Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Lévitique 26:1-46

LI TI ATËNË NI

  • Voro ayanda ape (1, 2)

  • Tufa so aga na peko ti mango yanga (3-13)

  • Sioni so aga na peko ti kengo yanga (14-46)

26  “‘Ala leke anzapa so ayeke ye oko pëpe ndali ti ala wani pëpe;+ ala kpo na nduzu pëpe statue so a leke ni na kode+ wala yanda ti tênë; ala zia pëpe na yâ ti kodro ti ala statue ti tênë+ so a sara ni ti tene azo akuku na gbe ni,+ ndali ti so mbi yeke Jéhovah Nzapa ti ala.  Ala bata asabbat ti mbi, nga ala ne* place ti mbi so ayeke nzoni-kue. Mbi yeke Jéhovah Nzapa ti ala.  “‘Tongana ala ngbâ ti mû peko ti andia ti mbi na ala bata acommandement ti mbi, nga ala sara ye alingbi na ni,+  mbi yeke sara si ngu-nzapa apika na tâ ngoi ni,+ sese ni alë+ nga akeke alë.  Na ngoi ni so, ade ala hunzi pikango lê ti kobe pëpe andâ ngoi ti kongo alê ti vigne asi awe; ade ala hunzi kongo alê ti vigne pëpe andâ ngoi ti lungo ye asi awe; ala yeke te kobe alingbi na nzara ti ala na ala duti nzoni na sese ti ala.+  Mbi yeke zia ande siriri na yâ ti kodro ni.+ Tongana ala yeke lango, mbeni zo ti sara si ala dö na mbeto ayeke duti dä pëpe;+ mbi yeke tomba ande asioni nyama ti ngonda na yâ ti kodro ni, nga mbeni zo ti ga na épée na terê ti ala ayeke dä pëpe.  Ala yeke zia loro na gere ti awato ti ala, na ala yeke sö benda na ndö ti awato ni na lege ti épée.  Ala 5 ayeke zia loro na gere ti azo 100, na ala 100 ayeke zia loro na gere ti azo 10 000, ala yeke sö benda na ndö ti awato ti ala na lege ti épée.+  “‘Mbi yeke bâ ala na nzoni lê,* na mbi yeke sara si ala dü ala ga gbani gbani,+ nga mbi yeke sara ye alingbi na mbele so mbi te na ala.+ 10  Na ngoi so ala ngbâ ti te akobe ti ngu so ahon, ala yeke bâ so a lingbi ala sigi na angbene kobe ni si ala wara place ti zia afini ni dä. 11  Mbi yeke zia tabernacle ti mbi na popo ti ala,+ na mbi yeke* ke ala pëpe. 12  Mbi yeke tambela na popo ti ala na mbi yeke duti ande Nzapa ti ala,+ na ala yeke duti ande azo ti mbi.+ 13  Mbi Jéhovah, mbi yeke Nzapa ti ala so asigi na ala na Égypte si ala duti angbâa encore ape; mbi fâ yâ ti joug so ayeke na ndö ti go ti ala na mbi sara si ala tambela li ti ala na nduzu.* 14  “‘Me tongana ala mä mbi pëpe nga ala bata acommandement so kue pëpe,+ 15  na tongana ala ke andia ti mbi,+ nga ala ke* ambela ti mbi na bê ti ala oko si ala sara ye alingbi na acommandement ti mbi kue pëpe, na ala fâ yâ ti mbele ti mbi,+ 16  mbi nga, mbi yeke sara ye so na ala: mbi yeke sara si ala wara ngangu kpale, kobela ti kota körö nga na ngangu fièvre ayeke sara ala nga ayeke sara si ala wara kpale ti lê nga ngangu ayeke hunzi na ala.* Ala yeke lu alê ti kobe senge senge, ngbanga ti so awato ti ala si ayeke te ande ni.+ 17  Mbi yeke ke ala, na awato ti ala ayeke sö benda na ndö ti ala,+ azo so ake ala ayeke tambela na ndö ti ala+ nga ala yeke kpe atâa so mbeni zo atomba peko ti ala pëpe.+ 18  “‘Atâa tongana aye so asi na ala, me ala mä mbi pëpe, mbi yeke punir ala ndali ti siokpari ti ala fani mbasambala. 19  Pikango kate ti ala so ahon ndö ni so, mbi yeke buba yâ ni na mbi yeke sara si lê ti nduzu ti ala aga tongana wen+ na sese ti ala aga tongana cuivre. 20  Ala yeke buba ngangu ti ala gï senge senge, ngbanga ti so sese ni ayeke lë pëpe+ na akeke nga ayeke lë pëpe. 21  “‘Me tongana ala ngbâ ti ke yanga ti mbi na ala mä mbi pëpe, mbi yeke punir ala fani mbasambala ahon ti kozo na lege ti aye ti ngangu alingbi na siokpari ti ala. 22  Mbi yeke tokua anyama ti ngonda na popo ti ala+ na ala yeke fâ amolenge ti ala+ na anyama ti ala. Anyama ni ayeke sara si wungo ti ala akiri na gbe ni nga ndö ti alege ti kodro ti ala angbâ gï senge.+ 23  “‘Tongana atâa aye so kue, ala ke ti tene mbi kiri na ala na nzoni lege+ nga ala ngbâ ti ke yanga ti mbi, 24  mbi nga kue mbi yeke ke ala; mbi yeke punir ala fani mbasambala ndali ti siokpari ti ala. 25  Mbi yeke sara si awato aga na terê ti ala na a-épée ti punir ala ngbanga ti so ala fâ yâ ti mbele ti mbi na ala.+ Tongana ala honde terê ti ala na yâ ti agbata ti ala, mbi yeke tokua sioni kobela na popo ti ala,+ nga mbi yeke zia ala na maboko ti wato.+ 26  Tongana mbi futi mapa* so ala bata,*+ awali bale-oko ayeke zö mapa ti ala na yâ ti four oko nga awali ni ayeke haka nengo ti mapa ni si ala mû na ala;+ ala yeke te ye me yâ ti ala ayeke si pëpe.+ 27  “‘Tongana atâa aye so kue, ala ngbâ ti ke ti mä mbi na ala ngbâ gï ti sara ngangu-li na mbi, 28  mbi nga kue mbi yeke kiri ti sara aye ti ngangu na ala;+ mbi yeke punir ala fani mbasambala ndali ti siokpari ti ala. 29  Ala yeke te ande amolenge ti ala ti koli na ti wali.+ 30  Mbi yeke futi ando ti ala so ayeke na nduzu+ nga na agbalaka ti ala ti zongo na dukane. Mbi yeke zia kuâ ti ala na ndö ti afungo yanda* ti ala so ayeke na fini pëpe;+ mbi yeke* ke ala na bê ti mbi oko.+ 31  Mbi yeke sara si a futi agbata ti ala na épée,+ na aplace ti ala ti vorongo na anzapa ayeke ngbâ gï senge; asandaga ti ala so fion ni afun nzoni,* mbi yeke mä fion ni pëpe. 32  Mbi yeke sara si kodro ni angbâ gï senge,+ na awato ti ala so ayeke sara ande kodro dä ayeke bâ ndo ni, na li ti ala ayeke kpe kue.+ 33  Mbi yeke kangbi yâ ti ala kirikiri na popo ti amara,+ mbi yeke gboto épée ti tomba na ala;+ kodro ti ala ayeke ngbâ gï senge,+ na a yeke futi agbata ti ala kue kue kue. 34  “‘Na ngoi ni so, sese ni ayeke wu terê ti lo na yâ ti angoi kue so lo ngbâ gï senge so, andâ ala yeke ti ala na kodro ti awato ti ala. Tongaso sese ni ayeke wu terê ti lo* na peko ti angu mingi so lo wu terê ti lo ape so.+ 35  Na angoi kue so sese ni ayeke ngbâ gï senge so, lo yeke wu terê ti lo, ndali ti so lo wu terê ti lo pëpe na ngoi ti asabbat ti ala na tango so ala sara lani kodro dä. 36  “‘Âdu ti amba ti ala so asö kuâ,+ mbi yeke sara si bê ti ala awoko kue na kodro ti awato ti ala; toto ti hulengo kugbe ayeke sara si ala kpe, na ala yeke kpe tongana ti so zo ayeke kpe épée nga ala yeke tï atâa so zo atomba peko ti ala pëpe.+ 37  Na yâ ti loro ti ala ni, ala yeke gu terê ti ala na mba kirikiri tongana ti azo so ayeke kpe épée, atâa so zo oko atomba peko ti ala pëpe; ala yeke na ngangu ti luti na devant ti awato ti ala pëpe.+ 38  Ala yeke kui na kodro ti amara ni,+ nga sese ti awato ti ala ayeke hunzi ala. 39  Azo so angbâ na kodro ti awato ti ala ayeke nge kue na nduzu+ ndali ti afaute ti ala. Ndali ti afaute ti ababâ ti ala nga, ala yeke nge kue na nduzu.+ 40  Ala yeke fa ande afaute ti ala wani,+ ala yeke fa nga afaute na asiokpari ti ababâ ti ala na gigi; ala yeke yeda so ala duti be-ta-zo na mbi pëpe, ala sara ngangu-li na mbi.+ 41  Ni la mbi nga mbi yeke sara aye ti ngangu na ala+ na lege so mbi yeke gue na ala na kodro ti awato ti ala.+ Mbi sara tongaso ngbanga ti so mbi tene: “‘Peut-être bê ti ala so akpengba ayeke kiri ti woko,+ nga ala yeke yeda ti yô aye ti peko ti afaute ti ala. 42  Na ndembe ni so, mbi yeke dabe ti mbi na mbele so mbi te na Jacob,+ na Isaac+ nga na Abraham,+ nga mbi yeke dabe ti mbi na sese ni. 43  Na ngoi so ala yeke wara aye ti peko ti afaute ti ala ndali ti so ala ke ambela ti mbi nga ala ke* andia ti mbi na bê ti ala oko,+ sese ni ayeke ngbâ gï senge na ayeke wu terê ti lo+ na ngoi so ala yeke na ndö ni pëpe. 44  Atâa so kue, na ngoi so ala yeke na kodro ti awato ti ala, mbi yeke ke ala biani biani pëpe.+ Bê ti mbi ayeke ke ala pëpe juska ti tene ala kui kue, ndali ti so sarango tongaso ayeke fango yâ ti mbele ti mbi+ na ala; teti mbi yeke Jéhovah Nzapa ti ala. 45  Ndali ti nzoni ti ala, mbi yeke dabe ti mbi na mbele so mbi te na akotara ti ala+ so mbi sigi na ala na Égypte na lê ti amara+ ti fa so mbi yeke Nzapa ti ala. Mbi yeke Jéhovah Nzapa ti ala.’” 46  So ayeke andia so Jéhovah alu nga na ambela so lo sigi na ni na popo ti lo na azo ti Israël na Hoto ti Sinaï na lege ti Moïse la.+

Kete tënë

Wala “zia bê ti ala adö ndali ti.” Na Hébreu: “ala kpe mbeto ti.”
Na Hébreu: “tourné na mbage ti ala.”
Wala “âme ti mbi ayeke.”
Na Hébreu: “ala luti droit si ala tambela.”
Wala “âme ti ala ake.”
Wala “âme ti ala.”
Wala “kobe.”
Na Hébreu: “futi aye so a yeke zia mapa dä.” Peut-être a ye ti sara tënë ti aye so a zia mapa dä na nduzu ti bata ni.
Tënë ti Hébreu ni ge aye peut-être ti gue oko na mbeni tënë so aye ti tene “puru.” Zo ayeke tene tënë ni so na terê ti mbeni ye ti fa so lo ke ye ni bê oko.
Wala “âme ti mbi ayeke.”
Wala “adë bê ti mbi.” Na Hébreu: “asara si mbi wu terê ti mbi.”
Wala “ayeke bata sabbat.”
Wala “âme ti ala ake.”