Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Lévitique 23:1-44

LI TI ATËNË NI

  • Alango so a zia nde ndali ti Nzapa (1-44)

    • Sabbat (3)

    • Pâque (4, 5)

    • Matanga ti mapa so levure ayeke dä ape (6-8)

    • Sandaga ti akozo lê ti kobe (9-14)

    • Matanga ti ayenga (15-21)

    • Kongo lê ti kobe na lege ni (22)

    • Matanga ti hurungo trompette (23-25)

    • Lango ti pardonengo siokpari (26-32)

    • Matanga ti akpangba (33-43)

23  Jéhovah akiri asara tënë na Moïse, atene:  “Tene na azo ti Israël, mo tene: ‘Amatanga+ ti Jéhovah so a lingbi ala to mbela ndali ni+ ayeke akota bungbi so ayeke nzoni-kue. Amatanga ni ayeke so:  “‘Ala lingbi ti sara kua na yâ ti alango omene, me lango mbasambala ni ayeke mbeni sabbat, mbeni kota bungbi ndali ti Nzapa. Ala yeke sara kua oko pëpe.+ Na ando kue so ala sara kodro dä, lango ni so ayeke mbeni sabbat ndali ti Jéhovah.+  “‘Amatanga so Jéhovah atene na ala ti sara ni, akota bungbi so ala yeke fa tënë ni tongana ngoi ti sarango ni alingbi, ayeke so:  Na kozo nze ni, na lango 14 ti nze ni,+ na peko ti lindango ti lâ kozoni si ndo avuko,* a yeke Pâque+ ndali ti Jéhovah.  “‘Lango 15 ti nze ni so, ala yeke sara matanga ndali ti Jéhovah, Matanga ti mapa so a sara na levure pëpe.+ Ala yeke te mara ti mapa ni so na yâ ti alango mbasambala.+  Na kozo lango ni, ala yeke sara kota bungbi so ayeke nzoni-kue.+ Ala sara mbeni ngangu kua pëpe.  Me ala yeke ga na mbeni ye ti tene a zö ni na sandaga na Jéhovah na yâ ti alango mbasambala ni kue. Na lango mbasambala ni, ala yeke sara mbeni kota bungbi so ayeke nzoni-kue. Ala sara mbeni ngangu kua pëpe na lango ni so.’”  Jéhovah angbâ ti sara tënë na Moïse, atene: 10  “Tene na azo ti Israël, mo tene: ‘Tongana ala si na sese so mbi yeke mû na ala, na ala fâ akozo lê ti kobe+ ti ala si ala kanga gere ni, ala ga na mbeni oko na prêtre.+ 11  Lo yeke yengi ni mbage na mbage na gbe ti Jéhovah si ala nzere na lê ti lo. Prêtre ayeke yengi ni na ndade ti lango ti Sabbat ni. 12  Na lango ni so a yeke yengi ni ndali ti ala, ala yeke mû kete koli-taba ti ngu oko, so sioni ye ayeke na terê ti lo pëpe, si a mû na Jéhovah tongana sandaga so a zö ni agbi kue. 13  Sandaga ti lê ti kobe so a yeke zia na terê ti taba ni ayeke pendere farine so alingbi dixième use ti épha,* farine so a mélangé ni na mafuta. A yeke zö ni na sandaga na Jéhovah, sandaga so fion ni afun nzoni na hôn ti lo.* Sandaga ti sämba so a yeke zia na terê ti taba ni ayeke quart ti hîn.* 14  Ala te mapa wala lê ti kobe so a zö ni wala fini lê ti kobe pëpe juska na lango ni so, juska ala ga na sandaga ni na Nzapa ti ala si. Mbela so ayeke ngbâ aninga teti ala nga na ahale ti ala na yâ ti angoi nde nde so ayeke ga, na ando kue so ala yeke sara kodro dä. 15  “‘Na ndade ti Sabbat ni, ti londo na lango so ala ga na lê ti kobe so a kanga gere ni si a yengi ni so, ala yeke diko ande asabbat mbasambala.+ A lingbi asabbat ni aduti ayenga mbasambala, so yenga oko ayeke lango mbasambala. 16  Na lango so aga na peko ti mbasambala Sabbat ni, so ti tene na lango 50 ni,+ ala ga na mbeni fini sandaga ti lê ti kobe na Jéhovah.+ 17  Ala mû mapa use na yanga-da ala ga na ni ti mû na sandaga so a yengi ni. Ala sara ni na pendere farine so alingbi dixième use ti épha.* Ala sara ni na levure,+ ala mû na Jéhovah tongana akozo lê ti kobe so abe awe.+ 18  Na terê ti mapa ni, ala yeke ga na akete koli-taba mbasambala ti ngu oko so sioni ye ayeke na terê ti ala pëpe, kete koli-bagara oko nga na akoli-taba use.+ Anyama so ayeke ti mû na Jéhovah tongana sandaga so a zö ni agbi kue legeoko na sandaga ti lê ti kobe nga na ti sämba; a yeke zö aye so kue na sandaga, sandaga so fion ni afun nzoni na hôn ti Jéhovah.* 19  Ala mû kete ngasa oko na sandaga ndali ti siokpari+ nga akete koli-taba use ti ngu oko na sandaga ti beoko.+ 20  Prêtre ayeke mû akete koli-taba use so nga na mapa ti akozo lê ti kobe so, lo yengi ni mbage na mbage tongana sandaga so a yengi ni na gbele Jéhovah. A yeke aye so a zia ni nde ndali ti Jéhovah me so ayeke ga ti prêtre ni.+ 21  Na lango ni so, ala yeke to mbela+ tënë ti kota bungbi so ala yeke sara so ayeke nzoni-kue. Ala sara mbeni ngangu kua pëpe. Mbela so ayeke ngbâ aninga teti ala nga na ahale ti ala na yâ ti angoi nde nde so ayeke ga, na ando kue so ala yeke sara kodro dä. 22  “‘Tongana ala yeke ko alê ti kobe ti yaka ti ala, ala ko pëpe ati so ayeke na yanga ti yaka ni; tanga ti alê ti kobe so angbâ na lê ti yaka ni, ala kiri ala ro ni pëpe.+ Ala zia ni na awayere*+ nga na awande so asara kodro na ala.+ Mbi yeke Jéhovah Nzapa ti ala.’” 23  Jéhovah akiri asara tënë na Moïse, atene: 24  “Tene na azo ti Israël, mo tene: ‘Na nze mbasambala ni, na kozo lango ti nze ni, ala yeke wu terê ti ala; a yeke hûru trompette ti dabe ti ala+ na kota bungbi so ayeke nzoni-kue. 25  Ala sara mbeni ngangu kua pëpe, nga ala ga na mbeni ye ti tene a zö ni na sandaga na Jéhovah.’” 26  Jéhovah akiri asara tënë na Moïse, atene: 27  “Me lango bale-oko ti nze mbasambala ni ayeke Lango ti zingo siokpari.+ Ala yeke sara kota bungbi ndali ti Nzapa, ala yeke sara pasi na terê ti ala wani*+ nga ala yeke ga na mbeni ye ti tene a zö ni na sandaga na Jéhovah. 28  Ala sara kua na lango ni so pëpe, ngbanga ti so a yeke lango ti zingo siokpari+ ti ala na lê ti Jéhovah Nzapa ti ala. 29  Zo* so asara pasi na terê ti lo wani pëpe* na lango ni so, ala fâ lo.+ 30  Zo* so asara kua na lango ni so, mbi yeke futi lo. 31  Ala sara kua pëpe. Mbela so ayeke ngbâ aninga teti ala nga na ahale ti ala na yâ ti angoi nde nde so ayeke ga, na ando kue so ala yeke sara kodro dä. 32  A yeke mbeni sabbat ndali ti ala, tongaso ala wu terê ti ala. Na lango gumbaya ti nze ni so, na lakui, ala sara pasi na terê ti ala wani.*+ Ala bata sabbat ti ala a londo na lakui ngbii a si na ndade ni na lakui.” 33  Jéhovah angbâ ti sara tënë na Moïse, atene: 34  “Tene na azo ti Israël, mo tene: ‘Na lango 15 ti nze mbasambala ni, ala yeke sara Matanga ti Akpangba* ndali ti Jéhovah; a yeke ninga lango mbasambala.+ 35  Na kozo lango ni, ala yeke sara kota bungbi ndali ti Nzapa. Ala sara mbeni ngangu kua pëpe. 36  Na yâ ti alango mbasambala so, ala ga na mbeni ye ti tene a zö ni na sandaga na Jéhovah. Na lango miombe ni, ala sara kota bungbi so ayeke nzoni-kue,+ na ala ga na mbeni ye ti tene a zö ni na sandaga na Jéhovah. A yeke lango ti kota bungbi. Ala sara mbeni ngangu kua pëpe. 37  “‘So ayeke amatanga+ ti Jéhovah so a lingbi ala to mbela ndali ni ti fa so a yeke akota bungbi so ayeke nzoni-kue,+ si ala ga na mbeni ye ti tene a zö ni na sandaga na Jéhovah: sandaga so a zö ni agbi kue,+ sandaga ti lê ti kobe+ nga na sandaga ti sämba,+ a lingbi na kapa ti lango oko oko. 38  Ala yeke ga na asandaga so na terê ti asandaga so a yeke mû ka na lango ti asabbat ti Jéhovah,+ na terê ti amatabisi ti ala,+ asandaga kue ti sarango ye alingbi na azendo ti ala+ nga na asandaga kue so bê ti ala apusu ala ti ga na ni;+ ala mû aye so kue na Jéhovah. 39  Me na lango 15 ti nze mbasambala ni, na peko ti so ala bungbi akobe ti sese ni awe, ala yeke sara matanga ti Jéhovah lango mbasambala.+ Ala wu terê ti ala na kozo lango ni nga na lango miombe ni.+ 40  Na kozo lango ni, ala ko alê ti apendere keke, ala fâ akugbe ti mbûrü,+ amaboko ti akeke so gbâ ti kugbe ni ayeke dä nga na amaboko ti keke ti peuplier ti terê ti ngu na ala sara ngia+ na devant ti Jéhovah, Nzapa ti ala, lango mbasambala.+ 41  Na yâ ti ngu oko oko, ala yeke sara matanga so na Jéhovah lango mbasambala.+ Ala sara matanga so na nze mbasambala ni. Mbela so ayeke ngbâ aninga teti ala na ahale ti ala na yâ ti angoi nde nde so ayeke ga. 42  Ala yeke lango na gbe ti akpangba lango mbasambala.+ Amolenge ti kodro kue so ayeke na Israël ayeke lango na gbe ti akpangba, 43  si ahale ti ala ahinga+ so mbi sara si azo ti Israël alango na gbe ti akpangba na ngoi so mbi sigi na ala na kodro ti Égypte.+ Mbi yeke Jéhovah Nzapa ti ala.’” 44  Tënë so Moïse atene na azo ti Israël na ndö ti amatanga so Jéhovah atene na ala ti sara la.

Kete tënë

Na Hébreu: “na popo ti alakui use.”
Dixième use ti épha ayeke litre 4,4. Bâ na B14.
Wala “adë bê ti lo.” Na Hébreu: “asara si lo wu terê ti lo.”
Hîn oko alingbi na litre 3,67. Bâ na B14.
Dixième use ti épha ayeke litre 4,4. Bâ na B14.
Wala “adë bê ti Jéhovah.” Na Hébreu: “asara si Jéhovah awu terê ti lo.”
Wala “azo so abâ pasi.”
Wala “na âme ti ala.” Ti “sara pasi na terê ti zo wani” aye ti sara tënë ti alege nde nde so zo wani ayeke ke ambeni ye; mungo jeûne ayeke nga na yâ ni.
Wala “Âme.”
A lingbi nga ti tene “amû jeûne pëpe.”
Wala “Âme.”
Wala “âme ti ala.”
Wala “akete da ti kugbe so ayeke ninga ka pëpe.”