Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Lévitique 2:1-16

LI TI ATËNË NI

  • Sandaga ti lê ti kobe (1-16)

2  “‘Tongana mbeni zo* aye ti mû sandaga ti lê ti kobe+ na Jéhovah, a yeke nzoni lo mû pendere farine, na lo tuku mafuta nga na vuru dukane na ndö ni.+  Lo ga na ni na aprêtre, amolenge ti Aaron; prêtre ayeke fû ande farine ni so mafuta ni nga na dukane ayeke na yâ ni so asi yâ ti maboko ti lo oko. Na pekoni lo zö ni na ndö ti gbalaka, na a yeke bâ ni tongana sandaga ni kue la,*+ sandaga so fion ni afun nzoni na hôn ti Jéhovah.*  Tanga ti sandaga ti lê ti kobe ni ayeke ti Aaron na amolenge ti lo;+ a yeke mbeni ye so, na popo ti aye so a zö na sandaga na Jéhovah, ayeke nzoni kue kue kue.+  “‘Tongana sandaga ti lê ti kobe so mo ye ti mû ayeke mbeni ye so a zö ni na four, a yeke nzoni a sara ni na pendere farine: mapa so ayeke ronde ronde so a sara na levure pëpe nga so a mélangé ni na mafuta, wala mapa so a sara ni gï na ngu na farine, na a tuku mafuta na ndö ni.+  “‘Tongana sandaga ti lê ti kobe so mo ye ti mû ayeke mbeni ye so a zö ni na gbarabuba,+ a yeke nzoni a sara ni na pendere farine so a sara na levure pëpe nga so a mélangé ni na mafuta.  A yeke nzoni a kungbi yâ ni kete kete, nga mo tuku mafuta na ndö ni.+ A yeke sandaga ti lê ti kobe.  “‘Tongana sandaga ti lê ti kobe so mo ye ti mû ayeke mbeni ye so a yôro ni na poêle, a yeke nzoni a sara ni na pendere farine nga na mafuta.  A yeke nzoni mo ga na sandaga ti lê ti kobe so a sara na aye ni so na Jéhovah; a yeke mû ande ni na prêtre, na lo ga na ni nduru na terê ti gbalaka.  Prêtre ni ayeke mû ande mbage ti sandaga ti lê ti kobe ni, lo zö ni na ndö ti gbalaka, na a yeke bâ ni tongana sandaga ni kue la,*+ sandaga so fion ni afun nzoni na hôn ti Jéhovah.*+ 10  Tanga ti sandaga ti lê ti kobe ni ayeke ti Aaron na amolenge ti lo; a yeke mbeni ye so, na popo ti aye so a zö na sandaga na Jéhovah, ayeke nzoni kue kue kue.+ 11  “‘Ala mû pëpe na Jéhovah sandaga ti lê ti kobe so levure ayeke dä,+ ndali ti so mengo farine so levure ayeke dä wala mafuta ti otoro, ala zö ni na sandaga na Jéhovah pëpe. 12  “‘Ala lingbi ti mû aye ni so na Jéhovah tongana akozo lengo ti aye ti ala,+ me a lingbi a gue na ni pëpe ti tene a zö ni na ndö ti gbalaka tongana sandaga so fion ni afun nzoni na hôn ti Nzapa.* 13  “‘Mo yeke zia ande ingo na terê ti sandaga ti mo kue ti lê ti kobe; a lingbi ingo, so adabe ti mo na mbele ti Nzapa, amanke pëpe na terê ti sandaga ti mo ti lê ti kobe. Mo zia ingo na terê ti asandaga kue so mo yeke mû.+ 14  “‘Tongana sandaga ti lê ti kobe so mo ye ti mû na Jéhovah ayeke akozo lê ti kobe ti mo so abe, a yeke nzoni mo mû ali ni so ade fini ni* so mo yôro ni na wâ, afini lê ni so a neka ni me so lê ni angbâ dä kete kete.+ 15  Mo tuku mafuta nga na vuru dukane na ndö ni. A yeke sandaga ti lê ti kobe. 16  Prêtre ayeke zö ande ni na ndö ti gbalaka, na a yeke bâ ni tongana sandaga ni kue la,*+ so ti tene, lo yeke zö na sandaga na Jéhovah mbage ti afini lê ti kobe ni so a neka ni me so lê ni angbâ dä kete kete, mbage ti mafuta ni nga na dukane ni kue.

Kete tënë

Wala “âme.”
Wala “tongana ye ti dango bê na sandaga ni kue.”
Wala “adë bê ti Jéhovah.” Na Hébreu: “asara si Jéhovah awu terê ti lo.”
Wala “tongana ye ti dango bê na sandaga ni kue.”
Wala “adë bê ti Jéhovah.” Na Hébreu: “asara si Jéhovah awu terê ti lo.”
Wala “adë bê ti Nzapa.” Na Hébreu: “asara si Nzapa awu terê ti lo.”
Wala “so angbâ vert vert.”
Wala “tongana ye ti dango bê na sandaga ni kue.”