Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Josué 5:1-15

LI TI ATËNË NI

  • Fango ganza na Guilgal (1-9)

  • A sara Matanga ti Pâque; manne akaï ti tï (10-12)

  • Mokonzi ti aturugu ti Jéhovah (13-15)

5  Gï na peko ti so agbia kue ti azo ti mara ti Amori+ so ayeke na mbage* ti ouest ti Ngu ti Jourdain, nga na agbia kue ti azo ti Canaan+ so ayeke na terê ti Ngu-ingo, amä so Jéhovah asara si Ngu ti Jourdain ahule na gbele azo ti Israël juska ala kue afâ ni na gere, bê ti ala afun kue+ nga ngangu ti azo ti kodro ni kue ahunzi ndali ti azo ti Israël.+  Na ngoi ni so Jéhovah atene na Josué: “Mo mû tênë ti silex mo leke na azembe na mo kiri mo fâ amolenge-koli ti Israël na ganza+ ti fani use ni.”  Tongaso, Josué amû atênë ti silex lo leke na azembe na lo fâ amolenge-koli ti Israël na ganza na Guibéath-Haaraloth.*+  Ndani so Josué afâ ala na ganza ayeke so: Akoli kue so asigi lani na Égypte, ala kue so alingbi ti tiri bira,* ala kui na lege na yâ ti benyama na peko ti so ala sigi na Égypte.+  Akoli kue so asigi lani na Égypte a fâ ala lani na ganza awe, me ti ala so a dü ala na lege na yâ ti benyama na peko ti so ala sigi na Égypte ade ti fâ ala na ganza pëpe.  Azo ti Israël atambela ngu 40+ na yâ ti benyama juska azo ni so kue akui. A yeke ala so alingbi ti tiri bira so asigi na sese ti Égypte me so ala mä lani yanga ti Jéhovah pëpe.+ Jéhovah adeba na ala so lo yeke zia lege na ala pëpe ti bâ sese+ so lo deba yanga ti lo lani na akotara ti e ti mû ni na e,+ mbeni sese so lait na mafuta ti otoro asi singo dä.+  Tongaso, ahon ti tene lo bata ala na fini, lo bata gi amolenge ti ala.+ A yeke amolenge ni so la si Josué afâ ala na ganza, ngbanga ti so a fâ ala lani na ganza pëpe na ngoi ti tambela ni.  Tongana a fâ azo ni kue na ganza awe, ala ngbâ na yâ ti camp ni juska kä ti ganza ni amü kue.  Na pekoni, Jéhovah atene na Josué: “Laso mbi sara si kamene ti Égypte so ayeke na terê ti ala ahon yongoro.” Ndani la a iri ndo ni so Guilgal*+ juska laso. 10  Azo ti Israël angbâ ti sara camp ti ala na Guilgal, na lango 14 ti nze ni so na lakui ala sara Matanga ti Pâque,+ na kpangbala ndo ti désert ti Jéricho. 11  Lango oko na peko ti Matanga ti Pâque, ala komanse ti te akobe ti kodro ni, ala te mapa so a sara na levure pëpe nga+ na alê ti kobe so a yôro ni yorongo, ala te ni na oko lango ni so. 12  Lango oko na peko ti so ala komanse ti te akobe ti kodro ni, manne akaï ti tuku. Azo ti Israël awara manne encore ape,+ me ala komanse ti te akobe ti kodro ti Canaan na ngu ni so.+ 13  Mbeni lâ, tongana Josué asi nduru na Jéricho, lo bâ ndo, lo bâ mbeni koli+ so ayeke luti na devant ti lo, koli ni agbu mbeni épée so lo gboto ni na yâ ti bozo ni awe.+ Josué ague na terê ti lo na lo hunda koli ni, lo tene: “Mo yeke na mbage ti e wala na mbage ti awato ti e?” 14  Koli ni atene na lo: “Ên-ën, mbi yeke na mbage ti awato ti ala pëpe, mbi mokonzi ti aturugu ti Jéhovah la mbi ga so.”+ Josué akuku, lo kpo li ti lo na sese na lo tene na lo: “Tënë ti nyen la seigneur ti mbi ayeke na ni ti tene na wakua ti lo?” 15  Mokonzi ti aturugu ti Jéhovah atene na Josué: “Zi poro na gere ti mo ngbanga ti so ndo so mo yeke luti dä so ayeke nzoni-kue.” Hio, Josué azi poro.+

Kete tënë

Na Hébreu: “mbage so ayeke nduru na ngu-ingo.”
Ndani aye ti tene “Hoto ti poro ti Pito.”
Wala “ala so ngu ti ala alingbi ti sara kua ti turugu.”
Ndani aye ti tene “A mû a hon na ni yongoro.”