yeke yengi ni mbage na mbage na gbele Jéhovah tongana sandaga so a yengi ni.+ 31  Prêtre ayeke zö mafuta ni na ndö ti gbalaka,+ me kate ni ayeke ga ti Aaron na amolenge ti lo.+ 32  “‘Ti nyama ti sandaga ti beoko, ala yeke mû ande gere ni ti mbage ti koli na prêtre tongana mbage so a zia ni nde ndali ti lo.+ 33  Molenge ti Aaron so ayâa mênë nga na mafuta ti sandaga ti beoko ni na Nzapa, gere ni so ayeke ga ti lo.+ 34  Kate ti nyama ni so ayeke sandaga so a yengi ni nga na gere ni so ayeke mbage so a zia ni nde, mbi zi ni na yâ ti asandaga ti beoko so azo ti Israël amû, mbi mû na prêtre Aaron na amolenge ti lo; a yeke mbeni ndia so azo ti Israël ayeke bata ni aninga.+ 35  “‘Ti londo na lango so a ga na prêtre Aaron na amolenge ti lo so ayeke aprêtre na Jéhovah ti sara kua ti prêtre, aye so a yeke mû na ala na yâ ti asandaga so a zö na Jéhovah la.+ 36  Na lango so a tuku mafuta na li ti ala, Jéhovah amû yanga ti tene azo ti Israël amû na ala aye ni so.+ Mbela so abâ ala na ahale ti ala na yâ ti angoi kue so ayeke ga.’” 37  Sandaga so a zö ni agbi kue,+ sandaga ti lê ti kobe,+ sandaga ndali ti siokpari,+ sandaga ti zingo tënë na li ti zo,+ sandaga ti ziango prêtre na mbata ti kua+ nga na sandaga ti beoko,+ ndia ni la, 38  a lingbi na yanga so Jéhovah amû na Moïse na Hoto ti Sinaï+ na lango so lo mû yanga na azo ti Israël ti ga na asandaga ti ala na Jéhovah na yâ ti benyama ti Sinaï.+

Kete tënë

Wala “âme.”
Wala “âme.”
Wala “âme.”
Wala “âme.”
Wala “Âme.”