Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Lévitique 20:1-27

LI TI ATËNË NI

  • Vorongo Molek; sarango yorö (1-6)

  • Duti nzoni-kue nga ne babâ na mama (7-9)

  • A lingbi a fâ azo so asara lango-sioni (10-21)

  • Duti nzoni-kue si mo ngbâ na yâ ti kodro ni (22-26)

  • A lingbi a fâ azo ti sarango yorö (27)

20  Jéhovah asara tënë na Moïse, atene:  “Tene na azo ti Israël, mo tene: ‘Tongana mbeni zo ti Israël wala mbeni wande so asara kodro na Israël amû molenge ti lo na Molek, ala fâ lo.+ Azo ti kodro ni ayeke bo lo afâ lo.  Mbi yeke ke zo ni so, na mbi yeke fâ lo ndali ti so lo mû molenge ti lo na Molek na lo sara si place ti mbi so ayeke nzoni-kue aga sioni+ nga lo buba nengo ti iri ti mbi so ayeke nzoni-kue.  Tongana azo ti kodro ni akanga lê na ndö ti ye so zo ni asara so, na ala fâ lo pëpe na ngoi so lo mû molenge ti lo na Molek,+  mbi yeke ke zo ni so nga na sewa ti lo.+ Mbi yeke fâ lo na azo kue so amû peko ti lo ti sara ndumba na Molek.  “‘Tongana mbeni zo* asara ndumba na lege ti yingo na lege so lo gue na azo ti sarango tënë na yingo ti akuâ+ nga na azo ti fango aye so ayeke si ande na zo,+ mbi yeke ke zo* ni so na mbi yeke fâ lo.+  “‘Ala bata terê ti ala nde ndali ti mbi na ala ga nzoni-kue,+ ndali ti so mbi Jéhovah, mbi yeke Nzapa ti ala.  Ala bata andia ti mbi na ala sara ye alingbi na ni.+ Mbi Jéhovah la mbi zia ala nde.+  “‘Tongana mbeni zo adeba* babâ wala mama ti lo, ala fâ lo.+ So lo deba babâ wala mama ti lo, ngbanga ti mênë ti lo ayeke na li ti lo wani. 10  “‘Tënë ti zo so agi wali ti mbeni zo: Tongana mbeni koli agi wali ti mbeni mba ti lo, ala fâ lo, lo na wali ni kue.+ 11  Koli so alango na wali ti babâ ti lo abi nengo ti babâ ti lo na sese* awe.+ Ala fâ ala use kue. Ngbanga ti mênë ti ala ayeke na li ti ala wani. 12  Tongana mbeni koli alango na wali ti molenge ti lo, ala fâ ala use kue. Ye so ala sara so ayeke nde na ti so Nzapa aleke. Ngbanga ti mênë ti ala ayeke na li ti ala wani.+ 13  “‘Tongana mbeni koli alango na mba ti lo koli tongana ti so a yeke lango na wali, ala use kue asara ye so ayeke sioni mingi.+ Ala fâ ala. Ngbanga ti mênë ti ala ayeke na li ti ala wani. 14  “‘Tongana mbeni koli amû mbeni wali nga lo kiri lo mû mama ti wali ni, a yeke mbeni ye so ayeke sioni mingi.*+ Ala fâ lo na awali ni kue na ala gbi ala,+ si azo ti sarango sioni ye sân kamene angbâ na popo ti ala pëpe. 15  “‘Tongana mbeni koli alango na mbeni nyama, ala fâ lo, nga ala fâ nyama ni.+ 16  Tongana mbeni wali aga nduru na nyama si lo lango na nyama ni,+ mo fâ wali ni na nyama ni. Ala fâ ala. Ngbanga ti mênë ti ala ayeke na li ti ala wani. 17  “‘Tongana mbeni koli alango na ita ti lo ti wali, atâa babâ ti ala la ayeke oko wala mama ti ala la ayeke oko, so ye ti kamene la.+ Ala fâ ala na lê ti azo kue. Lo bi nengo ti ita ti lo ti wali ni na sese.* A lingbi lo kiri tënë ndali ti faute ti lo. 18  “‘Tongana mbeni koli alango na mbeni wali so ayeke bâ yâ ti lo, ala use kue asigi na nda ti mênë ti wali ni awe.+ Ala fâ ala use kue. 19  “‘Mo bungbi pëpe na mama-kota wala mama-kete ti mo wala na omba ti mo. Mo sara tongaso, andâ mo bi nengo ti atâ fami ti mo na sese la.+ Mo na wali ni kue, ala yeke kiri tënë ndali ti faute ti ala. 20  Tongana mbeni koli alango na wali ti ita ti babâ ti lo, andâ lo bi nengo ti ita ti babâ ti lo ni na sese* awe. + Lo na wali ni kue, ala yeke kiri tënë ndali ti siokpari ti ala. Ala yeke wara kuâ, sân ti dü molenge. 21  Tongana mbeni koli amû wali ti ita ti lo, so ayeke ye ti sioni mingi.+ Lo bi nengo ti ita ti lo ni na sese* awe. Ala yeke dü molenge pëpe. 22  “‘Ala bata andia ti mbi kue nga na ambela ti mbi kue,+ na ala sara ye alingbi na ni,+ si a tomba ala pëpe na ndö ti sese so mbi yeke gue na ala ti sara kodro dä.+ 23  Ala mû peko ti andia ti amara so mbi yeke tomba ala na lê ti ala so pëpe,+ ndali ti so amara so asara aye so kue, na mbi ke ala na bê ti mbi oko.+ 24  Ni la mbi tene na ala: “Ala yeke mû ande kodro ti amara so, so lait na mafuta ti otoro asi singo dä, na mbi yeke mû ni na ala.+ Mbi Jéhovah, mbi yeke Nzapa ti ala, nga mbi la mbi zia ala nde na tanga ti azo.”+ 25  A lingbi ala hinga popo ti nyama so ayeke nzoni na nyama so ayeke nzoni pëpe, nga ndeke so ayeke nzoni pëpe na ndeke so ayeke nzoni;+ ala sara si ala ga* sioni pëpe na lege ti mbeni nyama, wala ndeke wala nyama so ayeke hara na sese, ala so mbi tene na ala awe ti bâ ala tongana ye ti sioni.+ 26  Ala duti nzoni-kue na lê ti mbi, ndali ti so mbi Jéhovah, mbi yeke nzoni-kue;+ mbi zia ala nde na tanga ti azo si ala ga azo ti mbi.+ 27  “‘Koli wala wali so ayeke zo ti sarango tënë na yingo ti akuâ wala zo ti fango aye so ayeke si ande na zo,* ala fâ lo.+ Ala bo lo afâ lo. Ngbanga ti mênë ti lo ayeke na li ti lo wani.’”

Kete tënë

Wala “âme.”
Wala “âme.”
Wala “airi sioni na ndö ti.”
Na Hébreu: “azi bongo na terê ti babâ ti lo.”
Wala “mbeni ye ti kamene.”
Na Hébreu: “lo zi bongo na terê ti ita ti lo ti wali.”
Na Hébreu: “lo zi bongo na terê ti ita ti babâ ti lo.”
Na Hébreu: “lo zi bongo na terê ti ita ti lo ti koli.”
Wala “âme ti ala aga.”
Wala “ayeke na ngangu ti fa ye so ayeke si kekereke.”