Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Lévitique 25:1-55

LI TI ATËNË NI

  • Ngu so ayeke ti Sabbat (1-7)

  • Ngu ti kota ngia (8-22)

  • Kiringo na sese ti azo na ala (23-34)

  • Sarango ye na mbage ti awayere (35-38)

  • Andia na ndö ti angbâa (39-55)

25  Jéhovah akiri asara tënë na Moïse na Hoto ti Sinaï, atene:  “Tene na azo ti Israël, mo tene: ‘Tongana ala si na sese so mbi yeke mû na ala so awe,+ ala zia sese ni awu terê ti lo; a yeke sabbat ndali ti Jéhovah.+  Na yâ ti ngu omene, mo lu ngongoa ti kobe na yaka ti mo; na yâ ti ngu omene ni so, mo fâ terê ti akeke ti vigne ti mo, nga mo bungbi akobe ti yaka ni.+  Me na ngu mbasambala ni, mo zia sese ni awu terê ti lo; a yeke sabbat ndali ti Jéhovah. Mo lu ngongoa ti kobe na yaka ti mo pëpe; mo fâ terê ti akeke ti vigne ti mo pëpe.  Alê ti kobe ti mo so atï na ngoi ti kongo alê ti kobe si amaï na bê ti ala wani, mo ko ni pëpe; vigne ti mo so mo fâ terê ti keke ni ape so, mo ko alê ni pëpe. Mo zia sese ni awu terê ti lo na ngu ni so.  Ye oko, akobe so asigi na bê ti ala wani na ngu so a zia sese ni ti tene awu terê ti lo ayeke ga kobe ti ala: kobe ti mo na angbâa ti mo ti koli na ti wali, azo so mo mû ala na kua, awande so asara kodro na mo,  anyama ti mo nga na anyama ti ngonda. Akobe kue so asigi na bê ti ala wani ayeke ga kobe ti ala.  “‘Mo yeke diko ande asabbat mbasambala: Sabbat oko ayeke ngu mbasambala; tongaso tongana a mû asabbat mbasambala so fani mbasambala, ni kue aga ngu 49.  Na nze mbasambala ni, na lango bale-oko ti nze ni, a lingbi a hûru didi; na Lango ti zingo siokpari,+ ala yeke hûru trompette na yâ ti kodro ni kue. 10  Ala yeke zia ngu 50 ni nde, na ala to mbela ti fa na azo kue so a yeke ngoi ti liberté na yâ ti kodro ni.+ Ngu ni so ayeke Jubilé ndali ti ala. Zo oko oko ayeke kiri na sese ti lo nga na yâ ti sewa ti lo.+ 11  A lingbi ngu 50 ni aduti lakue Jubilé ndali ti ala. Ala lu lê ti kobe pëpe; alê ti kobe ti ala so atï na ngoi ti kongo alê ti kobe si amaï na bê ti ala wani so, ala ko ni pëpe; nga vigne ti ala so ala fâ terê ti keke ni ape so, ala ko alê ni pëpe.+ 12  So Jubilé la. Ala bâ ni tongana ngu so a zia ni nde. Ala lingbi ti te ye kue so asigi na bê ti lo wani.+ 13  “‘Na ngu ti Jubilé so, sese ti zo oko oko ayeke kiri na lo.+ 14  Tongana ala yeke kä ye na mba ti ala wala ala vo ye na maboko ti mba ti ala, ala gi ti wara go na ndö ti mba pëpe.+ 15  Tongana mo ye ti vo sese na maboko ti mba ti mo, mo diko angu so ahon na peko ti Jubilé, na lo yeke fa ngere ni alingbi na wungo ti angu so a yeke ko ande alê ti kobe dä.+ 16  Tongana angu so a yeke ko ande alê ti kobe dä angbâ mingi, lo yeke fa ngere ti sese ni kota; me tongana angu so a yeke ko ande alê ti kobe dä angbâ mingi pëpe, lo yeke fa ngere ti sese ni kete, ndali ti so lo yeke kä sese ni na mo alingbi na wungo ti angu so mo yeke ko ande alê ti kobe dä. 17  Ala gi ti wara go na ndö ti mba pëpe;+ ala kpe mbeto ti Nzapa ti ala,+ ndali ti so mbi yeke Jéhovah Nzapa ti ala.+ 18  Tongana ala kpe andia na ambela ti mbi, na ala sara ye alingbi na ni, ala yeke duti nzoni na sese ni.+ 19  Sese ni ayeke lë ande mingi na ala,+ na ala yeke te akobe ti sese ni alingbi na ala nga ala duti nzoni dä.+ 20  “‘Me tongana ala hunda terê ti ala, ala tene: “So e yeke lu alê ti kobe pëpe nga e yeke ro alê ti kobe ape so, na ngu mbasambala ni e yeke te ande nyen?”+ 21  Mbi yeke iri tënë nzoni na ndö ti ala na ngu omene ni, na sese ni ayeke lë gbani gbani alingbi na ti ngu ota.+ 22  Ala yeke lu ande yaka ti ala na ngu miombe ni, na ala yeke te angbene lê ti kobe ti yaka ni juska na ngu gumbaya ni. Ala yeke te angbene lê ti kobe ti yaka ni juska afini ni asigi. 23  “‘Ala kä sese ti ala biani biani pëpe,+ ndali ti so a yeke ti mbi.+ Na lê ti mbi, ala yeke tongana awande nga azo so aga gango na ndö ni.+ 24  Na kodro so ayeke ga ande ti ala so, ala mû lege na zo kue so akä sese ti lo ti kiri ti vo ni. 25  “‘Tongana ita ti mo zo ti Israël aga wayere si a lingbi lo kä mbage ti sese ti lo, mbeni tâ fami ti lo so ayeke na droit ti kiri ti vo ye so a kä ni ayeke ga, na lo kiri lo vo sese ni.+ 26  Tongana mbeni zo so ayeke na droit ni so ayeke dä pëpe, si zo ni aga zo ti mosoro na lo yeke na nginza ti kiri ti vo sese ni, 27  lo yeke diko wungo ti angu so zo so avo sese ni ako alê ti kobe dä awe ngbene ye so lo kä sese ni na lo, na lo kiri na zo so avo sese ni nginza ti angu so angbâ. Na pekoni, sese ti ita ti mo zo ti Israël ni ayeke kiri na lo.+ 28  “‘Me tongana lo wara nginza ti kiri ti vo sese ti lo ni pëpe, sese ni ayeke ngbâ na maboko ti zo so avo ni so juska na ngu ti Jubilé;+ na pekoni sese ti lo ni akiri aga ti lo.+ 29  “‘Tongana mbeni zo akä da so ayeke na yâ ti gbata so gbagba ayeke dä, ngbene ye na ngoi so lo kä da ni, lo lingbi ti kiri ti vo ni na yâ ti kozo ngu ni;+ lo yeke na ngu oko ti kiri ti vo da ni. 30  Me tongana ngu oko ahon na ade lo kiri lo vo da ni pëpe, da ni so ayeke na yâ ti gbata so gbagba ayeke dä ayeke ngbâ biani biani na maboko ti zo so avo ni nga na ahale ti lo na yâ ti angoi nde nde so ayeke ga. Da ni ayeke kiri pëpe na kozo wa ni na ngu ti Jubilé. 31  Me ada so ayeke na yâ ti akodro so gbagba ayeke dä pëpe, a yeke bâ ada ti ndo ni so tongana senge sese. Zo alingbi ti kiri ti vo ada ni; nga na ngu ti Jubilé, a lingbi a kiri na ni na wa ni. 32  “‘Me ti agbata so a mû na azo ti mara ti Lévi, lakue lege ayeke dä ti tene ala kiri ala vo ada ti ala so ayeke na yâ ti agbata so+ tongana ala kä ni. 33  Tongana mbeni zo ti mara ti Lévi, so da ti lo ayeke na yâ ti gbata so a mû na azo ti mara ti Lévi, akä da ti lo si ade lo kiri lo vo da ni pëpe, a yeke kiri na ni na lo na ngu ti Jubilé,+ ngbanga ti so ada so ayeke na yâ ti agbata ti azo ti mara ti Lévi ayeke ye ti ala na popo ti azo ti Israël.+ 34  Nga, asese+ so angoro agbata ti azo ti mara ti Lévi, a lingbi a kä ni pëpe, ndali ti so a yeke ye ti ala kpu na kpu. 35  “‘Tongana mba ti mo zo ti Israël so alango nduru na mo aga wayere na lo lingbi ti bâ lege ti abezoin ti lo pëpe, mo mû ye na lo+ tongana ti so mo yeke sara na wande so asara kodro na mo,+ tongaso si lo ngbâ na fini. 36  Tongana mo sara bon na lo, yeda pëpe na intérêt so lo ye ti zia na ndö ni nga gi ti wara go na ndö ti lo pëpe.*+ Mo kpe mbeto ti Nzapa ti mo;+ na ita ti mo ayeke ngbâ na fini. 37  Tongana mo sara bon na lo, hunda na lo pëpe ti zia intérêt na ndö ni;+ nga kobe so mo mû na lo, hunda na lo pëpe ti kiri na mbeni na ndö ni. 38  Mbi Jéhovah, mbi yeke Nzapa ti ala so asigi na ala na Égypte+ ti mû na ala sese ti Canaan, si ala hinga so mbi yeke Nzapa ti ala.+ 39  “‘Tongana mba ti mo zo ti Israël so ayeke nduru na mo aga wayere si lo kä terê ti lo na ngbâa na mo,+ forcé lo pëpe ti sara kua na mo tongana ngbâa.+ 40  Mo bâ lo tongana zo so mo mû lo na kua,+ tongana wande so asara kodro na mo. Lo yeke sara kua na mo juska na ngu ti Jubilé. 41  Na pekoni, mo zi lo, lo na amolenge ti lo;* lo yeke kiri na yâ ti sewa ti lo. Lo kiri na sese ti akotara ti lo,+ 42  ndali ti so azo ti Israël ayeke angbâa ti mbi so mbi sigi na ala na Égypte.+ A lingbi ala kä terê ti ala pëpe tongana ti so a yeke kä mbeni zo na ngbâa. 43  Mo sara ye ti ngangu na mba ti mo ni pëpe,+ na mo kpe mbeto ti Nzapa ti mo.+ 44  Ala lingbi ti mû angbâa ti ala ti koli na ti wali na popo ti azo ti amara so ayeke na terê ti ala; ala vo angbâa ti ala ti koli na ti wali na popo ti ala senge. 45  Ala lingbi nga ti vo angbâa ti ala na popo ti amolenge ti awande so asara kodro na ala+ nga na popo ti amolenge so awande so adü na kodro ti ala; angbâa ni so ayeke ga aye ti ala. 46  Ala mû angbâa so na amolenge ti ala ti ga ye ti ala, si ala ga angbâa ti ala kpu na kpu. Azo so la ala mû ala tongana angbâa, me ala sara ye ti ngangu na aita ti ala azo ti Israël pëpe.+ 47  “‘Tongana wande so asara kodro na mo aga zo ti mosoro, na ita ti mo zo ti Israël so ayeke na terê ti lo aga wayere, si lo kä terê ti lo na ngbâa na wande ni wala na mbeni membre ti sewa ti wande ni, 48  na peko ti so lo kä terê ti lo awe, lege ayeke lakue dä ti tene a futa ye ti zi lo. Mbeni ita ti lo ti koli alingbi ti futa ye si a zi lo,+ 49  wala ita ti babâ ti lo ti koli wala molenge ti ita ti babâ ti lo ni ti koli wala mbeni tâ fami ti lo* alingbi ti futa ye si a zi lo. “‘Wala tongana lo wani lo ga zo ti mosoro, lo yeke futa ye si a zi lo.+ 50  Lo na zo so avo lo ayeke diko wungo ti angu so ahon ngbene ye so lo kä terê ti lo na lo juska na ngu ti Jubilé;+ a lingbi nginza so a mû na lo na ngoi so lo kä terê ti lo alingbi na wungo ti angu so lo yeke sara kua dä.+ Nginza ti kua ti lo na ngoi ni so ayeke duti tongana ti zo so a mû lo mungo na kua.+ 51  Tongana angu so lo lingbi ti sara kua dä angbâ mingi, lo yeke futa ngere ti zingo lo alingbi na wungo ti angu ni so. 52  Me tongana angu so angbâ juska na ngu ti Jubilé ayeke mingi pëpe, lo yeke diko wungo ni, na lo yeke futa ngere ti zingo lo alingbi na wungo ti angu ni so. 53  Ngu oko oko so lo yeke sara kua na zo ni, a lingbi zo ni abâ lo tongana zo so lo mû lo na kua ti futa lo. Ala zia lo sara ye ti ngangu na lo pëpe.+ 54  Me tongana lo lingbi pëpe ti sara aye ni so si a zi lo, a yeke zi lo na ngu ti Jubilé,+ lo na amolenge ti lo.* 55  “‘Azo ti Israël ayeke angbâa ti mbi. Ala yeke angbâa ti mbi so mbi sigi na ala na Égypte.+ Mbi yeke Jéhovah Nzapa ti ala.

Kete tënë

Wala “hunda pëpe ti tene lo zia gbâ ti nginza na ndö ni.”
Na Hébreu: “amolenge ti lo ti koli.”
Wala “fami ti lo ti mênë.”
Na Hébreu: “amolenge ti lo ti koli.”