Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Lévitique 11:1-47

LI TI ATËNË NI

  • Anyama ti nzoni ni na ti sioni ni (1-47)

11  Jéhovah atene na Moïse na Aaron, atene:  “Tene na azo ti Israël, mo tene: ‘Na popo ti anyama kue so ayeke na ndö ti sese,* anyama so ala lingbi ti te la:+  Anyama kue so li ti gere* ti ala akangbi use nga ala te kobe ala mene ni na ala kiri na ni na yanga ti ala si ala kiri ate ni, ala so la si ala lingbi ti te ni.  “‘Na popo ti anyama so ate kobe ala mene ni na ala kiri na ni na yanga ti ala si ala kiri ate ni wala ala so li ti gere ti ala akangbi use, ala so la ala te pëpe: chameau, ndali ti so, atâa so lo te kobe lo mene ni na lo kiri na ni na yanga ti lo si lo kiri lo te ni, li ti gere ti lo akangbi use pëpe. Ala bâ lo tongana ye ti sioni.+  Sibisi,*+ ala te lo pëpe, ndali ti so, atâa so lo te kobe lo mene ni na lo kiri na ni na yanga ti lo si lo kiri lo te ni, li ti gere ti lo akangbi use pëpe. Ala bâ lo tongana ye ti sioni.  Ndaramba, ala te lo pëpe, ndali ti so, atâa so lo te kobe lo mene ni na lo kiri na ni na yanga ti lo si lo kiri lo te ni, li ti gere ti lo akangbi use pëpe. Ala bâ lo tongana ye ti sioni.  Cochon,+ ala te lo pëpe, ndali ti so, atâa so li ti gere ti lo akangbi use, tongana lo te kobe lo mene ni, lo yeke kiri na ni pëpe na yanga ti lo si lo kiri lo te ni. Ala bâ lo tongana ye ti sioni.  Ala te nyama ti ala pëpe, na ala ndu kuâ ti ala pëpe. Ala bâ ala tongana ye ti sioni.+  “‘Na popo ti anyama so ayeke na yâ ti ngu, ala so ala lingbi ti te ni la: Anyama kue so tïtî ala ayeke ti susu na ala yeke na écaille si ala yeke na yâ ti angu-ingo wala na yâ ti akota ngu so ayeke sua, ala so la ala lingbi ti te.+ 10  Anyama kue so ayeke na yâ ti angu-ingo wala na yâ ti akota ngu so ayeke sua si tïtî ala ayeke ti susu pëpe nga ala yeke na écaille pëpe, na popo ti gbâ ti akete nyama kue so afono na yâ ti ngu nga na popo ti anyama* kue so ayeke na fini si ayeke na yâ ti ngu, ala bâ ala tongana ye ti saleté. 11  Ala bâ ala tongana ye ti saleté. Ala te nyama ti ala pëpe,+ na ala bâ kuâ ti ala tongana ye ti saleté. 12  Anyama kue so ayeke na yâ ti ngu si tïtî ala ayeke ti susu pëpe nga ala yeke na écaille pëpe, ala bâ ala tongana ye ti saleté. 13  “‘Na popo ti anyama so ayeke huru, ambeni ayeke dä so ala bâ ala tongana ye ti saleté. Ala te ala pëpe. A yeke ala so: aigle,+ balbuzard na vuko vautour,+ 14  bengba milan, mara ti avuko milan kue, 15  mara ti acorbeau kue, 16  autruche,* hibou, mouette, mara ti andeke kue ti mungo kondo, 17  kete hibou, cormoran, hibou so mê ti lo ayo, 18  cygne, pélican, vautour, 19  cigogne, mara ti ahéron kue, huppe na dongi.* 20  Gbâ ti akete kete nyama kue so ayeke huru nga ayeke hara na gere osio, ala bâ ala tongana ye ti saleté. 21  “‘Na popo ti gbâ ti akete kete nyama so ayeke huru nga ayeke hara na gere osio, ala te gï ala so, na ndö ti agere osio ni so, ala yeke nga na ambeni gere so ala yeke dö na sese ti huru na ni. 22  Na popo ti akete kete nyama so, ala so ala lingbi ti te ni la: mara ti agbadora nde nde,+ dingo* nga na ngadi. 23  Me tanga ti gbâ ti akete kete nyama kue so ayeke huru nga ayeke hara na gere osio, ala bâ ala tongana ye ti saleté. 24  Anyama so ayeke sara si ala ga sioni. Zo kue so andu kuâ ti ala, lo yeke ga sioni juska na lakui.+ 25  Zo kue so ayô kuâ ti ala, lo yeke sukula bongo ti lo,+ na lo yeke ga sioni juska na lakui. 26  “‘Anyama kue so li ti gere ti ala akangbi kue use na so ala te kobe ala mene ni na ala kiri na ni na yanga ti ala si ala kiri ate ni pëpe, ala bâ ala tongana ye ti sioni. Zo kue so andu ala, lo yeke ga sioni.+ 27  Na popo ti anyama kue so ayeke tambela na gere osio, ala kue so ayeke tambela na lê ti gere ti ala, ala bâ ala tongana ye ti sioni. Zo kue so andu kuâ ti ala, lo yeke ga sioni juska na lakui. 28  Zo so ayô kuâ ti ala, lo yeke sukula bongo ti lo,+ na lo yeke ga sioni juska na lakui.+ Ala bâ ala tongana ye ti sioni. 29  “‘Na popo ti gbâ ti akete nyama so afono na ndö ti sese, ala so ala yeke bâ ala tongana ye ti sioni ayeke so: deku so a hinga lo na zingo dû, senge deku,+ mara ti akada kue, 30  kada ti da, kota kada, kada ti ngu, kada ti mbutu na kolingo. 31  Gbâ ti akete nyama so la ala bâ ala tongana ye ti sioni.+ Zo kue so andu kuâ ti ala, lo yeke ga sioni juska na lakui.+ 32  “‘Ye kue so kuâ ti anyama so atï na ndö ni, ye ni ayeke ga sioni, atâa a yeke kungba* so a leke na keke, wala bongo, wala poro ti nyama wala bongo ti vundu. Kungba kue so a yeke sara na kua, a yeke yôro ande ni na ngu; na a ngbâ sioni juska na lakui, na pekoni si a yeke ga nzoni. 33  Tongana kuâ ti anyama so atï na yâ ti mbeni kungba so a sara ni na sese, ala fâ yâ ti kungba ni; na ye kue so ayeke na yâ ti kungba ni ayeke ga sioni.+ 34  Ye kue ti tengo ni so ngu ti yâ ti kungba ni so ayuru na ndö ni ayeke ga sioni, na ye ti nyongo ni kue so ayeke na yâ ti kungba ni so ayeke ga sioni. 35  Ye kue so kuâ ti anyama so atï na ndö ni ayeke ga sioni. Atâa a yeke four wala duke, ala fâ yâ ni. A ga sioni awe, ala bâ ni tongana ye ti sioni. 36  Gï li ti ngu wala dû so a bata ngu dä si ayeke ga sioni pëpe, me zo so andu kuâ ti ala ni ayeke ga sioni. 37  Tongana kuâ ti ala atï na ndö ti ngongoa ti kobe so a yeke lu ande ni, ngongoa ni so ayeke ga sioni pëpe. 38  Me tongana a tuku ngu na terê ti ngongoa ni, na mbeni ye ti terê ti kuâ ti anyama ni atï na ndö ni, ala bâ ngongoa ni so tongana ye ti sioni. 39  “‘Tongana mbeni nyama ti ala ti tengo ni akui, zo so andu kuâ ti nyama ni ayeke ga sioni juska na lakui.+ 40  Zo so ate kuâ ti nyama ni lo yeke sukula bongo ti lo, na lo yeke ga sioni juska na lakui.+ Zo so ayô kuâ ti nyama ni, lo yeke sukula bongo ti lo na lo ga sioni juska na lakui. 41  Gbâ ti akete kete nyama kue so afono na ndö ti sese ayeke ye ti saleté.+ Ala te ala pëpe. 42  Atâa a yeke ala so ayeke hara na yâ ti ala, ala so ayeke tambela na gere osio wala ala so ayeke tambela na gbâ ti gere, ala te ni pëpe, ngbanga ti so ala yeke ye ti saleté.+ 43  Ala sara si ala ga* ye ti saleté na lege ti akete kete nyama so pëpe, na ala sara si ala ga sioni na lege ti ala pëpe.+ 44  Teti mbi Jéhovah la mbi yeke Nzapa ti ala;+ ala bata terê ti ala nde ndali ti mbi na ala ga nzoni-kue,+ ngbanga ti so mbi yeke nzoni-kue.+ Tongaso, ala sara si ala ga* sioni pëpe na lege ti akete kete nyama so atambela na ndö ti sese. 45  Mbi Jéhovah la mbi yeke zo so asigigi na ala na kodro ti Égypte ti fa na ala so mbi yeke Nzapa ti ala;+ ala ga nzoni-kue,+ ngbanga ti so mbi yeke nzoni-kue.+ 46  “‘So ayeke ndia na ndö ti anyama, anyama so ayeke huru, anyama* kue so ayeke na fini si ayeke na yâ ti ngu nga na anyama* kue so asi singo na ndö ti sese, 47  tongaso si ala hinga popo ti ye so ayeke sioni na ye so ayeke nzoni, nga popo ti nyama so ayeke ti tengo ni na nyama so ayeke ti tengo ni pëpe.’”+

Kete tënë

Wala “anyama so ayeke tambela na ndö ti sese.”
A ye ti sara tënë ti gere ti anyama tongana bagara na ngasa.
Wala “topê, lélé.”
Wala “a-âme.”
Wala “naamo,” mbeni kota ndeke.
Wala “nyama ti ngia; chauve-souris.”
Wala “kindiri; nyahon.”
Kungba ni ge ayeke aye tongana kopo wala sembe.
Wala “âme ti ala aga.”
Wala “âme ti ala aga.”
Wala “a-âme.”
Wala “a-âme.”