Gue na tënë ti yâ ni

Gue na gbe ti menu

Gue na li ti atënë ni

aTémoin ti Jéhovah

Sango

Bible na ndo ti Internet | MBETI TI NZAPA TI FINI DUNIA

Josué 4:1-24

LI TI ATËNË NI

  • Atênë ti dabe na fango ngu ni (1-24)

4  Gï so azo ti Israël kue afâ Ngu ti Jourdain awe, Jéhovah atene na Josué:  “Soro na popo ti azo ni akoli 12, koli oko na yâ ti mara oko,+  na mo mû yanga so na ala: ‘Ala mû atênë 12 so ayeke na milieu ti Ngu ti Jourdain, na ndo so aprêtre ni aluti fade dä,+ ala ga na ni ala zia na ndo so ala yeke lango ande dä na bï so.’”+  Tongaso, Josué airi akoli 12 so lo zia ala na ndö ti azo ti Israël, koli oko na yâ ti mara oko,  na lo tene na ala: “Ala hon ti ala kozo na Sanduku ti mbele* ti Jéhovah Nzapa ti ala na ala gue na milieu ti Ngu ti Jourdain, zo oko ayô tênë oko na ndö ti go ti lo alingbi na wungo ti amara bale-oko na use ti azo ti Israël,  ti tene aduti mbeni fä na popo ti ala. Tongana amolenge* ti ala ahunda ala ande atene: ‘Ala zia atênë so ge ngbanga ti nyen?’+  fade ala tene na amolenge ti ala, atene: ‘A yeke ngbanga ti so Ngu ti Jourdain aluti lani na gbele sanduku+ ti mbele ti Jéhovah. Na ngoi so sanduku ni ayeke fâ lani Ngu ti Jourdain, ngu ni akaï ti sua. Atênë so ayeke ga ande ye ti dango bê ndali ti azo ti Israël lakue lakue.’”+  Tongaso, azo ti Israël asara lani tongana ti so Josué amû yanga na ala. Ala mû atênë 12 so ayeke na milieu ti Ngu ti Jourdain tongana ti so Jéhovah afa na Josué, atênë ni alingbi na wungo ti amara ti azo ti Israël. Ala mû atênë ni ala gue ala zia ni na ndo so ala lango dä na bï ni so.  Josué adö atênë 12 so na milieu ti Ngu ti Jourdain na ndo so aprêtre so ayô sanduku ti mbele ni azia gere ti ala fade dä.+ Atênë so angbâ na ndo ni so juska laso. 10  Aprêtre so ayô Sanduku ni angbâ ti luti na milieu ti Ngu ti Jourdain, juska azo ni asara aye kue so Jéhovah amû yanga na Josué si lo fa peko ni na ala so. Ala sara ni alingbi na ye kue so Moïse ahunda lani na Josué. Na oko ngoi ni azo ti Israël ague hio ti fâ ngu ni. 11  Gï so azo ni afâ ngu ni awe, aprêtre so ayô Sanduku ti Jéhovah afâ ngu na ni na lê ti azo ni.+ 12  Azo ti mara ti Ruben, azo ti mara ti Gad na ndambo ti mara ti Manassé afâ ti ala ngu ni kozo ti tanga ti azo ti Israël kue, mo bâ mo tene aturugu so a leke ala nzoni ti gue na bira,+ tongana ti so Moïse amû lani yanga na ala so.+ 13  Aturugu nduru na 40 000 so ayü aye ti bira la afâ ngu ni na gbele Jéhovah ti gue na kpangbala ndo ti désert ti Jéricho. 14  Na lango ni so Jéhovah ayâa Josué na lê ti azo ti Israël kue,+ na ala ne* lo mingi na lâ ti fini ti lo kue tongana ti so ala ne lani Moïse mingi.+ 15  Na pekoni, Jéhovah atene na Josué: 16  “Mû yanga na aprêtre so ayô sanduku+ ti Témoin ni ti sigi na yâ ti Ngu ti Jourdain.” 17  Tongaso, Josué amû yanga na aprêtre ni, lo tene: “Ala sigi na yâ ti ngu ni.” 18  Tongana aprêtre so ayô sanduku+ ti mbele ti Jéhovah alondo na milieu ti Ngu ti Jourdain ti sigi, na gere ti ala andu yanga ti kuru sese, Ngu ti Jourdain ni akiri asua nga asuku asigi na yanga ni+ tongana ti kozo. 19  Azo ni afâ Ngu ti Jourdain na lango bale-oko ti kozo nze na ala sara camp ti ala na Guilgal,+ na mbage ti est na yanga ti sese ti Jéricho. 20  Ti atênë 12 so ala mû na yâ ti Ngu ti Jourdain si ala sigi na ni so, Josué adö ni na ndö ti terê na Guilgal.+ 21  Na pekoni, lo tene na azo ti Israël, lo tene: “Mbeni lâ tongana amolenge ti ala ahunda ala, atene: ‘Nda ti atênë so ayeke nyen?’+ 22  fade ala tene na amolenge ti ala, atene: “Azo ti Israël afâ ândö Ngu ti Jourdain na ndö ti kuru sese,+ 23  na ngoi so Jéhovah Nzapa ti e asara si Ngu ti Jourdain ahule na gbele ala juska ala fâ ni, gï tongana ti so Jéhovah Nzapa ti e asara lani na Ngu-Bengba na ngoi so lo sara si ahule na gbele ti e juska e fâ ni.+ 24  Lo sara ye so ti tene azo ti sese kue ahinga so maboko ti Jéhovah ayeke ngangu mingi,+ tongaso si ala lingbi ti kpe Jéhovah Nzapa ti ala lakue.’”

Kete tënë

Na Hébreu: “amolenge-koli.”
Na Hébreu: “ala sara mbeto ti.”