Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Lévitique 5:1-19

LI TI ATËNË NI

  • Ambeni siokpari nde nga asandaga ni (1-6)

    • Sigingo na asiokpari ti azo (1)

  • Asandaga so awayere apeut ti mû (7-13)

  • Sandaga ti zingo tënë na li ti zo (14-19)

5  “‘Tongana mbeni zo* abâ mbeni sioni ye so a sara wala lo hinga tënë ni, lo yeke témoin ti ye ni. Na pekoni, lo mä mbeni zo so ayeke to mbela ti tene zo so ayeke témoin asigi na tënë ni,*+ me lo sigi na tënë ni pëpe, lo yeke kiri ande tënë ndali ti faute so lo sara.  “‘Wala tongana mbeni zo* andu mbeni sioni ye, atâa a yeke kuâ ti nyama ti ngonda, wala kuâ ti nyama ti kodro wala kuâ ti mbeni oko ti akete kete nyama so asi singo,+ me lo hinga ni pëpe, lo ga sioni awe, nga tënë ayeke na li ti lo.  Wala tongana sân ti tene mbeni zo ahinga, lo ga sioni na lege so lo ndu mbeni ye so asara si zo aga sioni,+ si na pekoni lo hinga ni, tënë ayeke na li ti lo.  “‘Wala tongana mbeni zo* adeba yanga ti lo hio ti sara mbeni ye, atâa ye ti nzoni wala ye ti sioni, me na pekoni lo bâ so lo deba yanga ti lo ni hio mingi, tënë ayeke na li ti lo.*+  “‘Tongana tënë ayeke na li ti lo ndali ti so lo sara mbeni oko ti aye so, a lingbi lo fa+ siokpari ti lo ni na gigi.  Lo yeke ga ande na sandaga ti zingo tënë na li ti zo na Jéhovah ndali ti siokpari so lo sara:+ lo yeke ga na kete wali-taba wala kete wali-ngasa tongana sandaga ndali ti siokpari. Prêtre ni ayeke sara si a zi siokpari ti lo.  “‘Me tongana lo lingbi pëpe ti ga na taba ti mû na sandaga ti zingo tënë na li ti zo ndali ti siokpari so lo sara, lo yeke ga na akolokoto use wala akete pigeon use na Jéhovah.+ Oko ayeke ti mû na sandaga ndali ti siokpari, na oko ayeke ti mû na sandaga so a zö ni agbi kue.+  Lo yeke ga ande na ala na prêtre; kozoni, prêtre ni ayeke mû ndeke so a ye ti mû lo na sandaga ndali ti siokpari, lo fâ go ti lo, me lo zi li ti lo pëpe.  Lo yeke fi mbeni mbage ti mênë ti ndeke ni na terê ti gbalaka, me tanga ti mênë ni, lo sara si a yuru na gere ti gbalaka ni.+ So ayeke sandaga ndali ti siokpari la. 10  Prêtre ni ayeke mû use ndeke ni na sandaga so a zö ni agbi kue tongana ti so a yeke sara ka;+ prêtre ni ayeke sara si a zi siokpari ti lo, na a yeke pardonné lo.+ 11  “‘Tongana lo lingbi ti ga na akolokoto use wala akete pigeon use pëpe, a lingbi lo ga na dixième ti épha*+ ti pendere farine ti mû na sandaga ndali ti siokpari so lo sara. Lo yeke tuku mafuta nga na vuru dukane na ndö ni pëpe, ndali ti so a yeke sandaga ndali ti siokpari. 12  Lo ga na ni na prêtre; prêtre ni ayeke fû farine ni asi yâ ti maboko ti lo oko, na a yeke bâ ni tongana sandaga ni kue la.* Na pekoni, lo zö ni na ndö ti gbalaka na ndö ti asandaga so a zö na Jéhovah. So ayeke sandaga ndali ti siokpari la. 13  Prêtre ni ayeke sara si a zi siokpari so zo ni asara, atâa a yeke siokpari wa na popo ti asiokpari so, na a yeke pardonné siokpari ti lo;+ tanga ti sandaga ni ayeke ga ande ti prêtre ni+ tongana ti so tanga ti sandaga ti lê ti kobe aga ti lo.’”+ 14  Jéhovah akiri atene na Moïse, atene: 15  “Tongana mbeni zo* asara siokpari na mbana pëpe, na lege so lo sara ye na lege ni pëpe na aye ti Jéhovah so ayeke nzoni-kue,+ lo yeke ga na sandaga ti zingo tënë na li ti zo na Jéhovah.+ Lo ga na koli-taba so sioni ye ayeke na terê ti lo pëpe, so ngere ti lo alingbi na nengo ti sicle* ti argent so a yeke fa ka, ngere ni so a fa na lege ti sicle so a yeke sara kua na ni na ndo so ayeke nzoni-kue.*+ 16  Siokpari so lo sara afa so lo ne pëpe ndo so ayeke nzoni-kue, tongaso lo yeke futa ande ye so a fa na lo ndali ni, nga lo kiri lo zia na ndö ni oku mbage ti ye so lo futa.+ Lo yeke mû ande ni na prêtre ti tene prêtre ni asara si a zi siokpari ti lo+ na lege ti koli-taba ti sandaga ti zingo tënë na li ti zo, na a yeke pardonné lo.+ 17  “Tongana mbeni zo* asara siokpari na lege so lo sara mbeni ye so Jéhovah amû yanga ti tene a sara pëpe, atâa lo sara ni na mbana pëpe, tënë ayeke na li ti lo, na lo yeke kiri ande tënë ndali ti faute ti lo.+ 18  Lo yeke ga ande na koli-taba so sioni ye ayeke na terê ti lo pëpe na prêtre tongana sandaga ti zingo tënë na li ti zo, taba so alingbi na ngere so a yeke fa ka.+ Prêtre ni ayeke sara si a zi faute so zo ni asara, atâa lo hinga fade pëpe so lo sara faute, na a yeke pardonné lo. 19  So ayeke sandaga ti zingo tënë na li ti zo la. Ti tâ tënë ni, tënë ayeke na li ti lo ndali ti so lo sara siokpari na terê ti Jéhovah.”

Kete tënë

Wala “âme.”
Na Hébreu: “mbeni zo so ayeke dekongo na lo yeke deba.” Âmanke a yeke mbeni tongo mbela so na yâ ni zo ni ayeke deba zo so asara sioni ni wala zo so ayeke témoin ni si lo sigi na tënë ni pëpe.
Wala “âme.”
Wala “âme.”
A ye peut-être ti fa so zo ni asara pëpe ye so lo deba yanga ti lo ti sara.
Dixième ti épha ayeke litre 2,2. Bâ na B14.
Wala “tongana ye ti dango bê na sandaga ni kue.”
Wala “âme.”
Sicle oko ane gramme 11,4. Bâ na B14.
Wala “na lege ti sicle so ayeke nzoni-kue.”
Wala “âme.”